Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 168 Hüküm no: 119 Orijinal metin no: [78-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ermeni milletinden vefat etmiş olan İskopi’den vârislerine kalan arsa ve mâ-i lezizin satılmasına izin verilmesi Hayri, izin: 1 kıt‘a Numara: 122, 62 guruş Mahrûse-i Galata’ya muzâfe kasaba-i Beşiktaş’a tâbi‘ Ortaköy’de mütemekkine iken bundan akdem fevt olan Devlet-i aliyye teba‘asının Ermeni milleti nisvânından İskopi bt. Asador v. Atam’ın verâseti her biri kezâlik teba‘a-i müşârün-ileyhâ ve millet-i merkūmeden sadrî kebîr oğlu Kabril ve sadriye kebîre kızları Zebya ve Maryem ve Penbe ve Makrohi ve Derohi evlâd-ı Ohannes’e münhasıra ve ba‘dehû kable’l-kısme benât-ı merkūmâtdan Maryem dahi fevt olup onun verâseti kezâlik her biri teba‘a ve millet-i müşârün-ileyhden zevc-i metrûkü Avakim v. Asador ile sadrî sagīr oğulları Leon ve Erşak veledi’l-merkūm Avakim’e münhasıra ve tashîh-i mesele-i mîrâsları bi-hükmi’l-münâsahati’ş-şer‘iye elli altı sehmden [ibâret] olup sihâm-ı mezkûreden on altı sehmi merkūm Kabril ve sekizer sehmden cem‘an otuz iki sehmi sagīrân-ı merkūmân Leon ve Erşak’a münhasıra olduğu ba‘de’t-tahakkuki’ş-şer‘î sagīrân-ı merkūmânın babaları ve velîleri olup mu‘temedü’l-hâl idiği ihbâr olunan işbu bâ‘isü’l-vesîka merkūm Avakim bi’l-velâye takrîr-i kelâm edüp karye-i mezkûrede Palanka sokağında kâin ma‘lûmü’l-hudûd mukaddemâ menzil ve el-yevm bir kıt‘a arsanın mu‘ayyen mahâlli senevî doksan akçe mukāta‘a ile cennet-mekân firdevs-âşiyân Sultan Bâyezid Hân-ı Velî hazretlerinin vakfından ve mâ‘adâ mahâlli dahi şehriye altmış akçe icâre-i müeccele ile Kuddusî el-Hâc Mehmed Efendi Vakfı’ndan ve derûnuna cârî kanavât ve müsennâtına teba‘iyetle nısf masura mâ-i lezîz dahi cennet-mekân Sultan Mahmud Hân-ı sânî hazretleri evkāf-ı şerîfesinden olarak zikr olunan arsa mahalleriyle nısf masura mâ-i lezîz-i mezkûrdan her biri müteveffât-ı evvel merkūme İskopi’nin hayatında taht-ı tasarrufunda ve mezkûr arsa mahallerinden mukāta‘alu olan mahâllin etrâfını muhît taş duvarlarıyla enkāzı dahi yedinde mülk ve hakkı olup ba‘de vefâtihî mukāta‘alu mahâll-i mezkûr ber-tashîh merkūm veresesi mezbûrûna mevrûs ve mûmâ-ileyh Kudüsî el-Hâc Mehmed Efendi Vakfı’ndan mahâlli ile nısf masura mâ-i lezîz dahi evlâd-ı merkūmûn Gabril ve Zebya ve Maryem ve Penbe ve Makrohi ve Derohi’ye ba‘de’l-intikāl merkūmândan Maryem’in dahi fevtiyle südüs hisse-i şâyi‘aları sagīrân-ı merkūmâna hasbe’l-âde intikāl edüp lâkin arsa-i mezkûre bî-hâsıl ve etrâfını muhît taş duvarları münhedim olarak enkāzı ve mâ-i lezîz-i mezkûrun kanavâtı devr ile telef ve zâyi‘ olacağı zâhir ve bedîdâr olup ol-vechile bekāları sagīrân-ı merkūmânın nafaka ve kisveye dahi eşedd-i ihtiyâçları olmağla sagīrân-ı merkūmânın arsa ve mâ-i lezîz-i mezkûrlarda olan hisse-i [79] şâyi‘a-i mezkûreleri bedel ve semen-i misilleri ve mütevellîleri re’yleriyle âhara bey‘ ve ferâğa ve bedel ve semenleri ahz ü kabz birle i‘mâl ve istirbâh olunup hâsıl olan ribhiyle infâk ve iksâ olunmak sagīrân-ı merkūmân haklarında her vechile enfa‘ ve evlâ olduğuna binâen işbu yedimde olup mahrûse-i mezkûre kādîsı fazîletlü Ahmed Bahâî Efendi ile Dördüncü Dâire-i Belediye tarafından i‘tâ olunan memhûr iki kıt‘a tahmîn-i bedel pusulası mantûkunca sagīrân-ı merkūmânın arsa ve mâ-i lezîz-i mezkûrlarda olan hisse-i şâyi‘a-i mezkûreleri bundan akdem lede’l-müzâyede ve ba‘de’l-keşf el-yevm bedel ve semen-i misilleri idiği bi’l-ihbâr zâhir olan lira-yı Osmânî yüz guruş hesâbıyla Sultan Bâyezid Vakfı’na mukāta‘alu olan mârrü’z-zikr mu‘ayyen arsa mahâllinden altı sehm hisse-i şâyi‘a-i mezkûreleri bin beş yüz elli üç guruş ve Kudüsî el-Hâc Mehmed Efendi Vakfı’ndan olan mu‘ayyen mahâll-i mezkûrda olan südüs hisse-i şâyi‘a-i mezkûreleri bin yedi yüz kırk dokuz guruş yirmi yedi para ve nısf masura mâ-i lezîz-i mezkûrda olan südüs hisse-i şâyi‘a-i mezkûreleri sekiz yüz otuz üç guruş on üç para mukābelelerinde âhara ferâğa izin taleb şüd. Fî 10 Safer sene [1]301 Şühûdü’l-hâl: Mehmed Ağa b. Mustafa, Hüseyin Kavas b. Ahmed ve gayruhum.