Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 146 Hüküm no: 100 Orijinal metin no: [66-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa’nın vefatıyla küçük kızı Kadriye Hanım’a intikal eden ev hissesinin satışına izin verilmesi Şevket, izin: 1 kıt‘a Numara: 75, 30 guruş Mahmiye-i İstanbul’da Sultan Bâyezid-i Velî Câmi‘-i şerîfi kurbünde Sarrâc İshak mahallesinde sâkin iken bundan akdem vefât eden Mustafa Ağa b. Hakkı’nın sulbiye sagīre kızı Kadriye Hanım’ın vâlidesi ve tesviye-i umûruna bâ-hüccet-i şer‘iye vasîyy-i mansûbesi zâtı ta‘rîf-i şer‘î ile mu‘arrefe olan işbu bâ‘isetü’l-kitâb Ümmügülsüm Hanım bt. Mehmed Haşim? m. bi’l-vesâye takrîr-i kelâm ve ta‘bîr ani’l-merâm edüp nezâret-i Evkāf-ı Hümâyûn’a mülhak evkāfdan el-Hâc Mehmed Efendi Vakfı musakkafâtından mahalle-i mezbûrede Câmi‘-i şerîf sokağında kâin dört numara ile murakkam ma‘lûmü’l-hudûd ve’l-müştemilât şehriye dört akçe icâre-i müeccelelü bir bâb menzilin sülüs hisse-i şâyi‘ası sagīre-i mezbûrenin bâ-temessük-i mütevellî bi’l-icâreteyn taht-ı tasarrufunda olup lâkin menzil-i mezkûr ânen fe-ânen müşrif-i harâb olarak hâsılı harcına vefâ etmeyip bekāsı sagīre-i mezbûre hakkında muzır ve gayr-ı müfîd olduğundan mâ‘adâ sagīre-i mezbûrenin nafaka ve kisveye dahi eşedd-i ihtiyâcı olmağla sagīre-i mezbûrenin menzil-i mezkûrda olan sülüs hisse-i şâyi‘ası bedel-i misliyle bâ-re’y-i mütevellî âhara ferâğ ve bedeli ahz ü kabz birle i‘mâl ve istirbâh olunup hâsıl olan nemâsıyla infâk ve iksâ olunmak sagīre-i mezbûre hakkında her vechile enfa‘ ve evlâ olduğuna binâen işbu yedimde olup hâlâ kassâm-ı askerî fazîletlü Mehmed Emin Efendi ile Birinci Dâire-i Belediye taraflarından i‘tâ olunan memhûr bir kıt‘a tahmîn-i bedel pusulası mantûkunca sagīre-i mezbûrenin menzil-i mezkûrda olan sülüs hisse-i şâyi‘a bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla iki bin guruş bedel mukābelesinde âhara ferâğa izin taleb şüd. Fî 20 Muharrem sene [1]301 Şühûdü’l-hâl: Evkāf-ı Hümâyûn Beytü’l-mâl hademesinden Mehmed Nuri Ağa b. el-Hâc Osman b. İbrahim, Zenci Bilal Ağa b. Abdullah b. Abdülkerim ve gayruhum.