Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 165 Hüküm no: 118 Orijinal metin no: [77-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Hasan Rasih Paşa’dan vârislerine kalan sahilhane, ma-i leziz ve bağın satılmasına izin verildiği Mustafa, izinli vekâlet Numara: 118, 6.906 guruş Ümerâ-i Mısriye’den olup hudâvendigâr-ı esbak cennet-mekân Sultan Abdülhamid Hân-ı evvel -tâbe serâhû- hazretleri evkāf-ı şerîfeleri müsakkafâtından medîne-i Üsküdar’a muzâfe Beylerbeyi nâm mahâlde bir bâb sâhilhânede mukīm iken bundan akdem irtihâl-i dâr-ı bekā eden Hasan Rasih Paşa necli’l-merhûm Cezâyirli es-Seyyid Ahmed Efendi’nin mahrûse-i mezkûrede sâkinler sulbî sagīr mahdûmları Mehmed ve Mahmud ve Muhsin ve Hasan ve Hüseyin beyler ile sulbiye sagīre kerîmeleri Fatıma ve İhsan ve Şerife hanımların bâ-hüccet-i şer‘iye vasîyy-i mansûbları yine mahrûse-i mezkûrede sâkin Ahmed es-Sabâhî b. el-merhûm eş-Şeyh Ahmed es-Sabâhî b. el-merhûm Mehmed es-Sabâhî ile müteveffâ-yı mûmâ-ileyhin sulbiye kebîre kerîmesi olup yine mahrûse-i mezkûrede sâkine iffetlü Zeyneb Zekiye Hanım tarafından ber-vech-i âtî vekâlet iddi‘â eden Mîrgün’de sâhilhâne-i Mısriye memûru Giridî izzetlü Ali Bey b. el-merhûm Ahmed Efendi zikirleri âtî bir bâb sâhilhâne ve mâ-i lezîz ve bağa bi’l-emâne vaz‘-ı yedi mütehakkık olan zikr olunan Beylerbeyi Câmi‘-i şerîfi imâmı mekremetlü Rıfat Efendi b. el-Hâc Mehmed Emin mahzarında üzerine da‘vâ ve takrîr-i kelâm edip müşârün-ileyh Sultan Abdülhamid Hân-ı evvel hazretleri evkāf-ı şerîfeleri müsakkafâtından sâlifü’z-zikr Beylerbeyi nâm mahâlde kâin ma‘lûmü’l-hudûd ve’l-müştemilât şehriye iki yüz kırk yedi buçuk akçe icâre-i müeccelelü bir bâb sâhilhâne derûnunda cârî yine vakf-ı müşârün-ileyh <> müstegallâtından kanavât müsennâtına teba‘iyetle bir masura mâ-i lezîz ve verâsında kâin yine vakf-ı müşârün-ileyh müsakkafâtından kezâlik ma‘lûmü’l-hudûd dokuz bin beş yüz dört akçe dört pul icâre-i mu‘accelelü derûnunda köşkü müştemil bir kıt‘a bağdan her biri müteveffâ-yı müşârün-ileyhin bâ-temessük-i mütevellî bi’l-icâreteyn taht-ı tasarrufunda olup ba‘de vefâtihî sıgār-ı mûmâ-ileyhim ile kebîre-i gāibe-i mûmâ-ileyhâya hasbe’l-âde itsâ‘an intikāl edüp lâkin kebîre-i gāibe-i mûmâ-ileyhâ zikr olunan sâhilhâne ve bağı ve mâ-i lezîz-i mezkûrlardan tis‘a hisselerini âhara ferâğ murâd edüp sâlifü’z-zikr sâhilhâne ve köşk ânen fe-ânen müşrif-i harâb olup hâsılları harçlarına vefâ etmeyip ve mâ-i lezîz-i mezkûrun kanavâtı ile bağ-ı mezkûrun kürûm ve eşcârı dahi mürûr-ı ezmine ile telef ve zâyi‘ olacağı zâhir ve bedîdâr olup ol-vechile bekāları sıgār-ı mûmâ-ileyhim haklarında muzır ve gayr-ı müfîd olmağla sâhilhâne ve bağ ve mâ-i lezîz-i mezkûrdan sıgār-ı mûmâ-ileyhimin hisseleri dahi kebîre-i gāibe-i mûmâ-ileyhânın hisseleriyle ma‘an bedel-i misilleriyle bâ-re’y-i mütevellî âhara ferâğ ve bedelleri ahz ü kabz birle i‘mâl ve istirbâh olunup hâsıl olan ribhiyle ma‘an hıfz olunmak sıgār-ı mûmâ-ileyhim haklarında her vechile enfa‘ ve evlâ olduğuna binâen vasîyy-i gāibe-i mûmâ-ileyh