Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 154 Hüküm no: 107 Orijinal metin no: [70-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İngiltere Devleti tebâsından Andon v. Haron’un ölümüyle küçük çocuklarına intikal eden arsanın bir bölümünün satışına izin verilmesi Kādızâde Mehmed, izin: 1 kıt‘a Numara: 88, 120 guruş Medîne-i Üsküdar’a muzâfe Kādı karyesinde Hamam sokağında sâkin iken bundan akdem vefât eden İngiltere Devleti teba‘asından Andon v. Haron’un sulbî sagīr oğlu teba‘a-i merkūmeden Firedik ve sulbiye sagīre kızı kezâlik teba‘a-i merkūme nisvânından İzaylo’nun tesviye-i umûruna devlet-i müşârün-ileyhâ konsoloshânesi tarafından vasî nasb olunup kıbel-i şer‘den dahi vesâyeti re’y olunan işbu bâ‘isü’r-rakīm zâtı ta‘rîf-i şer‘î ile mu‘arrefe Firensika bt. Firedik m. bi’l-vesâye takrîr-i kelâm edüp nezâret-i Evkāf-ı Hümâyûn’a mülhak evkāfdan Kars Muhâfızı Mehmed Sadık Paşa Vakfı müstegallâtından karye-i mezkûrede Cafer Ağa mahallesinde Kürur sokağında vâki‘ ma‘lûmü’l-hudûd şehriye yüz yirmi yedi akçe icârelü dokuz yüz seksen zirâ‘ bir kıt‘a arsanın sülüsân hissesi sagīrân-ı mezbûrânın bâ-sened-i hâkānî bi’l-icâreteyn taht-ı tasarruflarında olup lâkin arsa-i mezkûre bî-hâsıl ve etrâfını muhît taş duvarları mürûr-ı zaman ile münhedim olarak enkāzı telef ve zâyi‘ olacağı zâhir ve bedîdâr olup ol-vechile bekāsı sagīrân-ı mezbûrân haklarında muzır ve gayr-ı müfîd olduğundan mâ‘adâ sagīrân-ı mezbûrânın nafaka ve kisveye dahi kemâl-i zarûretleri olmağla sagīrân-ı mezbûrânın arsa-i mezkûrede olan sülüsân hisselerinden ancak yüz altmış zirâ‘ mahâllini benim tasarrufumda olan sülüs hissesinin yalnız altmış zirâ‘ mahâlli ile ma‘an bi’l-ifrâz bedel-i misliyle bâ-re’y-i mütevellî âhara ferâğ ve bedeli ahz ü kabz birle i‘mâl ve istirbâh olunup hâsıl olan nemâsıyla infâk ve iksâ olunmak sagīrân-ı mezbûrân haklarında her vechile enfa‘ ve evlâ olduğuna binâen işbu yedimde olup konsoloshâne-i mezkûr [71] tarafından bi’l-i‘tâ Hâriciye Nezâret-i celîlesi tarafından tasdîk olunan bir kıt‘a takrîr mûcebince sagīrân-ı mezbûrânın arsa-i mezkûrede olan sülüsân hisselerinden ancak yüz altmış zirâ‘ mahâllini bedel-i misli olan sekiz bin guruş mukābelesinde bâ-re’y-i mütevellî âhara ferâğa izin taleb şüd. Fî 25 Muharrem sene [1]301 Şühûdü’l-hâl: Eyüb Mahkemesi muhzırlarından es-Seyyid el-Hâc Nuri Ağa b. el-Hâc Üveys, Ketebeden İbrahim Efendi b. İbrahim Edhem ve gayruhum.