Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 161 Hüküm no: 114 Orijinal metin no: [74-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Salih Efendi’nin vefatıyla küçük oğlu Mehmed Tâhir ile reşid olmayan kızı Hatice’ye intikal eden evler ile bahçe hisselerinin satışına izin verilmesi İbrahim, izin Numara: 145, 45 guruş Mahmiye-i İstanbul’da Kadırga Limanı kurbünde Bostânî Ali mahallesinde sâkin iken bundan akdem vefât eden el-Hâc Mehmed Salih Efendi b. Mehmed’in sulbî sagīr oğlu Mehmed Tâhir ve sulbiye kebîre kızı gayr-ı reşîde Hadice’nin enişteleri vetesviye-i emrlerine bâ-hüccet-i şer‘iye vasîyy-i mansûbları Mâliye Hazîne-i celîlesi Eshâm Umûmiye ketebesinden işbu bâ‘isü’l-kitâb Aziz Efendi b. Süleyman m. bi’l-vesâye takrîr-i kelâm edüp nezâret-i Haremeyn-i Muhteremeyn’e mülhak evkāfdan Vezir-i a‘zam-ı esbak merhûm Cerrâh Paşa Vakfı musakkafâtından mahmiye-i mezbûrede Ma‘cûnîkasım kurbünde Sarı Nasuh mahallesinde tarîk-i âmda on yedi numara ile murakkam diğer bir bâb menzil ve bağçeden herbiri müteveffâ-yı mezbûrun hayatında bi’l-icâreteyn taht-ı tasarrufunda olup ba‘de vefâtihî sagīr ve gayr-ı reşîde-i mezbûrân ile sulbî kebîr oğlu Mustafa Mahir ve sulbiye kebîre kızları Âişe ve Habibe ve Hûriye hanımlara hasbe’l-âde isdâsen intikāl edüp lâkin menâzil ve bağçe-i mezkûrlardan evlâd-ı kibâr-ı mezbûrûn hisse-i şâyi‘alarını âhara ferâğ murâd eylediklerinde sagīr ve gayr-ı reşîde-i mezbûrânın hisselerinin intifâ‘ ve birer sûretde tefrîki kābil olmadığından mâ‘adâ sagīr ve gayr-ı reşîde-i mezbûrânın nafaka ve kisveye dahi eşedd-i ihtiyâçları olmağla menâzil ve bağçe-i mezkûrlardan sagīr ve gayr-ı reşîde-i mezbûrânın hisseleri kibâr-ı mezbûrûnun hisseleriyle ma‘an bedel-i misilleri ve mütevellîleri re’yleriyle âhara ferâğ ve bedelleri ahz ü kabz birle i‘mâl ve istirbâh olunup hâsıl olan nemâsıyla infâk ve iksâ olunmak sagīr ve gayr-ı reşîde-i mezbûrânın haklarında her vechile [75] enfa‘ ve evlâ olduğuna binâen işbu yedimde olup hâlâ kassâm-ı askerî fazîletlü Mehmed Emin Efendi ile Üçüncü Dâire-i Belediye taraflarından i‘tâ olunan memhûr bir kıt‘a tahmîn-i bedel pusulası mantûkunca sagīr ve gayr-ı reşîde-i mezbûrânın mârrü’l-beyân altı ve sekiz numaralı menzileyn ve bağçe-i mezkûrlardan iki südüs hisse-i şâyi‘aları lira-yı Osmânî yüz guruş hesâbıyla iki bin altı yüz altmış beş ve on yedi numaralı diğer menzil ve bağçe-i mezkûrlardan iki südüs hisse-i şâyi‘aları yine lira-yı Osmânî yüz guruş hesâbıyla üç yüz otuz beş ve nef‘an li’s-sagīr zam olunan yüz otuz dört guruş ki cem‘an üç bin yüz otuz dört guruş mukābelesinde âhara ferâğa izin taleb şüd. Fî 19 Safer sene [1]301 Şühûdü’l-hâl: ( )