Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 151 Hüküm no: 105 Orijinal metin no: [69-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sahhaf Hafız Ahmed Efendi ve daha sonra da kızı Feride Hanım’ın vefatlarıyla küçük kızlarına intikal eden ev hisselerinin satışına izin verilmesi Aziz Efendi, izin: 1 kıt‘a Numara: 121, 55,5 guruş Mahmiye-i İstanbul’da Sarıgez kurbünde Çıkrıkçı Kemaleddin mahallesinde sâkin iken bundan akdem vefât eden Sahhâf es-Seyyid Hafız Ahmed Efendi b. el-Hâc İbrahim’in sulbiye sagīre kızı Hamdiye’nin vâlidesi ve müteveffâ-yı mûmâ-ileyhin diğer kebîre kızı olup mu‘ahharan vefât eden Feride Hanım’ın sadriye sagīre kızı Emine Adalet’in dahi min-kıbeli’l-üm ceddesi ve tesviye-i emirlerine bâ-hüccet-i şer‘iye vasîyy-i mansûbeleri olup zâtı ta‘rîf-i şer‘î ile mu‘arrefe olan işbu bâ‘isetü’l-kitâb Şerife Zekiye Fıtnat Hanım bt. Mehmed Salih m. bi’l-vesâye takrîr-i kelâm ve ta‘bîr ani’l-merâm edüp nezâret-i Haremeyn-i Muhteremeyn’e mülhak evkāfdan merhûm Süleyman Paşa Vakfı musakkafâtından mahalle-i mezkûrede Kanlıçeşme sokağında vâki‘ ma‘lûmü’l-hudûd ve’l-müştemilât sekiz numara ile murakkam şehriye kırk beş akçe icâre-i müeccelelü bir bâb menzilin üç rub‘ hisse-i şâyi‘ası müteveffâ-yı evvel-i mezbûr es-Seyyid Hafız Ahmed Efendi’nin hayatında bâ-temessük-i mütevellî bi’l-icâreteyn taht-ı tasarrufunda olup ba‘de vefâtihî kızı sagīre-i mezbûre Hamdiye ve kebîre-i mezbûre Feride Hanım ile diğer sulbiye kebîre kızı Zehra Hanım’a islâsen ba‘de’l-intikāl mezbûre Feride Hanım’ın dahi mu‘ahharan fevtiyle rub‘ hissesi kızı sagīre-i mezbûre Emine Adalet’e hasbe’l-âde intikāl edüp lâkin menzil-i mezkûr ânen fe-ânen müşrif-i harâb olarak hâsılı harcına vefâ etmeyip bekāsı sagīretân-ı mezbûretân haklarında muzır ve gayr-ı müfîd olduğundan mâ‘adâ sagīretân-ı mezbûretânın nafaka ve kisveye dahi şiddet-i ihtiyâçları olmağla sagīretân-ı mezbûretânın menzil-i mezkûrda olan nısf hisse-i şâyi‘aları bedel-i misliyle bâ-re’y-i mütevellî âhara ferâğ ve bedeli ahz ü kabz birle i‘mâl ve istirbâh olunup hâsıl olan nemâsıyla infâk ve iksâ olunmak sagīretân-ı mezbûretân haklarında her vechile enfa‘ ve evlâ olduğuna binâen işbu yedimde olup hâlâ kassâm-ı askerî fazîletlü Mehmed Emin Efendi ile Üçüncü Dâire-i Belediye taraflarından i‘tâ olunan memhûr bir kıt‘a tahmîn-i bedel pusulası mantûkunca sagīretân-ı mezbûretânın menzil-i mezkûrda olan nısf hisse-i şâyi‘aları bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla üç bin elli guruş ve nef‘an li’l-yetîm zam olunan beş yüz elli guruş ki cem‘an üç bin altı yüz guruş mukābelesinde âhara ferâğa izin taleb şüd. Fî 11 Safer sene [1]301 [70] Şühûd[ü’l-hâl]: Karye Arabacılar kethudâsı Hüseyin Ağa b. Hasan, Evkāf-ı Hümâyûn münâdîlerinden Ahmed Efendi b. Hüseyin, Mehmed Ağa b. Mustafa, Ömer Ağa b. Abdulkadir ve gayruhum.