Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 150 Hüküm no: 103 Orijinal metin no: [68-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine Hatun’un vefatıyla küçük kızı Zekiye Şaziye’ye intikal eden ev ve bahçe hissesinin satışına izin verilmesi Küçük İbrahim, izin: 1 kıt‘a Numara: 105, 15 guruş Mahmiye-i İstanbul’da Yenibahçe kurbünde Kepçeci Pîrî mahallesinde sâkine iken bundan akdem vefât eden Emine Hanım bt. Mehmed Emin’in sadriye sagīre kızı Zekiye Şaziye’nin min-kıbeli’l-eb ceddesi ve tesviye-i umûruna bâ-hüccet-i şer‘iye vasîyy-i mansûbesi olup zâtı ta‘rîf-i şer‘î ile mu‘arrefe işbu bâ‘isetü’l-kitâb Fâtımatü’z-zehra Hanım bt. Mehmed m. bi’l-vesâye ikrâr ve takrîr-i kelâm edüp nezâret-i Evkāf-ı Hümâyûn’a mülhak evkāfdan merhûme Fatıma Hatun Vakfı musakkafâtından mahalle-i mezbûrede Sarmaşık caddesinde vâki‘ olan bir numara ile murakkam ma‘lûmü’l-hudûd ve’l-müştemilât şehriye yirmi akçe icâre-i müeccelelü bir bâb menzil ma‘a bağçenin rub‘ hisse-i şâyi‘ası müteveffât-ı mezbûrenin hayatında bâ-temessük-i mütevellî bi’l-icâreteyn taht-ı tasarrufunda olup ba‘de vefâtihâ sagīre-i mezbûreye hasbe’l-âde intikāl edüp lâkin menzil-i mezkûr ânen fe-ânen müşrif-i harâb olarak hâsılı harcına vefâ etmeyip ve bağçe-i mezkûrun dahi eşcârı mürûr-ı eyyâm ile telef ve zayif olacağı zâhir ve bedîdâr olup ol-vechile bekāsı sagīre-i mezbûre hakkında muzır ve gayr-ı müfîd olduğundan mâ‘adâ sagīre-i mezbûrenin nafaka ve kisveye dahi eşedd-i ihtiyâcı olmağla sagīre-i mezbûrenin menzil ve bağçe-i mezkûrda olan rub‘ hisse-i şâyi‘ası bedel-i misliyle bâ-re’y-i mütevellî âhara ferâğ ve bedeli ahz ü kabz birle i‘mâl ve istirbâh olunup hâsıl olan ribhiyle infâk ve iksâ olunmak sagīre-i mezbûre hakkında her vechile [69] enfa‘ ve evlâ olduğuna binâen işbu yedimde olup hâlâ kassâm-ı askerî fazîletlü Mehmed Emin Efendi ile Üçüncü Dâire-i Belediye taraflarından i‘tâ olunan memhûr bir kıt‘a tahmîn-i bedel pusulası mantûkunca sagīre-i mezbûrenin menzil ve bağçe-i mezkûrda olan rub‘ hisse-i şâyi‘ası bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla bin guruş mukābelesinde bâ-re’y-i mütevellî âhara ferâğa izin taleb şüd. Fî 3 Safer sene [1]301