Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 162 Hüküm no: 115 Orijinal metin no: [75-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mısırlı Esirci Mehmed Ağa’dan küçük kızı Ayşe’ye kalan evin satılmasına izin verilmesi Yusuf Cemal, izin: 1 kıt‘a Numara: 231 Mahmiye-i İstanbul’da Ebulfeth Sultan Mehmed Han -tâbe serâhû- hazretleri câmi‘-i şerîfi kurbünde Harâccı Muhyiddin mahallesinde sâkin iken bundan akdem vefât eden Mısırlı Esirci Mehmed Ağa b. Hüseyin’in sulbiye sagīre kızı Âişe’nin vâlidesi ve tesviye-i umûruna bâ-hüccet-i şer‘iye vasîyy-i mansûbesi olup zâtı Fatih’de sâkin esirci esnâfından Salim Ağa b. Bekir ve Kısmet-i askeriye muhzırânından Mehmed Ali Ağa b. Hüseyin ta‘rîfleriyle mu‘arrefe olan işbu bâ‘isetü’l-vesîka Nursaç Hanım bt. Abdullah bi’l-vesâye takrîr-i kelâm ve ta‘bîr ani’l-merâm edüp Hazîne-i evkāf-ı hümâyûna mülhak evkāfdan cennet-mekân Sultan Mehmed Han -tâbe serâhû- hazretleri evkāf-ı şerîfeleri müsakkafâtından mahalle-i mezkûrede Han sokağında vâki‘ on dört numara ile murakkam ma‘lûmü’l-hudûd ve’l-müştemilât şehriye yirmi akçe icâre-i mu‘accelelü bir bâb menzil, müteveffâ-yı mezbûrun hayatında bâ-temessük-i mütevellî bi’l-icâreteyn taht-ı tasarrufunda olup ba‘de vefâtihîsagīre-i mezbûreye âdiyen intikāl edüp lâkin menzil-i mezkûr ânen fe-ânen müşrif-i harâb olarak hâsılı harcına vefâ etmeyip bekāsı sagīre-i mezbûre hakkında muzır ve gayr-ı müfîd olduğundan mâ‘adâ sagīre-i mezbûrenin nafaka ve kisveye dahi eşedd-i ihtiyâcı olmağla sagīre-i mezbûrenin menzil-i mezkûru bedel-i misliyle bâ-re’y-i mütevellî âhara ferâğ ve bedeli ahz ü kabz birle i‘mâl ve istirbâh olunup hâsıl olan ribhiyle infâk ve iksâ olunmak sagīre-i mezbûre hakkında her vechile enfa‘ ve evlâ olduğuna binâen işbu yedimde olan hâlâ kassâm-ı askerî fazîletlü Mehmed Emin Efendi ile İkinci Dâire-i Belediye tarafından i‘tâ olunan memhûr bir kıt‘a tahmîn-i bedel pusulası mantûkunca sagīre-i mezbûrenin menzil-i mezkûru bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla on beş bin guruş mukābelesinde âhara ferâğa izin taleb şüd. Fî 12 Safer sene [1]301 Şühûdü’l-hâl: Esirci esnâfından Salim Ağa b. Bekir, Kısmet-i askeriye muhzırânından Mehmed Ali Ağa b. Hüseyin ve gayruhum. [76] Karşıki sahîfede tahrîr olunan izin hüccetinin hâmişi Derûn-ı hüccetde bast ü beyân olunduğu üzere vasîyy-i mezbûre Nursaç Hanım sagīre-i mezbûrenin menzil-i mezkûrunu bedel-i misli olduğu mütehakkık olan lira-yı Osmânî yüz guruş hesâbıyla on beş bin guruş mukābelesinde Muhzır Hasan Ağa b. Abdüllatif’e ol dahi der-akab meblağ-ı mezkûr mukābelesinden vasîyy-i mezbûre Nursaç Hanım’a bâ-re’y-i mütevellî kat‘iyyen ba‘de’l-ferâğ vasîyy-i mezbûre Nursaç Hanım kızı sagīre-i mezbûrenin mâlından ve li-ecli’l-idâne vasî nasb olunan mezbûr Hasan Ağa’nın yedinden istidâne ve kabz ve umûruna sarfla istihlâk eylediği lira-yı Osmânî yüz guruş hesâbıyla on beş bin guruş deyni mukābelesinde menzil-i mezkûru sagīre-i mezbûreye bâ-re’y-i mütevellî vefâen ferâğ edeceğinden Senedât-ı Umûmiye İdâresi’nde ol-vechile ferâğları icrâ ve sened-i hâkānîsi i‘tâ olunmak üzere işbu mahalle şerh verildi. Fî 12 Safer sene [1]301