Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 163 Hüküm no: 116 Orijinal metin no: [75-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Tüfenk Kundakçısı İbrahim Ağa’dan çocuklarına kalan ev ve bahçenin satılmasına izin verilmesi Küçük İbrahim, izin: kıt‘a Numara: 138, 60 guruş Mahmiye-i İstanbul’da Süleymaniye kurbünde Suhte Hatib Muhyiddin mahallesinde sâkin iken bundan akdem vefât eden Tüfenk Kundakçısı İbrahim Ağa b. Ahmed’in sulbî sagīr oğlu Mustafa ve sulbiye sagīre kızı Behiye’nin vâlideleri ve tesviye-i emirlerine bâ-hüccet-i şer‘iye vasîyy-i mansûbeleri olup zâtı ta‘rîf-i şer‘î ile mu‘arrefe işbu bâ‘isetü’l-kitâb Emine Hanım bt. Abdullah bi’l-vesâye takrîr-i kelâm edüp Nezâret-i evkāf-ı hümâyûna mülhak evkāfdan Neslişah Sultan Câmi‘-i şerîfi Vakfı müsakkafâtından mahalle-i mezbûrede Sâ‘atçi sokağında vâki‘ yirmi üç numara ile murakkam ma‘lûmü’l-hudûd ve’l-müştemilât şehriye kırk beş akçe icâre-i müeccelelü bir bâb menzil ma‘a bağçe müteveffâ-yı mezbûrun hayatında bâ-temessük-i mütevellî bi’l-icâreteyn taht-ı tasarrufunda olup ba‘de vefâtihî sagīrân-ı mezbûrân ile sulbiye kebîre kızları Servet ve Vasfiye hanımlara ve diğer sulbî sagīr oğlu Ahmed’e hasbe’l-âde ihmâsen ba‘de’l-intikāl kable’t-tahrîr sagīr-i mezbûr Ahmed’in dahi mu‘ahharan vefâtıyla hums hissesi mahlûl ve cânib-i vakf-ı şerîfe âid ve râci‘ olup lâkin menzil-i mezkûr ânen fe-ânen müşrif-i harâb olarak hâsılı harcına vefâ etmeyip ve bağçe-i mezkûrun dahi eşcârı devr-i eyyâm ile telef ve zâyi‘ olacağı zâhir ve bedîdâr olup ol-vechile bekāsı sagīrân-ı mezbûrân haklarında muzır ve gayr-ı müfîd olduğundan mâ‘adâ sagīrân-ı mezbûrânın nafaka ve kisveye dahi ihtiyâçları olmağla sagīrân-ı mezbûrânın menzil ve bağçe-i mezkûrlarda olan iki hums hisse-i şâyi‘alarını bedel-i misliyle bâ-re’y-i mütevellî âhara ferâğ ve bedeli ahz ü kabz birle i‘mâl [76] ve istirbâh olunup hâsıl olan ribhiyle infâk ve iksâ olunmak sagīrân-ı mezbûrân haklarında her vechile enfa‘ ve evlâ olduğuna binâen işbu yedimde olup hâlâ kassâm-ı askerî fazîletlü Mehmed Emin Efendi ile Birinci Dâire-i Belediye taraflarından i‘tâ olunan memhûr bir kıt‘a tahmîn-i bedel pusulası mantûkunca sagīrân-ı mezbûrânın menzil ve bağçe-i mezkûrlarda olan iki hums hisse-i şâyi‘aları bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla on beş bin guruş mukābelesinde âhara ferâğa izin taleb şüd. Fî 16 Safer sene [1]301 Şühûdü’l-hâl: Ali Efendi Ağa b. Hüseyin, Mehmed Ağa b. Mustafa, Ömer Ağa b. Kadri, Abdülaziz Ağa b. Ali ve gayruhum. Derûn-ı hüccetde bast ü beyân olunduğu üzere vasîyy-i mezbûre Emine Hanım sagīrân-ı mezbûrânın menzil ve bağçe-i mezkûrlarda olan iki hums hisse-i şâyi‘alarını bedel-i misli idiği mütehakkık olan dört bin guruş mukābelesinde muhzır rüfekāsından Ahmed Ağa b. Mehmed’e kat‘iyyen ba‘de’l-ferâğ ol dahi der-akab meblağ-ı mezbûr mukābelesinde vasîyy-i mezbûre Emine Hanım’a kat‘iyyen ferâğ ve tefvîz etdikden sonra vasîyy-i mezbûre Emine Hanım sagīrân-ı mezbûrânın mâllarından ve li-ecli’l-idâne vasî nasb olunan mezbûr Ahmed Ağa yedinden istidâne eylediği lira-yı Osmânî yüz guruş hesâbıyla dört bin guruş deyni mukābelesinde sagīrân-ı mezbûrâna vefâen ferâğ ve tefvîz edeceğinden ol-vechile ferâğının icrâsı içün işbu mahalle şerh verildi.