Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 164 Hüküm no: 117 Orijinal metin no: [76-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Fatma Hanım’dan çocuklarına kalan ev ve bahçenin satılmasına izin verilmesi Sıddık, izin: 1 kıt‘a Numara: (°), 58 guruş Medîne-i Üsküdar’da Aşçıbaşı mahallesinde sâkine iken bundan akdem vefât eden Fatıma Hanım bt. İbrahim’in sadrî sagīr oğlu İbrahim b. İbrahim Kâmil ve sadriye sagīre kızı Fatıma İhsan bt. Mustafa’nın tesviye-i emrlerine bâ-hüccet-i şer‘iye vasîyy-i mansûbeleri olup zâtı Münâdî Musa Ağa b. Bekir ve Sarrâc Osman Ağa b. İbrahim ta‘rîfleriyle mu‘arrefe olan işbu bâ‘isetü’l-kitâb Hamide Hanım bt. Mustafa bi’l-vesâye takrîr-i kelâm edüp Nezâret-i evkāf-ı hümâyûna mülhak evkāfdan merhûm Na‘lçacı Halil Efendi Vakfı’na şehriye otuz akçe ve Dergâh-ı âlî müteferrikabaşısı el-Hâc İbrahim Bey Vakfı’na yevmî bir akçe icâre-i müeccelelü vakfeyn-i mezkûreyn müsakkafâtından medîne-i mezkûrede Debbâğlar mahallesinde Na‘lçacı Tekkesi sokağında on üç numara ile murakkam ma‘lûmü’l-hudûd ve’l-müştemilât bir bâb menzil ve bağçenin nısf hisse-i şâyi‘ası müteveffât-ı mezbûrenin hayatında bâ-temessükât-ı mütevellî bi’l-icâreteyn taht-ı tasarrufunda olduğu hâlde iki yüz doksan iki senesi şehr-i Rebî‘ülevvelinin yirmi birinci günü oğlu sagīr-i mezbûr İbrahim’in mâlından bâ-hüccet-i şer‘iye istidâne eylediği iki bin sekiz yüz guruş deyni mukābelesinde nısf hisse menzil ve bağçe-i mezkûrları sagīr-i mezbûr İbrahim mütevellîleri re’yleriyle vefâen ferâğ edüp temessükleri tahşiye ve temhîr olundukdan sonra merkūme Fatıma Hanım deyni olan meblağ-ı merkūmu edâ ve nısf hisse menzil ve bağçe-i mezkûrları fek ve tahlîs etmeksizin vefât etmekle ben sagīr-i mezbûrun alacağı olan meblağ-ı merkūmu hâlâ medîne-i mezkûre nâibi mekremetlü Mehmed Salim Efendi huzûrunda tereke-i müteveffât-ı mezbûra vâzı‘ü’l-yed olan Mehmed Ağa b. Abdullah muvâcehesinde tereke-i müteveffât-ı mezbûreden da‘vâ ve ber-vech-i muharrer müdde‘âmı şâyed ben mu‘addilîn şehâdetleriyle ba‘de’l-ısbât ve’l-hükm mûcebince meblağ-ı merkūm iki bin sekiz yüz guruşu müteveffât-ı mezbûreden bi’l-vesâye ahz ü kabz etmemle ol-vechile nısf hisse menzil-i mezkûru ba‘de’l-fekk ve’t-tahsîl sagīrân-ı mezbûrâna hasbe’l-âde intikāl edüp <> lâkin menzil <> ânen fe-ânen müşrif-i harâb ve bağçe-i mezkûrenin eşcârı mürûr-ı eyyâm ile telef ve zâyi‘ olacağı zâhir ve bedîdâr olup ol-vechile bekāsı sagīrân-ı mezbûrân haklarında muzır ve gayr-ı müfîd olduğundan mâ‘adâ nısf hisse-i şâyi‘aları bedel-i misli ve mütevellîleri re’yleriyle âhara ferâğ ve bedeli ahz ü kabz birle i‘mâl ve istirbâh olunup hâsıl olan ribhiyle infâk ve iksâ olunmak sagīrân-ı mezbûrân haklarında her vechile enfa‘ ve evlâ olduğuna binâen işbu yedimde olup nâib-i mûmâ-ileyh ile Dokuzuncu Dâire-i Belediye ser-mühendisliğinden i‘tâ kılınan memhûr bir kıt‘a tahmîn-i bedel pusulası mantûkunca sagīrân-ı mezbûrânın menzil ve bağçe-i mezkûrlarda olan nısf hisse-i şâyi‘aları bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla üç bin sekiz yüz guruş mukābelesinde bâ-re’y-i mütevellî âhara ferâğa izin taleb şüd. Fî 25 Safer sene [1]301 Şühûdü’l-hâl: (°)