Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 173 Hüküm no: 124 Orijinal metin no: [82-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Kömürcü Hasan Reis’den vârislerine kalan ev ve arsanın satılmasına izin verilmesi Aziz Efendi, izin: 1 kıt‘a Numara: 143, 92,5 guruş Mahmiye-i İstanbul’da Küçükayasofya mahallesinde sâkin iken bundan akdem vefât eden Kömürcü Hasan Reis b. Mustafa’nın sulbî sagīr oğlu Mehmed Rifat’ın vâlidesi ve tesviye-i umûruna bâ-hüccet-i şer‘iye vasîyy-i mansûbesi olup zâtı ta‘rîf-i şer‘î ile mu‘arrefe olan işbu bâ‘isetü’l-kitâb Şerife Hanım bt. Halil bi’l-vesâye takrîr-i kelâm edüp Nezâret-i evkāf-ı hümâyûna mülhak evkāfdan sadr-ı esbak merhûm Şehîd Mehmed Paşa Vakfı müsakkafâtından mahalle-i mezkûrede Toprak sokağında vâki‘ ma‘lûmü’l-hudûd ve’l-müştemilât beş numara ile murakkam şehriye on akçe icâre-i müeccelelü bir bâb menzil ve Teberdâr Sofu Mehmed Efendi Vakfı müstegallâtından mahalle-i mezkûrede Hisâr sokağında kâin kezâlik ma‘lûmü’l-hudûd dokuz numara ile murakkam şehriye otuz akçe icâre-i müeccelelü terbî‘an iki yüz altı zirâ‘ bir kıt‘a menzil arsası müteveffâ-yı mezbûrun hayatında bâ-temessükât-ı mütevellî bi’l-icâreteyn taht-ı tasarrufunda olup ba‘de vefâtihî sagīr-i mezbûr ile sulbiye kebîr oğlu Mustafa ve sulbiye kebîre kızı Adeviye Hanım’a hasbe’l-âde islâsen intikāl edüp lâkin menzil-i mezkûr ânen fe-ânen müşrif-i harâb olarak hâsılı harcına vefâ etmeyip arsa-i mezkûre bî-hâsıl ve etrâfını muhît taş duvarları münhedim olarak enkāzı mürûr-ı eyyâm ile telef ve zâyi‘ olacağı zâhir ve bedîdâr olup ol-vechile bekāları sagīr-i mezbûr hakkında muzır ve gayr-ı müfîd olduğundan mâ‘adâ sagīr-i mezbûrun nafaka ve kisveye dahi şiddet-i ihtiyâcı olmağla sagīr-i mezbûrun menzil ve arsa-i mezkûrlarda olan sülüs hisse-i şâyi‘aları bedel-i misilleri ve mütevellîleri re’yleriyle âhara ferâğ ve bedelleri ahz ü kabz birle i‘mâl ve istirbâh olunup hâsıl olan nemâsıyla infâk ve iksâ olunmak sagīr-i mezbûr hakkında her vechile enfa‘ ve evlâ olduğuna binâen işbu yedimde olup hâlâ kassâm-ı askerî fazîletlü Mehmed Emin Efendi ile Birinci Dâire-i Belediye taraflarından i‘tâ olunan memhûr iki kıt‘a tahmîn-i bedel pusulası mantûkunca sagīr-i mezbûrun menzil ve arsa-i mezkûrlarda olan sülüs hisse-i şâyi‘a-i mezkûreleri bundan akdem lede’l-müzâyede ve ba‘de’l-keşf el-yevm bedel-i misilleri idiği bi’l-ihbâr zâhir olan lira-yı Osmânî yüz guruş hesâbıyla menzil-i mezkûrdan sülüs hissesi dört bin guruş ve arsa-i mezkûreden kezâlik sülüs hissesi iki bin guruş ki cem‘an altı bin guruş mukābelesinde âhara ferâğa izin taleb şüd. Fî 19 Safer sene [1]301 Şühûdü’l-hâl: Mehmed Emin Ağa b. Mustafa, Ömer Ağa b. Kadri ve gayruhum. Derûn-ı hüccetde bast ü beyân olunduğu üzere vasîyy-i mezbûre Şerife Hanım sagīr-i mezbûrun menzil ve arsa-i mezkûrelerde olan sülüs hisse-i şâyi‘alarını bedel-i misli olduğu mütehakkık olan lira-yı Osmânî yüz guruş hesâbıyla cem‘an altı bin guruş mukābelesinde <> muhzır rüfekāsından Tosun Ağa b. Mehmed’e ol dahi der-akab meblağ-ı mezkûr mukābelesinde vasîyy-i mezbûre Şerife Hanım’a kat‘iyyen ba‘de’l-ferâğ vasîyy-i mezbûre Şerife Hanım oğlu sagīr-i mezbûr Mehmed Rifat’ın mâlından ve li-ecli’l-idâne vasî nasb olunan mezbûr Tosun Ağa yedinden istidâne ve kabz ve umûruna sarfla istihlâk eylediği lira-yı Osmânî yüz guruş hesâbıyla altı bin guruş deyni mukābelesinde ber-minvâl-i muharrer mutasarrıfa olduğu sülüs hisse menzil ve arsa-i mezkûrları sagīr-i mezbûra vefâen ferâğ ve tefvîz edeceğinden Senedât-ı Umûmiye İdâresi’nde ol-vechile ferâğları icrâ ve sened-i hâkānîleri i‘tâ olunmak üzere işbu mahalle şerh verildi. Fî 19 Safer sene [1]301