Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 156 Hüküm no: 109 Orijinal metin no: [71-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Durmuşoğlu Yordan’ın Tellioğlu Atnaş tarafından el konulan dükkân ve gedik âletlerini almak üzere Andernikos v. Haci Yordan’a vekâlet vermesi Hocazâde Ali Rıza, vekâlet Numara: 147, 40 guruş Medîne-i Samsun’da Said Bey mahallesinde sâkin Devlet-i Aliyye teba‘asının Rum milletinden Duhân Tüccârı? Durmuşoğlu Yordan v. Efrem v. Atam tarafından ber-vech-i âtî vekâlet iddi‘â eden duhânî esnâfından işbu bâ‘isü’r-rakīm Andernikos v. Haci Yordan m. zikri âtî dükkân ve gedik âlâtına bi’l-emâne vaz‘-ı yedi mütehakkık olan teba‘a-i Devlet-i Aliyye’den ve millet-i merkūmeden ve tüccârdan Tellioğlu Atnaş v. Anaştaş muvâcehesinde takrîr-i kelâm ve ta‘bîr ani’l-merâm edüp nezâret-i Evkāf-ı Hümâyûn’a mülhak evkāfdan merhûm Rüstempaşa Vakfı musakkafâtından mahmiye-i İstanbul’da Tahte’l-kal‘a kurbünde vâkıf-ı müşârün-ileyhin câmi‘-i şerîfi zîrinde vâki‘ ma‘lûmü’l-hudûd beher şehr yüz yirmi akçe icâre-i müeccelelü bir bâb bakkāl dükkânı ile derûnunda mevcûde cennet-mekân Sultan Mahmud Hân-ı Sânî -tâbe serâhû- Hazretleri Evkāf-ı celîleleri müstegallâtından beyne’l-esnâf bakkāl gediği ta‘bîr olunur yevmî sekiz akçe icâre-i müeccelelü âlât-ı lâzıme-i ma‘lûmeden herbiri gāib-i merkūmun bâ-temessük-i mütevellî ve nizâm bi’l-icâreteyn taht-ı tasarrufunda ve merkūm Atnaş dükkân ve âlât-ı gedik-i mezkûrlara gāib-i merkūmun teslîmiyle bi’l-emâne vâzı‘ü’l-yed olup ancak gāib-i merkūm Yordan dükkân ve âlât-ı gedik-i mezkûrları merkūmun yedinden nez‘ ü kabza ve ba‘de’l-kabz ecr-i misliyle âhara îcâra ve tâlibi zuhûrunda bedel-i misliyle bâ-re’y-i mütevellî âhara ferâğa ve ücret ve bedelini ahz [72] u kabza ve makbûzumu kendüye irsâl ve îsâle ve husûs-ı mezkûr mütevakkıf olduğu umûrun küllîsine yedimde olup işbu sene-i mübâreke Muharremi’l-harâmının yirmi yedinci günü târihiyle müverraha medîne-i mezkûre nâibi Hüseyin Rüşdü Efendi’nin imzâ ve hâtemini hâviye bir kıt‘a vekâlet hücceti ve hüccet-i mezkûre zahrında muharrer medîne-i mezkûre Bidâyet Mahkemesi’nin memhûr mazbatası mantûklarınca mahkeme-i mezkûrede nâib-i mûmâ-ileyh huzûrunda tarafından beni gıyâbımda kabûlüme mevkūfe vekâlet-i âmme-i mutlaka-i sahîha-i şer‘iye ile vekîl nasb ü ta‘yîn edüp haber-i vekâlet bana vâsıl oldukda ben dahi vekâlet-i mezkûreyi kabûl etmemle suâl olunup dükkân ve âlât-ı gedik-i mezkûrlardan keff-i yed ve bana teslîme merkūm Atnaş’a tenbîh olunmak bi’l-vekâle matlûbumdur dedikde gıbbe’s-suâl merkūm Atnaş dahi cevâbında dükkân ve âlât-ı gedik-i mezkûrlar gāib-i merkūmun ber-minvâl-i muharrer taht-ı tasarrufunda olup kendüsü dahi bi’l-emâne vâzı‘ü’l-yed olduğunu ikrâr mâ‘adâ müdde‘î vekîl-i merkūmun ber-vech-i muharrer vekâlet müdde‘âsını inkâr hüccet ve mazbata-i mezkûrlar lede’l-mütâla‘a hüccet-i mezkûrenin mührü mutâbık ve me‘âli vekâlet-i mezkûreyi beyândan ibâret idiği cânib-i fetvâhâneden tahşiye ve temhîr olunduğu ve mazmûnu müdde‘î vekîl-i merkūm Andernikos’un takrîr-i meşrûhuna muvâfık bulunduğu ve mazbata-i mezkûrenin mazmûnu dahi hüccet-i mezkûreyi müeyyid ve musaddık olarak şübhe-i tezvîr ve tasnî‘den sâlim olduğu münfehim ve Mecelle-i Ahkâm-ı Adliye’nin bin sekiz yüz yirmi birinci mâddesi mûcebince bu makūle tezvîr ve tasnî‘den sâlim olan senedât-ı şer‘iyenin mazmûnuyla bilâ-beyyine amel ve hüküm câiz olmağla mûcebince müdde‘î-i merkūmun vekâletine ba‘de’l-hükm dükkân [ve] âlât-ı gedik-i mezkûrlardan keff-i yed ve müdde‘î vekîl-i merkūm Andernikos’a teslîme merkūm Atnaş’a tenbîh olunmağın mâ-vaka‘a bi’t-taleb ketb olundu. Fî 13 Safer sene [1]301 Şühûdü’l-hâl: Mehmed Ağa b. Mustafa, Ömer Ağa b. Kadri ve gayruhum.