Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 159 Hüküm no: 112 Orijinal metin no: [73-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil Efendi’nin vefatıyla küçük çocukları Reşad ve Said Beylere intikal eden ev hisselerinin satışına izin verilmesi Küçük Hakkı ve İzzet, izin: 1 kıt‘a Numara: 150, 34,5 guruş Mahmiye-i İstanbul’da Cellâd çeşmesi kurbünde Abdullah Ağa mahallesinde sâkin iken bundan akdem vefât eden Halil Efendi b. Abdullah’ın sulbî sagīr oğulları Reşad ve Said Beylerin vâlideleri ve tesviye-i emrlerine bâ-hüccet-i şer‘iye vasîyy-i mansûbeleri zâtı ta‘rîf-i şer‘î ile mu‘arrefe işbu bâ‘isetü’l-vesîka Nazime Hanım bt. Tâhir Paşa m. bi’l-vesâye takrîr-i kelâm edüp nezâret-i Evkāf-ı Hümâyûn’a mülhak evkāfdan İbrahim Paşa kethudâsı merhûm Mehmed Kethudâ Vakfı musakkafâtından mahalle-i mezbûrede Arablar sokağında on bir numara ile murakkam ma‘lûmü’l-hudûd ve’l-müştemilât senevî yetmiş beş akçe icâre-i müeccelelü bir bâb menzilin nısf hisse-i şâyi‘ası müteveffâ-yı mezbûrun hayatında bâ-temessük-i mütevellî bi’l-icâreteyn taht-ı tasarrufunda olup ba‘de vefâtihî sagīrân-ı mezbûrâna hasbe’l-âde intikāl edüp ancak menzil-i mezkûr ânen fe-ânen müşrif-i harâb olarak hâsılı harcına vefâ etmeyip bekāsı sagīrân-ı mezbûrân haklarında muzır ve gayr-ı müfîd olduğundan mâ‘adâ sagīrân-ı mezbûrânın nafaka ve kisveye dahi eşedd-i ihtiyâçları olmağla sagīrân-ı mezbûrânın menzil-i mezkûrda olan nısf hisse-i şâyi‘aları bedel-i misliyle bâ-re’y-i mütevellî âhara ferâğ ve bedeli ahz ü kabz birle i‘mâl ve istirbâh olunup hâsıl olan ribhiyle infâk ve iksâ olunmak sagīrân-ı mezbûrân haklarında her vechile enfa‘ ve evlâ olduğuna binâen işbu yedimde olup hâlâ kassâm-ı askerî fazîletlü Mehmed Emin Efendi ile Birinci Dâire-i Belediye taraflarından i‘tâ olunan memhûr bir kıt‘a tahmîn-i bedel pusulası mantûkunca sagīrân-ı mezbûrânın menzil-i mezkûrda olan nısf hisse-i şâyi‘aları bundan akdem lede’l-müzâyede ve ba‘de’l-keşf el-yevm bedel-i misli idiği [74] bi’l-ihbâr zâhir olan lira-yı Osmânî yüz guruş hesâbıyla iki bin üç yüz guruş mukābelesinde âhara ferâğa izin taleb şüd. Fî 19 Safer sene [1]301 Şühûdü’l-hâl: Ömer Ağa b. Kadri, Mehmed Ağa b. Mustafa ve gayruhum.