Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 147 Hüküm no: 101 Orijinal metin no: [67-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerbethaneci Vangel Kiryako’nun ölümüyle küçük oğlu Kostandi’ye intikal eden şerbethane, dükkânlar, menziller, mağaza ve gedik hisselerinin satışına izin verilmesi Abdulkadir, izinli vekâlet: 1 kıt‘a Numara: 81, 287,5 guruş Medîne-i Niğde kurâsından Frenk karyesi ahâlisinden olup Hudâvendigâr-ı esbak cennet-mekân Sultan Ahmed Hân-ı Evvel -tâbe serâhû- Hazretlerinin Evkāf-ı şerîfeleri beytü’l-mâl hudûdu dâhilinde Galata’ya muzâfe Arnabud karyesinde zikri âtî bir bâb şerbethânede sâkin iken bundan akdem fevt olan Devlet-i Aliyye teba‘asının Rum milletinden Şerbethâneci Vangel Kiryako v. İsak’ın sulbî sagīr oğlu kezâlik teba‘a-i Devlet-i Aliyye’den Kostandi’nin anası ve tesviye-i umûruna bâ-hüccet-i şer‘iye vasîyy-i mansûbesi karye-i mezkûrede mütemekkine teba‘a-i müşârün-ileyhânın millet-i merkūmesi nisvânından Arhondi bt. Kostandi’nin li-ebeveyn er karındaşı olup tarafından ber-vech-i âtî vekâlet iddi‘â eden teba‘a ve millet-i merkūmeden işbu bâ‘isü’r-rakīm Anaştaşaki m. zikirleri âtî şerbethâne ve dekâkin ve menzil ve gedik âlâtı hisselerine vasîyy-i gāibe-i merkūmenin teslîmiyle bi’l-emâne vâzı‘ü’l-yed olan teba‘a ve millet-i merkūmeden Haci Hıristo v. Yorgi muvâcehesinde üzerine da‘vâ ve takrîr-i kelâm edüp nezâret-i Haremeyn-i Muhteremeyn’e mülhak evkāfdan sadr-ı esbak merhûm Halil Hamid Paşa Vakfı musakkafâtından zikr olunan Arnabud karyesinde ve caddesinde vâki‘ herbiri ma‘lûmü’l-hudûd ve’l-müştemilât beş kıt‘a temessükât mantûklarınca şehriye cem‘an yüz elli akçe icâre-i müeccelelü mukaddemâ iki ve el-yevm altmış dokuz numaralı bir bâb şerbethâne ve şerbethâne-i mezkûr odaları tahtında kâin bir bâb tenekeci dükkânı ve yetmiş üç numaralı diğer bir bâb dükkân ve karşısında kâin doksan numaralı fevkınde menzili müştemil bir bâb kahve dükkânı ve yine mahâll-i mezkûrda on bir numaralı tahtında kahve dükkânını müştemil bir bâb menzil ve on üç numaralı bir bâb mağazadan herbirinin sülüs hisse-i şâyi‘aları müteveffâ-yı merkūmun sağlığında bi’l-icâreteyn taht-ı tasarrufunda olup ba‘de fevtihî sagīr-i merkūm Kostandi’ye hasbe’l-âde intikāl edüp ve şerbethâne-i mezkûre derûnunda mevcûde gedik ta‘bîr olunur iki aded âlât-ı lâzıme-i ma‘lûmenin yüz yirmişer sehmden cem‘an seksen dört sehmi iki bin beş yüz doksan iki sehm i‘tibârıyla beş yüz doksan altı sehmi dahi gāibe-i merkūme Argondo’nun bin dokuz yüz otuz iki sehmi sagīr-i mezbûrun bâ-hüccet-i şer‘iye yedinde mülk ve hakları olup lâkin şerbethâne ve dekâkin ve mağaza ve menâzil-i mezkûrlar ânen fe-ânen müşrif-i harâb olarak hâsılı harclarına vefâ etmeyip ve gedik-i mezkûrların âlâtları dahi mürûr-ı ezmine ile telef ve zâyi‘ olacağı zâhir ve bedîdâr olup ol-vechile bekāları sagīr-i merkūm hakkında muzır ve gayr-ı müfîd olduğundan mâ‘adâ sagīr-i mezbûrun nafaka ve kisveye dahi eşedd-i ihtiyâcı olmağla sagīr-i merkūmun şerbethâne ve dekâkin ve menâzil ve mağaza-i mezkûrlarda olan hisse-i mezkûreleri bedel-i misilleriyle bâ-re’y-i mütevellî âhara ferâğ ve âlât-ı gedik-i mezkûrlarda olan hisse-i şâyi‘aları dahi vasîyy-i gāibe-i merkūmenin gedik-i mezkûrlarda olan hisse-i mezkûreleriyle ma‘an semen-i misilleriyle bey‘ ve bedel ve semenleri ahz ü kabz birle i‘mâl ve istirbâh olunup hâsıl olan ribhiyle infâk ve iksâ olunmak sagīr-i merkūm hakkında her vechile enfa‘ ve evlâ olduğuna binâen vasîyy-i gāibe-i merkūme Arhondi sagīr-i merkūmun şerbethâne ve dekâkin ve menâzil ve mağaza ve âlât-ı gedik-i mezkûrlarda olan hisse-i şâyi‘a-i mezkûrelerini âlât-ı gedik-i