Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 151 Hüküm no: 104 Orijinal metin no: [69-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bolu Gökçesu nâhiyesi Köprübaşı köyündeki Abdülhamid Sivâsî Camii’nin hatibi Öksüzoğlu Mustafa Efendi’nin görevini devretmek üzere Keleşoğlu Halil Efendi’yi vekil tayin etmesi Sıddık, nasb-ı vekîl Numara: 130, 40 guruş Vilâyet-i Anadolu’da Bolu nevâhîsinden Gökçesu nâhiyesine tâbi‘ Köprübaşı karyesi ahâlisinden olup mahmiye-i İstanbul’da Ayasofya-i Kebîr Câmi‘-i şerîfi Medresesi’nde sâkin zikri âtî cihetin bâ-berât-ı âlî sahîhan mutasarrıfı olduğu zeyl-i kitâbda muharrerü’l-esâmî Müslimîn ihbârlarıyla zâhir olan talebe-i ulûmdan Öksüzoğlu Mustafa Efendi b. Süleyman m. zikr olunan Köprübaşı karyesi ahâlisinden olup mahmiye-i mezbûrede Küçük Ayasofya Medresesi’nde sâkin talebe-i ulûmdan işbu bâ‘isü’l-kitâb Keleşoğlu Halil Efendi b. Halil mahzarında ikrâr ve takrîr-i kelâm edüp der-dest arzuhâle Cihât Kalemi’nden muhrec derkenâr mantûkunca nezâret-i Evkāf-ı Hümâyûn’a mülhak evkāfdan mârrü’z-zikr Köprübaşı karyesinde vâki‘ Abdülhamid Sivâsî -kuddise sırruhu’l-âlî- Câmi‘-i şerîfinde ber-vech-i hasbî hitâbet ciheti benim bâ-berât-ı âlî el-yevm uhdemde olup ancak ben Kal‘a-i Sultâniye’de tavattun murâdında olmamla ber-vech-i muharrer mutasarrıf olduğum cihet-i mezkûreyi mahâllinde erbâb-ı ehliyetden tâlibine huzûr-ı hâkimü’ş-şer‘de meccânen ferâğ ve kasr-ı yede ve husûs-ı mezkûr mütevakkıf olduğu umûrun küllîsine lede’l-iktizâ tarafından âharı tevkîle mezûn olmak üzere tarafımdan mûmâ-ileyh Halil Efendi’yi vekâlet-i mutlaka-i sahîha-i şer‘iye ile vekîl nasb ü ta‘yîn eyledim dedikde ol dahi vekâlet-i mezkûreyi kabûl etmeğin mâ-vaka‘a bi’t-taleb ketb olundu. Fî 12 Safer sene [1]301 Şühûdü’l-hâl: Talebe-i ulûmdan Mehmed Efendi b. Ömer, İbrahim Efendi b. İbrahim, Mehmed Efendi b. Hüseyin ve gayruhum.