Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 175 Hüküm no: 125 Orijinal metin no: [83-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zahireci Tokosoş v. Yorgi’nin sahibi olduğu dükkân ve âletlerini ferağ için Zahireci Vasil’i vekil tayini Aziz Efendi, nasb-ı vekîl-i sâbitü’l-vekâlesi Numara: 155, 40 guruş İstanbul’da Limon İskelesi nâm mahâlde mütemekkin ve zikri âtî hisselerinin sahîhan mutasarrıfı olduğu her biri teba‘a-i Devlet-i aliyyenin Rum milletinden Zahîreci Sina v. Yasef ve Zahîreci Yanko v. Yorgi nâm kimesneler haberleriyle nohudcu esnâfı kethudâsının memhûr bir kıt‘a ilmühaberinden zâhir olan teba‘a-i Devlet-i aliyyeden ve millet-i merkūmeden Zahîreci Tokosoş v. Yorgi yine mahâll-i mezkûrda mütemekkin teba‘a-i Devlet-i aliyyeden ve millet-i merkūmeden işbu hâmilü’r-rakīm Zahîreci Vasil v. Nikola muvâcehesinde ikrâr-ı tam ve takrîr-i kelâm edüp İstanbul’da Sarı Timur mahallesinde Hatab kapısı mevki‘inde vâki‘ ma‘lûmü’l-hudûd dört yüz yirmi üç numara ile murakkam bir bâb zahîreci bakkāl dükkânı derûnunda mevcûde Haremeyn-i muhteremeyn evkāfı müstegallâtından gedik ta‘bîr olunur şehriye üç yüz altmış akçe icâre-i müeccelelü âlât-ı lâzıme-i ma‘lûme ve Ebulfeth Sultan Mehmed Han -tâbe serâhû- hazretleri evkāf-ı şerîfelerine tashîh ve ilhâk olunan Kule-i Zemin Vakfı musakkafâtından dükkân-ı mezkûr zahrında kâin kezâlik ma‘lûmü’l-hudûd şehriye on beş akçe icâre-i müeccelelü terbî‘an yirmi sekiz zirâ‘ üç parmak kal‘a mahâllinden her birinin yirmişer sehm i‘tibârıyla on altışar sehm hisse-i şâyi‘aları benim bâ-temessükât-ı mütevellî ve nizâm bi’l-icâreteyn taht-ı tasarrufumda olup ancak ben bu esnâda memleketim olan medîne-i Niğde’ye tâbi‘ Çamardı kazâsına âzim olmamla mahal ve âlât-ı gedik-i mezkûrlarda olan hisse-i şâyi‘a-i mezkûreleri yedinden makbûzum olan iki bin beş yüz guruş bedel mukābelesinde hâzır bi’l-meclis teba‘a-i Devlet-i aliyye ve millet-i merkūmeden Kasti v. Yani’ye kat‘iyyen ferâğını mütevellîleri huzûrlarında takrîre ve husûs-ı mezkûr mütevakkıf olduğu umûrun küllîsine tarafından merkūm Vasil’i vekâlet-i mutlaka-i sahîha-i şer‘iye ile vekîl nasb ü ta‘yîn eyledim dedikde ol dahi vekâlet-i mezkûreyi kabûl etmeğin mâ-vaka‘a bi’t-taleb ketb olundu. Fî 19 Safer sene [1]301 Şühûdü’l-hâl: Mehmed Emin Ağa b. Mustafa, Ömer Ağa b. Abdulkadir ve gayruhum.