mezkûrlardan kendi hisse-i şâyi‘a-i mezkûresiyle ma‘an merkūmun yedinden nez‘ ü kabza ve ba‘de’l-kabz sagīr-i merkūmun hisse-i mezkûrelerini ber-vech-i muharrer âhara ferâğ ve bey‘a kıbel-i şer‘den izin talebine ve ba‘de’l-izn sagīr-i merkūmun şerbethâne ve dekâkin ve menâzil ve mağaza-i mezkûrlarda olan hisse-i mezkûrelerini bedel-i misilleriyle bâ-re’y-i mütevellî âhara ferâğa ve âlât-ı gedik-i mezkûrlarda olan hisse-i mezkûrelerini dahi kendi hisse-i mezkûreleriyle ma‘an bedel ve semen-i misilleriyle âhara bey‘a ve bedel ve semenlerini ahz ü kabza ve makbûzundan âlât-ı gedik-i mezkûrlarda kendü hissesinin semenini kendüye irsâl ve îsâle ve sagīr-i merkūmun şerbethâne ve dekâkin ve menâzil ve mağaza-i mezkûrlarda olan hısas-ı mezkûresinin bedelleriyle âlât-ı gedik-i mezkûrda olan hisse-i merkūmenin semenini li-ecli’l-istirbâh Eytâm Sandığı’na vaz‘ ü teslîme ve husûs-ı mezkûr mütevakkıf olduğu umûrun küllîsine yedimde olup sene-i sâbıkā ya‘ni bin üç yüz senesi Cemâziyelevvel’inin on üçüncü ve Recebi’l-ferd’inin on yedinci günü târihiyle müverrahalar ve ol târihde medîne-i merkūme nâibi bulunan fazîletlü Mehmed Said Efendi’nin imzâ ve hâtemini hâviye işbu iki kıt‘a vekâlet hüccetleri ve zahrlarında muharrer medîne-i mezkûre Bidâyet Mahkemesi’nin mazbataları mantûklarınca tarafından beni gıyâbımda kabûlüme mevkūfe vekâlet-i mutlaka-i sahîha-i şer‘iye ile bi’l-asâle ve bi’l-vesâye vekîl nasb ü ta‘yîn edüp haber-i vekâlet bana vâsıl oldukda ben dahi vekâlet-i mezkûreyi kabûl etmemle suâl olunup hisse-i mezkûrelerden keff-i yed ve bana teslîme merkūm Haci Hıristo’ya tenbîh olunmak murâdımdır dedikde gıbbe’s-suâl ol dahi cevâbında [68] hisse-i mezkûreler sagīr-i merkūm ile vasîyy-i gāibe-i merkūmenin ber-minvâl-i muharrer tasarruf ve temellüklerinde olup kendüsü dahi hisse-i mezkûreler vasîyy-i gāibe-i merkūmenin teslîmiyle bi’l-emâne vâzı‘ü’l-yed olduğunu ikrâr mâ‘adâ müdde‘î-i merkūmun vekâlet müdde‘âsını ba‘de’l-inkâr hüccet ve mazbata-i mezkûreler lede’l-mütâla‘a hüccet-i mezkûrelerin mühürleri mutâbık ve me‘âlleri vekâlet-i mezkûreyi beyândan ibâret idiği cânib-i fetvâhâne-i celîleden tahşiye ve temhîr kılındığına ve mazmûnları müdde‘î-i merkūmun takrîr-i meşrûhuna muvâfık ve mazbata-i mezkûre dahi hüccet-i mezkûreleri müeyyid ve musaddık bulunduğuna binâen tezvîr ve tasnî‘den sâlim olduğu münfehim ve Mecelle-i Ahkâm-ı Adliye’nin bin sekiz yüz yirmi birinci mâddesi ahkâmı mûcebince bu makūle şübhe ve tezvîr ve tasnî‘den sâlim olan senedât-ı şer‘iyenin mazmûnuyla bilâ-beyyine amel ve hüküm câiz olmağla mûcebince ba‘de’l-hükm ve’t-tenbîh Dördüncü Dâire-i Belediye ser-mühendisliği tarafından i‘tâ kılınan memhûr bir kıt‘a tahmîn-i bedel pusulası mantûkunca sagīr-i merkūmun şerbethâne ve dekâkin ve menâzil ve âlât-ı gedik-i mezkûrlarda olan hisse-i şâyi‘a-i mezkûreleri bundan akdem lede’l-müzâyede ve ba‘de’l-keşf el-yevm bedel ve semen-i misilleri idiği bi’l-ihbâr zâhir olan lira-yı Osmânî yüz guruş hesâbıyla şerbethâne ve dekâkin ve menâzil ve mağaza-i mezkûrlarda olan hisse-i şâyi‘alarını iki bin altı yüz altmış altı guruş yirmi altı para iki akçe mukābelesinde bâ-re’y-i mütevellî âhara ferâğa ve âlât-ı gedik-i mezkûrlarda olan hisse-i şâyi‘asını dahi dokuz bin dokuz yüz kırk guruş otuz yedi para bir akçe semen mukābelesinde âhara bey‘a kıbel-i şer‘den müvekkilesi vasîyy-i gāibe-i merkūmeye izâfetle vekîl-i merkūm Anaştaşaki’ye izin verildiğini Teftîş Mahkemesi kassâmı fazîletlü Ahmed Bahâî Efendi inhâ etmeğin mâ-vaka‘a bi’t-taleb ketb olundu. Fî 15 Muharrem sene [1]301 Şühûdü’l-hâl: Ahmed Ağa b. Mehmed, Hafız Ömer Efendi b. el-Hâc Ahmed ve gayruhum.