Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 160 Hüküm no: 113 Orijinal metin no: [74-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Salih Efendi’nin vefatıyla küçük oğlu Mehmed Tâhir ile reşid olmayan kızı Hatice’ye intikal eden ev hisselerinin satışına izin verilmesi Mehmed Necib, izin Numara: 144, 76 guruş Mahmiye-i İstanbul’da Kadırga Limanı kurbünde Bostânî Ali mahallesinde sâkin iken bundan akdem vefât eden Mehmed Salih Efendi b. Mehmed’in sulbî sagīr oğlu Mehmed Tâhir ve sulbiye kebîre kızı gayr-ı reşîde Hadice’nin enişteleri vetesviye-i emirlerine bâ-hüccet-i şer‘iye vasîyy-i mansûbları işbu bâ‘isü’l-kitâb Aziz Efendi b. Süleyman m. bi’l-vesâye takrîr-i kelâm edüp nezâret-i Evkāf-ı Hümâyûn’a mülhak evkāfdan Surre-i Hümâyûn emîni esbak merhûm el-Hâc Ömer Ağa Vakfı musakkafâtından mahalle-i mezbûrede Silahdâr Ağa Mektebi caddesinde otuz üç numara ile murakkam ma‘lûmü’l-hudûd ve’l-müştemilât şehriye altmış akçe icâre-i müeccelelü bir bâb kârgîr menzilin üç rub‘ hisse-i şâyi‘ası müteveffâ-yı mezbûrun hayatında bâ-temessük-i mütevellî bi’l-icâreteyn taht-ı tasarrufunda olup ba‘de vefâtihî sagīr ve gayr-ı reşîde-i mezbûrân ile sulbî kebîr oğlu Mustafa Mahir ve sulbiye kebîre kızları Âişe ve Habibe ve Hûriye hanımlara hasbe’l-âde isdâsen intikāl edüp lâkin menzil-i mezkûr ânen fe-ânen müşrif-i harâb olarak hâsılı harcına vefâ etmeyip bekāsı sagīr ve gayr-ı reşîde-i mezbûrân [haklarında] muzır ve gayr-ı müfîd olduğundan mâ‘adâ sagīr ve gayr-ı reşîde-i mezbûrânın nafaka ve kisveye dahi eşedd-i ihtiyâçları olmağla sagīr ve gayr-ı reşîde-i mezbûrânın menzil-i mezkûrda olan hisse-i şâyi‘aları bedel-i misliyle bâ-re’y-i mütevellî âhara ferâğ ve bedeli ahz ü kabz birle i‘mâl ve istirbâh olunup hâsıl olan nemâsıyla infâk ve iksâ olunmak sagīr ve gayr-ı reşîde-i mezbûrânın haklarında her vechile enfa‘ ve evlâ olduğuna binâen işbu yedimde olup hâlâ kassâm-ı askerî fazîletlü Mehmed Emin Efendi ile Birinci Dâire-i Belediye taraflarından i‘tâ olunan memhûr bir kıt‘a tahmîn-i bedel pusulası mantûkunca sagīr ve gayr-ı reşîde-i mezbûrânın menzil-i mezkûrda olan iki südüs hisse-i şâyi‘aları bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla beş bin guruş ve nef‘an zam olunan yirmi beş guruş ki cem‘an beş bin yirmi beş guruş mukābelesinde âhara ferâğa izin taleb şüd. Fî 19 Safer sene [1]301 Şühûdü’l-hâl: ( )