Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 170 Hüküm no: 121 Orijinal metin no: [80-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kudüs’te mukim Kazzaz Hayim’e ait olan Kuzguncuk’taki kayıkhanenin vekâleti sebebiyle oğlu Yako’ya verilmesi Aziz Efendi, isbât-ı vekâlet: 1 kıt‘a Numara: 156, 40 guruş Kuds-i şerîf mahallâtından Museviye mahallesinde mütemekkin Devlet-i aliyye teba‘asının Yahûdî milletinden Kazzâz Hayim Yasudo v. Avram v. Avram’ın oğlu olup tarafından ber-vech-i âtî vekâlet iddi‘â eden teba‘a-i Devlet-i aliyyeden ve millet-i merkūmeden işbu hâmilü’r-rakīm Hurdacı Avram zikri âtî kayıkhâneye bi’l-emâne vaz‘-ı yedi mütehakkık olan teba‘a-i Devlet-i aliyyeden ve millet-i merkūmeden Dellâl Yako v. Aron mahzarında üzerine da‘vâ ve takrîr-i kelâm edüp Nezâret-i evkāf-ı hümâyûna mülhak evkāfdan Köprülüzâde merhûm Hafız Ahmed Paşa Vakfı müsakkafâtında medîne-i Üsküdar’a tâbi‘ Kuzguncuk karyesinde Nakkāş mahallesinde Kuzguncuk caddesinde vâki‘ ma‘lûmü’l-hudûd altmış altı numara ile murakkam şehriye dört yüz akçe icâre-i müeccelelü bir göz kayıkhâne babam gāib-i merkūm Hayim Yasudo’nun bâ-sened-i hâkānî bi’l-icâreteyn taht-ı tasarrufunda ve merkūm Yako mezkûr kayıkhâneye babam gāib-i merkūmun teslîmiyle bi’l-emâne vâzı‘ü’l-yed olup ancak babam gāib-i merkūm Hayim Yasudo ber-vech-i muharrer mutasarrıf olduğu kayıkhâne-i mezkûreyi merkūm Yako’nun yedinden nez‘ ü kabza ve ba‘de’l-kabz bedel-i misliyle bâ-re’y-i mütevellî âhara ferâğa ve bedelini ahz ü kabza ve makbûzumu kendüye irsâl ve îsâle ve husûs-ı mezkûr mütevakkıf olduğu umûrun küllîsine yedimde olup işbu sene-i mübâreke Muharremi’l-harâmının on dokuzuncu günü târihiyle müverrah Kuds-i şerîf nâibi Hatibzâde es-Seyyid Yusuf Vehbi Efendi’nin imzâ ve hâtemini hâviye bir kıt‘a vekâlet hücceti mantûkunca târih-i mezkûrda Kuds-i şerîf Mahkemesi’nde nâib-i mûmâ-ileyh huzûrunda şühûd muvâcehesinde tarafından beni gıyâbımda kabûlüme mevkūfe vekâlet-i mutlaka-i sahîha-i şer‘iye ile vekîl nasb ü ta‘yîn edüp haber-i vekâlet bana vâsıl oldukda ben dahi vekâlet-i mezkûreyi kabûl etmemle suâl olunup kayıkhâne-i mezkûreden keff-i yed ve bana teslîme merkūm Yako’ya tenbîh olunmak bi’l-vekâle murâdımdır deyü hüccet-i mezkûreyi ibrâz ile da‘vâ etdikde ol dahi cevâbında kayıkhâne-i mezkûreye ber-vech-i muharrer bi’l-emâne vaz‘-ı yedini ikrâr mâ‘adâ müdde‘î-i merkūmun vekâlet müdde‘âsını inkâr edicek müdde‘î-i merkūmdan ber-minvâl-i muharrer vekâlet müdde‘âsına mutâbık beyyine taleb olundukda udûl-i ahrâr-ı ricâl-i gayriMüslimînden olup Kuds-i şerîfden bu esnâda Der-aliyye’ye gelen teba‘a-i Devlet-i aliyyeden ve millet-i merkūmeden Yasef v. Avram v. Yasef ve Aron v. Avram v. Avram nâm kimesneler li-ecli’ş-şehâde meclis-i şer‘a hâzırân olup isre’l-istişhâd her biri müttefikü’l-lafz ve’l-ma‘nâ alâ-tıbku’l-müdde‘î bi’l-muvâcehe mufassalan edâ-yı şehâdet-i şer‘iye etdiklerinde şâhidân-ı merkūmân karye-i mezkûrede millet-i merkūme cemâ‘atbaşısı Nesim v. Nacur ve ahâlisinden Kayıkçı Mehmed Ağa b. Ali ve teba‘a-i Devlet-i aliyyeden ve millet-i merkūmeden Yako v. David nâm kimesneler evvelâ bâ-varaka-i mestûre sırran ve ba‘dehû her biri karye-i mezkûre ahâlisinden eş-Şeyh Talib Efendi b. Hasib ve her biri teba‘a-i Devlet-i aliyyeden ve millet-i merkūmeden David v. Aslan ve Rafael v. Avram ve Hamail v. diğer Avram ve Berde v. Yako’dan dahi alenen lede’t-tezkiye adl ve makbûlü’ş-şehâde oldukları zeyl-i varakaya tahrîr ve ihbâr olunmağın mûcebince ba‘de’l-hükm kayıkhâne-i mezkûrdan keff-i yed ve müdde‘î vekîl-i merkūm Avram’a teslîme merkūm Yako’ya tenbîh olunmağın mâ-vaka‘a bi’t-taleb ketb olundu. Fî 25 Safer sene [1]301 Şühûdü’l-hâl: Mehmed Emin Ağa b. Mustafa, Ömer Ağa b. Kadri ve gayruhum.