Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 157 Hüküm no: 110 Orijinal metin no: [72-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Maliye Hazinesi Sergi Odası Mümeyyizi Ali Rıza Efendi’nin vefatıyla reşid olmayan oğlu Mustafa’ya intikal eden ev hissesinin satışına izin verilmesi Küçük Aziz, izin Numara: 151, harcı: 90 guruş Mahmiye-i İstanbul’da Kumkapı kurbünde Sarrâc İshak mahallesinde sâkin iken bundan akdem vefât eden Mâliye Hazîne-i celîlesinde Sergi Odası mümeyyizi Ali Rıza Efendi’nin sulbî kebîr oğlu gayr-ı reşîd Mustafa’nın üveyi hemşîresi ve tesviye-i umûruna bâ-hüccet-i şer‘iye vasîyy-i mansûbesi zâtı ta‘rîf-i şer‘î ile mu‘arrefe işbu bâ‘isetü’l-vesîka Hadice Hanım bt. İsmail m. bi’l-vesâye takrîr-i kelâm edüp nezâret-i Evkāf-ı Hümâyûn’a mülhak evkāfdan merhûm Sarrâc İshak nâm sâhibü’l-hayrın vakfı musakkafâtından mahalle-i mezbûrede Câmi‘-i şerîf sokağında on dokuz numara ile murakkam ma‘lûmü’l-hudûd ve’l-müştemilât beher şehr otuz akçe icâre-i müeccelelü bir bâb menzilin üç rub‘ hisse-i şâyi‘ası müteveffâ-yı mûmâ-ileyhin hayatında bâ-temessük-i mütevellî bi’l-icâreteyn taht-ı tasarrufunda olup ba‘de vefâtihî gayr-ı reşîd mezbûra hasbe’l-âde intikāl edüp lâkin menzil-i mezkûr ânen fe-ânen müşrif-i harâb olarak hâsılı harcına vefâ etmeyip bekāsı gayr-ı reşîd mezbûre hakkında muzır ve gayr-ı müfîd olduğundan mâ‘adâ gayr-ı reşîd-i mezbûrun nafaka ve kisveye dahi eşedd-i ihtiyâcı olmağla gayr-ı reşîd-i mezbûrun menzil-i mezkûrda olan üç rub‘ hisse-i şâyi‘ası bedel-i misliyle bâ-re’y-i mütevellî âhara ferâğa ve bedeli ahz ü kabz birle i‘mâl ve istirbâh olunup hâsıl olan ribhiyle infâk ve iksâ olunmak gayr-ı reşîd-i mezbûr hakkında her vechile enfa‘ ve evlâ olduğuna binâen işbu yedimde olup hâlâ kassâm-ı askerî fazîletlü Mehmed Emin Efendi ile Üçüncü Dâire-i Belediye taraflarından i‘tâ olunan memhûr bir kıt‘a tahmîn-i bedel pusulası mantûkunca gayr-ı reşîd-i mezbûrun menzil-i mezkûrda olan üç rub‘ hisse-i şâyi‘ası bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla altı bin guruş mukābelesinde âhara ferâğa izin taleb şüd. Fî 22 Safer sene [1]301 Şühûdü’l-hâl: Mehmed Ağa b. Mustafa, Ömer Ağa b. Kadri ve gayruhum.