Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 172 Hüküm no: 123 Orijinal metin no: [81-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Saraylı Emine Nayire Hanım’dan oğluna kalan evin satılmasına izin verilmesi Mustafa Zühdü, izin: 1 kıt‘a Numara: 139, 75 guruş Mahmiye-i İstanbul’da Gedik Paşa civârında Sarrâc İshak mahallesinde sâkine iken bundan akdem vefât eden Saraylı Emine Nâyire Hanım bt. Abdullah’ın sadrî sagīr mahdûmu Cemal Bey’in pederi ve velîsi olup mahmûdü’l-hâl idiği ihbâr olunan işbu bâ‘isü’l-kitâb Ömer Bey b. Ebûbekir bi’l-velâye takrîr-i kelâm ve ta‘bîr ani’l-merâm edüp Nezâret-i evkāf-ı hümâyûna mülhak evkāfdan zikr olunan Sarrâc İshak Vakfı müsakkafâtından mahalle-i mezbûrede kâin ma‘lûmü’l-hudûd ve’l-müştemilât şehriye otuz akçe icâre-i müeccelelü bir bâb menzil müteveffât-ı mezbûrenin hayatında bâ-temessükât-ı mütevellî bi’l-icâreteyn taht-ı tasarrufunda olup ba‘de vefâtihâ sagīr-i mezbûr ile sadriye sagīre kızı Naime’ye hasbe’l-âde münâsafeten ba‘de’l-intikāl sagīre-i mezbûre Naime dahi mu‘ahharan bilâ-veled fevt olup intikālen mutasarrıfa olduğu nısf hisse-i şâyi‘ası mahlûl ve cânib-i vakf-ı mezbûra âid ve râci‘ olup ancak menzil-i mezkûr ânen fe-ânen müşrif-i harâb olarak hâsılı harcına vefâ etmeyip bekāsı sagīr-i mezbûr hakkında muzır ve gayr-ı müfîd olmağla sagīr-i mezbûrun menzil-i mezkûrda olan nısf hisse-i şâyi‘ası bedel-i misliyle bâ-re’y-i mütevellî âhara ferâğ ve bedeli ahz ü kabz ve müteveffât-ı mezbûrenin Teftîş-i Evkāf Mahkemesi’nden tahrîr olunan terekesi defter zeyline idhâl birle i‘mâl ve istirbâh olunup hâsıl olan nemâsıyla ma‘an hıfz olunmak sagīr-i mezbûr hakkında her vechile enfa‘ ve evlâ olduğuna binâen işbu yedimde olup Birinci Dâire-i Belediye tarafından i‘tâ olunan memhûr bir kıt‘a tahmîn-i bedel pusulası mantûkunca sagīr-i mezbûrun menzil-i mezkûrda olan nısf hisse-i şâyi‘ası bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla beş bin guruş mukābelesinde âhara ferâğa izin taleb şüd. Fî 18 Safer sene [1]301 Şühûdü’l-hâl: Mehmed Ağa b. Mustafa, Ömer Ağa b. Abdulkadir ve gayrihim Derûn-ı hüccetde bast ü beyân olunduğu üzere veliyy-i mezbûr Ömer Bey sagīr-i mezbûrun nısf hisse menzil-i mezkûrunu bedel-i misli idiği mütehakkık olan lira-yı Osmânî yüz guruş hesâbıyla beş bin guruş mukābelesinde muhzır Mehmed Ağa b. Mustafa’ya ol dahi der‘akab meblağ-ı merkūm mukābelesinde veliyy-i mezbûra ba‘de’l-ferâğ veliyy-i mezbûr oğlu sagīr-i mezbûrun mâlından ve li-ecli’l-idâne vasî nasb olunan Mehmed Ağa yedinden istidâne ve ve kabz ve bi’z-zarûre umûruna sarfla istihlâk edüp zimmetinde zamanen deyni olan beş bin guruş mukābelesinde nısf hisse menzil-i mezkûru sagīre-i mezbûre vefâen ferâğ ve tefvîz edeceğinden ol-vechile ferâğının icrâ ve sened-i hâkānîsi i‘tâ olunmak üzere işbu mahalle şerh verildi. Fî 18 Safer sene [1]301