Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 158 Hüküm no: 111 Orijinal metin no: [73-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aranik Kadın’ın ölümüyle küçük çocuklarına intikal eden oda gediği hisselerinin satışına izin verilmesi Nazmi, izin Numara: 154, 82,5 guruş Mahmiye-i İstanbul’da Langa kurbünde Musalla civârında Şeyh Ferhad mahallesinde sâkine iken bundan akdem vefât eden Devlet-i Aliyye teba‘asının Ermeni milleti nisvânından Aranik Kadın bt. Bedros’un sadrî sagīr oğlu Bedros ve sadriye sagīre kızı Sorebik’in babası ve velîsi olup mu‘temedü’l-hâl idiği ihbâr olunan işbu bâ‘isü’r-rakīm Papasyan Kigork v. Papa Aram m. bi’l-velâye takrîr-i kelâm ve ta‘bîr ani’l-merâm edüp Hudâvendigâr-ı esbak cennet-mekân Sultan Selim Hân-ı Sâlis -tâbe serâhû- Hazretlerinin evkāf-ı celîleleri müstegallâtından Çakma[k]çılar Yokuşu’nda Sünbüllü Han demekle ma‘rûf hanın alt katında üç numara ile murakkam ma‘lûmü’l-hudûd bir bâb oda derûnunda mevcûde beher şehr otuz akçe icâre-i müeccelelü oda gediği ta‘bîr olunur âlât-ı lâzıme-i ma‘lûmeden yüz yirmi sehm i‘tibârıyla on iki sehm hisse-i şâyi‘ası vâlidesi olup kendüden evvel vefât eden Serepohi intikālinden âdiyen otuz iki sehmi dahi tefevvüzen ki cem‘an kırk dört sehm hisse-i şâyi‘ası müteveffât-ı merkūme Aranik’in hayatında bi’l-icâreteyn taht-ı tasarrufunda olup ba‘de vefâtihî sagīrân-ı merkūmâna hasbe’l-âde münâsafeten [intikāl edip] lâkin gedik-i mezkûrun âlâtı mürûr-ı eyyâm ile telef ve zâyi‘ olacağı zâhir ve bedîdâr olup bekāsı sagīrân-ı merkūmân haklarında muzır ve gayr-ı müfîd olduğundan mâ‘adâ sagīrân-ı merkūmânın anaları müteveffât-ı merkūmeden mevrûs aslâ mâlı olmayıp ben dahi mu‘sir olarak infâk ve iksâya gayr-ı muktedir olmamla sagīrân-ı merkūmânın âlât-ı gedik-i mezkûrda olan kırk dört sehm hisse-i şâyi‘aları bedel-i misliyle bâ-re’y-i mütevellî âhara ferâğ ve bedeli ahz ü kabz birle i‘mâl ve istirbâh olunup hâsıl olan nemâsıyla infâk ve iksâ olunmak sagīrân-ı merkūmân haklarında her vechile enfa‘ ve evlâ olduğuna binâen işbu yedimde olup hâlâ kassâm-ı askerî fazîletlü Mehmed Emin Efendi ile Birinci Dâire-i Belediye taraflarından i‘tâ olunan memhûr bir kıt‘a tahmîn-i bedel pusulası mantûkunca sagīrân-ı merkūmânın âlât-ı gedik-i mezkûrda olan kırk dört sehm hisse-i şâyi‘ası bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla beş bin beş yüz guruş mukābelesinde âhara ferâğa izin taleb şüd. Fî 22 Safer sene [1]301 Şühûdü’l-hâl: Ömer Ağa b. Abdulkadir, Bayram Ağa b. Abdullah ve gayruhum.