Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 169 Hüküm no: 120 Orijinal metin no: [79-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Saatçi Ali Efendi’den vârislerine kalan evin satılmasına izin verilmesi Mustafa Zühdü, izin: 1 kıt‘a Numara: 94, 22,5 guruş Merhûme ve mağfûrun-lehâ Bezmiâlem Vâlide Sultan -tâbe serâha- hazretlerinin İstanbul’da Yenibahçe’de kâin binâ ve ihyâ buyurdukları hastahânelerinde li-ecli’l-müdâvât sâkin iken bundan akdem vefât eden Sâ‘atçi Ali Efendi b. Osman’ın sulbî sagīr oğlu Halil Molla’nın vâlidesi ve tesviye-i umûruna bâ-hüccet-i şer‘iye vasîyy-i mansûbesi zâtı mu‘arrefe işbu bâ‘isü’l-kitâb Fatıma Hanım bt. Mehmed Tâhir bi’l-vesâye takrîr-i kelâm ve ta‘bîr ani’l-merâm edüp Nezâret-i evkāf-ı hümâyûna mülhak evkāfdan derûnu eş-Şeyh el-Hâc Mehmed Efendi Vakfı müsakkafâtından İstanbul’da Ebulfeth Sultan Mehmed Han -aleyhi’r-rahmetü ve’l-gufrân- hazretleri câmi‘-i şerîfi kurbünde Hocahayreddin mahallesinde Fındıkoğlu sokağında kâin ma‘lûmü’l-hudûd ve’l-müştemilât şehriye on beş akçe icâre-i müeccelelü bir bâb menzilin dört hisse i‘tibârıyla üç hissesi müteveffâ-yı mezbûrun hayatında bâ-temessük-i mütevellî bi’l-icâreteyn taht-ı tasarrufunda olup ba‘de vefâtihî sagīr-i mezbûr ile diğer zevcesinden mütevellid sulbî sagīr oğlu Mehmed Ali’ye hasbe’l-âde intikāl edüp ancak menzil-i mezkûr ânen fe-ânen müşrif-i harâb olarak hâsılı harcına vefâ etmeyip bekāsı sagīr-i mezbûr Halil hakkında muzır ve gayr-ı müfîd olduğundan mâ‘adâ sagīr-i mezbûrun nafaka ve kisveye dahi eşedd-i ihtiyâcı olmağla sagīr-i mezbûrun menzil-i mezkûrda olan bir buçuk hisse-i şâyi‘ası bedel-i misliyle bâ-re’y-i mütevellî âhara ferâğa ve bedeli ahz ü kabz ve müteveffâ-yı mezbûrun Mahkeme-i Teftîş-i Evkāf Beytü’l-mâl Kassâmlığı cânibinden tahrîr olan terekesi defter-i kassâm zeyline idhâl birle i‘mâl ve istirbâh olunup hâsıl olan nemâsıyla infâk ve iksâ olunmak sagīr-i mezbûr hakkında vücûha enfa‘ ve evlâ olduğuna binâen işbu yedimde olup Üçüncü Dâire-i Belediye tarafından i‘tâ olunan memhûr bir kıt‘a tahmîn-i bedel pusulası mantûkunca sagīr-i mezbûrun menzil-i mezkûrda olan bir buçuk hisse-i şâyi‘ası bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla bin beş yüz guruş mukābelesinde âhara ferâğa izin taleb şüd. Fî 23 Muharrem sene [1]301 Şühûdü’l-hâl: Mehmed Ağa b. Mustafa, Ömer Ağa b. Abdulkadir ve gayruhum. Derûn-ı hüccetde bast ü beyân olunduğu üzere vasîyy-i mezbûre Fatıma Hanım sagīr-i mezbûr Halil Molla’nın menzil-i mezkûrda olan bir buçuk hisse-i şâyi‘ası bedel-i misli idiği bi’l-ihbâr zâhir olan bin beş yüz guruş mukābelesinde Muhzır Mehmed Ağa b. Mustafa’ya ol dahi der-akab meblağ-ı merkūm mukābelesinde vasîyy-i mezbûre Fatıma Hanım’a ba‘de’l-ferâğ vasîyy-i mezbûre Fatıma Hanım oğlu sagīr-i mezbûrun mâlından ve li-ecli’l-idâne vasî nasb olunan Muhzır Mehmed Ağa yedinden istidâne ve kabz eylediği bin beş yüz guruş deyni mukābelesinde bir buçuk hisse-i menzil-i mezkûru sagīr-i mezbûra vefâen ferâğ edeceğinden Senedât-ı Umûmiye İdâresi’nde ferâğı icrâ olunmak üzere işbu mahalle şerh verildi.