Ahmed es-Sabâhî Efendi sâhilhâne ve mâ-i lezîz-i mezkûrlardan sıgār-ı mûmâ-ileyhimin hisselerini bedel-i misliyle bâ-re’y-i mütevellî âhara ferâğa kıbel-i şer‘den izin talebine ve ba‘de’l-izn kebîre-i gāibe-i mûmâ-ileyhânın hisseleri ma‘an ber-vech-i muharrer âhara ferâğa ve bedelini ahz ü kabza ve makbûzumu kendülere irsâl ve îsâle ve husûs-ı mezkûr mütevakkıf olduğu umûrun küllîsine yedimde olup sene-i sâbıkā Şevvâli’l-mükerreminin yirmi sekizinci günü târihiyle müverraha ve mahrûse-i mezkûre nâibi Kuyucaklızâde fazîletlü es-Seyyid Abdurrahman Nafiz Efendi’nin imzâ ve hâtemini hâviye bir kıt‘a hüccet-i şer‘iye mantûkunca vasîyy-i sâbit mûmâ-ileyh ile kebîre-i gāibe-i mûmâ-ileyhâdan her biri mahrûse-i mezkûre mahkemesinde nâib-i mûmâ-ileyh huzûrunda şühûd muvâcehesinde taraflarından beni gıyâbımda kabûlüme mevkūfe vekâlet-i mutlaka-i sahîha-i şer‘iye ile vekîl ve nâib-i menâb nasb ü ta‘yîn edüp haber-i vekâlet bana vâsıl oldukda ben dahi vekâlet-i mezkûreyi kabûl etmemle suâl olunup sâhilhâne ve mâ-i lezîz ve bağ-ı mezkûrlardan keff-i yed ve bana teslîme mûmâ-ileyh Rıfat Efendi’ye tenbîh olunmak bi’l-vekâle murâdımdır dedikde gıbbe’s-suâl ol dahi hayatında sâhilhâne ve mâ-i lezîz ve bağ-ı mezkûru sıgār-ı mûmâ-ileyhim ile kebîre-i gāibe-i mûmâ-ileyhânın ber-vech-i muharrer intikālen tasarruflarında olup kendisi dahi vasîyy-i gāib-i mûmâ-ileyh ile kebîre-i gāibe-i mûmâ-ileyhânın teslîmleriyle bi’l-emâne vaz‘-ı yedini ikrâr mâ‘adâ mûmâ-ileyhin vekâlet müdde‘âsını inkâr edicek müdde‘î-i mûmâ-ileyhden ber-vech-i [78] muharrer vekâlet müdde‘âsına mutâbık beyyine taleb olundukda mahrûse-i mezkûre ahâlisinden Süleyman Ağa b. Hasan ve Abdülgani Ağa b. Ahmed nâm kimesneler li-ecli’ş-şehâde meclis-i şer‘a hâzırân olup isre’l-istişhâd her biri müttefikü’l-lafz ve’l-ma‘nâ alâ-tıbku’l-müdde‘î bi’l-muvâcehe mufassalan edâ-i şehâdet-i şer‘iye etdiklerinde şâhidân-ı mezbûran Beylerbeyi mahallesi muhtâr-ı evveli Osman Efendi b. Ali ve muhtâr-ı sânî Kadri Efendi b. İbrahim’den evvelâ bâ-varaka-i mestûre sırran ve ba‘dehû ahâliden Hafız Halil Efendi b. Mehmed ve müderrisîn-i kirâmdan mekremetlü Mehmed Selim Efendi b. Hasan ve Kadri Efendi b. Mehmed ve Edhem Efendi b. Abdullah’dan dahi alenen lede’t-tezkiye adl ve makbûlü’ş-şehâde idikleri zeyl-i varaka-i mezkûreye tahrîr ve ihbâr olunmağın mûcebince ba‘de’l-hükm ve’t-tenbîh Dokuzuncu Dâire-i Belediyece i‘tâ kılınan bir kıt‘a tahmîn-i bedel pusulası mantûkunca sıgār-ı mûmâ-ileyhimin sâhilhâne ve mâ-i lezîz ve bağ-ı mezkûrlarda olan hisse-i şâyi‘aları bundan akdem lede’l-müzâyede ve ba‘de’l-keşf el-yevm bedel-i misilleri idiği bi’l-ihbâr zâhir olan lira-yı Osmânî yüz guruş hesâbıyla dört yük elli yedi bin yedi yüz yetmiş yedi guruş yirmi sekiz para mukābelesinde bâ-re’y-i mütevellî âhara ferâğa <> kıbel-i şer‘den müvekkili vasîyy-i nâib-i mûmâ-ileyhe izâfetle vekîl-i mûmâ-ileyh Ali Bey’e izin verilmeğin mâ-vaka‘a bi’t-taleb ketb olundu. Fî 5 Safer sene [1]301 Şühûdü’l-hâl: Ömer Ağa b. Abdulkadir, Mehmed Ağa b. Mustafa ve gayruhum.