Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 153 Hüküm no: 106 Orijinal metin no: [70-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vasil v. Kosta’nın kızları Eleniko, Anaştaşya ve Espirpe’nin Espiro v. Anaştaş tarafından el konulan gedik âletleri hisselerini almak üzere Kostantin v. Tanaş’a vekâlet vermeleri Sıddık, isbât-ı vekâlet: 1 kıt‘a Numara: 128, 40 guruş Yanya vilâyetinde Leskovik sancağında Çarşuda karyesinde sâkineler Devlet-i Aliyye teba‘asının Rum milleti nisvânından Eleniko ve Anaştaşya ve Espirpe benât-ı el-müteveffâ Vasil v. Kosta taraflarından ber-vech-i âtî vekâlet iddi‘â eden teba‘a-i Devlet-i Aliyye’nin millet-i merkūmesinden işbu bâ‘isü’r-rakīm Kostantin v. Tanaş m. zikri âtî gedik âlâtı hissesine bi’l-emâne vâzı‘ü’l-yed olan teba‘a-i merkūmenin millet-i merkūmesinden Espiro v. Anaştaş muvâcehesinde üzerine da‘vâ ve takrîr-i kelâm edüp medîne-i Üsküdar’da Bülbülderesi nâm mahâlde vâki‘ ma‘lûmü’l-hudûd İslâm Bahçesi demekle ma‘rûf bir bâb bağçe derûnunda mevcûde Hudâvendigâr-ı esbak cennet-mekân Sultan Mahmud Hân-ı Sânî -tâbe serâhû- Hazretleri Evkāf-ı celîleleri müstegallâtından gedik ta‘bîr olunur yevmî altı akçe icâre-i müeccelelü âlât-ı lâzıme-i ma‘lûmenin nısf hisse-i şâyi‘asının altı sehm i‘tibârıyla üç sehm hisse-i şâyi‘ası gāibât-ı merkūmâtın bâ-temessük-i nizâm bi’l-icâreteyn taht-ı tasarrufunda ve merkūm Espiro üç sehm hisse-i şâyi‘a-i mezkûreye gāibât-ı merkūmâtın teslîmleriyle bi’l-emâne vâzı‘ü’l-yed olup ancak gāibât-ı merkūmât ber-vech-i muharrer mutasarrıf oldukları hisse-i şâyi‘a-i mezkûrelerini merkūmun yedinden nez‘ ü kabza ve ba‘de’l-kabz mahâllinde makbûzu olan otuz aded lira-yı Osmânî bedel mukābelesinde karye-i mezkûre ahâlisinden Hıristaki v. Kostanti’ye ferâğını memûru huzûrunda takrîre ve husûs-ı mezkûr mütevakkıf olduğu umûrun küllîsine yedimde olup sene-i sâbıkā Zilhicceti’ş-şerîfesinin yirmi sekizinci günü târihiyle müverraha zikr olunan Leskovik sancağı nâibi es-Seyyid Abdurrahim Efendi’nin imzâ ve hâtemini hâviye bir kıt‘a vekâlet hücceti ve zahrında muharrer livâ-i mezkûr Bidâyet Mahkemesi’nin memhûr mazbatası mantûklarınca mahkeme-i mezkûrede taraflarından beni gıyâbımda kabûlüme mevkūfe vekîl nasb ü ta‘yîn edüp haber-i vekâlet bana vâsıl oldukda ben dahi vekâlet-i mezkûreyi kabûl etmemle suâl olunup hisse-i şâyi‘a-i mezkûreden keff-i yed ve bana teslîme merkūm Espiro’ya tenbîh olunmak bi’l-vekâle murâdımdır dedikde gıbbe’s-suâl ol dahi cevâbında hisse-i şâyi‘a-i mezkûreye gāibât-ı merkūmâtın ber-vech-i muharrer bi’l-icâreteyn taht-ı tasarruflarında olup kendüsünün dahi gāibât-ı merkūmâtın teslîmleriyle bi’l-emâne vaz‘-ı yedini ikrâr mâ‘adâ müdde‘î-i merkūmun vekâlet müdde‘âsını ba‘de’l-inkâr hüccet ve mazbata-i mezkûrlar mütâla‘a olundukda hüccet-i mezkûrenin mührü mutâbık ve me‘âli vekâlet-i mezkûreyi beyândan ibâret idiği fetvâhâneden tahşiye ve temhîr kılındığı ve mazmûnu müdde‘î-i merkūmun takrîr-i meşrûhuna muvâfık bulunduğu ve mazbata-i mezkûre dahi mazmûn-ı hüccet-i mezkûreyi müeyyid ve musaddık olarak tezvîr ve tasnî‘den sâlim olduğu münfehim ve Mecelle-i Ahkâm-ı Adliye’nin bin sekiz yüz yirmi birinci mâddesi hükmünce bu makūle tezvîr ve tasnî‘den sâlim olan senedât-ı şer‘iyenin mazmûnuyla bilâ-beyyine amel ve hüküm câiz bulunmuş olmağla mûcebince müdde‘î-i merkūmun vekâletine ba‘de’l-hükm hisse-i şâyi‘a-i mezkûreden keff-i yed ve vekîl-i merkūm Kostantin’e teslîme merkūm Espiro’ya tenbîh olunmağın mâ-vaka‘a bi’t-taleb ketb olundu. Fî 12 Safer sene [1]301 Şühûdü’l-hâl: Mehmed Ağa b. Mustafa, Ömer Ağa b. Abdulkadir ve gayruhum.