Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 155 Hüküm no: 108 Orijinal metin no: [71-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nalıncı Mahmud Menâzili Vakfı mütevellisi Selime Hanım’ın Mehmed Efendi’deki alacağı ile vakfın hasılatını tahsil etmek üzere Hüsnü Efendi’ye vekâlet vermesi Cemal Efendi, vekâlet: 1 kıt‘a Numara: 79, 40 guruş Nezâret-i Evkāf-ı Hümâyûn’a mülhak evkāfdan İstanbul’da Hacı Hasan mahallesinde vâki‘ Na‘lıncı el-Hâc Mahmud Menâzili Vakfı’nın ber-vech-i meşrûta bâ-berât-ı âlî mütevelliyesi olan mahrûse-i Bursa’da Veled-i Yaniç mahallesinde sâkine Selime Hanım bt. el-Hâc Yusuf b. Abdullah tarafından ber-vech-i âtî vekâlet iddi‘â eden Mâliye Hazîne-i celîlesi muhâsebe hulefâsından izzetlü Hüsnü Efendi b. el-Hâc Salih m. Şehzâde Câmi‘-i şerîfi hademelerinden Mehmed Efendi b. Ahmed muvâcehesinde üzerine da‘vâ ve takrîr-i kelâm edüp gāibe-i mütevelliye-i mezbûrenin mûmâ-ileyh Mehmed Efendi zimmetinde cihet-i karz-ı şer‘îden elli guruş alacak hakkı olmağla meblağ-ı mezkûru mûmâ-ileyh Mehmed Efendi’den taleb ve da‘vâ ve vakf-ı mezkûrun hâsılâtını meblağ-ı merkūm elli guruş ile ma‘an ahz ü kabz ve mesârifât-ı mu‘tâdesini i‘tâya ve muhâsebesini Hazîne-i Evkāf’da memûru ma‘rifetiyle rü’yete ve fazlasını kendüye irsâl ve îsâle ve husûs-ı mezkûr mütevakkıf olduğu umûrun küllîsine yedimde olup sene-i sâbıkā Zilhicceti’ş-şerîfesinin yirmi beşinci günü târihiyle müverraha mahrûse-i mezkûre nâibi fazîletlü es-Seyyid Mustafa Faik Efendi’nin imzâ ve hâtemini hâviye bir kıt‘a vekâlet hücceti ve zahrında muharrer mahrûse-i mezkûre İstînâf Mahkemesi’nin mazbatası mantûkunca mahkeme-i mezbûrede nâib-i mûmâ-ileyh huzûrunda tarafından beni gıyâbımda kabûlüme mevkūfe vekâlet-i mutlaka-i sahîha-i şer‘iye ile vekîl nasb ü ta‘yîn edüp haber-i vekâlet bana vâsıl oldukda ben dahi vekâlet-i mezkûreyi kabûl etmemle suâl olunup meblağ-ı mezkûr elli guruşu bana teslîme mûmâ-ileyh Mehmed Efendi’ye tenbîh olunmak matlûbumdur dedikde gıbbe’s-suâl ol dahi cevâbında mütevelliye-i gāibe-i mûmâ-ileyhâya cihet-i karzdan zimmetinde ol-mikdâr guruş deyni olduğunu tâyi‘an ikrâr ü i‘tirâf edip mâ‘adâ müdde‘î-i mûmâ-ileyhin ber-vech-i muharrer vekâlet müdde‘âsını ba‘de’l-inkâr hüccet ve mazbata-i mezkûrlar mütâla‘a olundukda hüccet-i mezkûrenin mührü mutâbık ve me‘âli vekâlet-i mezkûreyi beyândan ibâret idiği fetvâhâne-i celîleden tahşiye ve temhîr olunduğuna ve me‘âli müdde‘î-i mûmâ-ileyhin takrîr-i meşrûhuna mutâbık ve mazbata-i mezkûre dahi hüccet-i mezkûreyi müeyyid ve musaddık bulunduğuna binâen hüccet-i mezkûrenin tezvîr ve tasnî‘den sâlim olduğu münfehim ve Mecelle-i Ahkâm-ı Adliye’nin bin sekiz yüz yirmi birinci mâddesi mûcebince müdde‘î-i mûmâ-ileyh Hasan Efendi’nin minvâl-i meşrûh üzere olan vekâletine ba‘de’l-hükm meblağ-ı mezkûr elli guruşu müvekkilesi gāibe-i mûmâ-ileyhâ içün vekîl-i mûmâ-ileyh Hüsnü Efendi’ye edâya mezbûr Mehmed Efendi’ye tenbîh olunmağın mâ-vaka‘a bi’t-taleb ketb olundu. Fî 20 Muharrem sene [1]301 Şühûdü’l-hâl: Mehmed Ağa b. Mustafa, Ömer Ağa b. Kadri ve gayruhum.