Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 171 Hüküm no: 122 Orijinal metin no: [80-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yüzbaşı Ali Rıza Efendi’nin vefatı üzerine küçük oğlu İhsan’a annesinin vasi tayin edilerek nafaka takdir edildiği el-Hâc Hüsnü, nafaka ve vasî Hudâvendigâr-ı esbak cennet-mekân Sultan Abdülhamid Hân-ı evvel -tâbe serâhû- hazretlerinin evkāf-ı şerîfeleri müsakkafâtından Beylerbeyi nâm mahâlde bir bâb menzilde eşyâsı olup mahrûse-i Selanik’de sâkin iken bundan akdem vefât eden Beşinci Ordu-yı hümâyûn İkinci Taburu’nun Birinci Bölüğü Kamacı Yüzbaşısı Ali Rıza Efendi b. Ahmed b. Mehmed’in sulbî sagīr oğlu tahmînen altı yaşında İhsan Bey’in vakt-i rüşd ü sedâdına değin tesviye-i umûruna kıbel-i şer‘den bir vasî nasbı lâzım ve mühim olmağın emîne ve müstakīme ve her vechile vesâyet uhdesinden gelmeye muktedire idiği zâtını ârifân zeyl-i kitâbda muharrerü’l-esâmî Müslimîn haberleriyle zâhir ve mütehakkık olan sagīr-i mezbûrun vâlidesi işbu bâ‘isetü’l-kitâb Naciye Behiye Hanım sagīr-i mezbûrun vakt-i rüşd ü sedâdına değin tesviye-i umûruna kıbel-i şer‘den vasî nasb ü ta‘yîn olundukda ol dahi vesâyet-i mezkûreyi kabûl ve merâsimini kemâ-yenbagī edâya ta‘ahhüd ve iltizâm eylediğinden sonra vasîyy-i mezbûrenin talebiyle sagīr-i mezbûrun babası müteveffâ-yı mezbûrdan mevrûs ve müntakil mâlı nemâsından işbu târih-i vesîkadan kadr-ı ma‘rûf idiği ihbâr olunan şehriye kırk iki guruş nafaka ve kisve-bahâ farz ve takdîr olunup meblağ-ı mefrûz-ı mezkûr şehriye kırk iki buçuk guruş sagīr-i mezbûrun [81] nafaka ve kisve-bahâ ve sâir levâzım-ı zarûriyesine harc ü sarfa ve lede’l-iktizâ istidâneye ve inde’z-zafer sagīr-i mezbûrun mâlı nemâsına rücû‘a vasîyy-i mezbûr Naciye Behiye Hanım’a izin verildiğini mahkeme-i teftîş-i evkāf beytü’l-mâl kassâmı fazîletlü Ahmed Bahâî Efendi inhâ etmeğin mâ-vaka‘a bi’t-taleb ketb olundu. Fî 27 Muharrem sene [1]301 Şühûdü’l-hâl: Bekir Efendi b. Arslan, Osman Efendi b. Mehmed ve gayruhum.