Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 175 Hüküm no: 126 Orijinal metin no: [83-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rüstempaşa Vakfı’nın mütevellilerinin Kütahya’daki vakıfların işlerini görmek üzere Ahmed Necib Efendi’yi vekil tayin ettikleri Aziz Efendi, nasb-ı vekîl Numara: 172, 40 guruş Mahmiye-i İstanbul’da Sultan Ahmed kurbünde Kapı Ağası Mahmud Ağa mahallesinde sâkinler es-Seyyid Osman Cemal ve es-Seyyid İbrahim Halil ve es-Seyyid el-Hâc Mehmed Emin beyler benû Ahmed her biri takrîr-i kelâm ve ta‘bîr ani’l-merâm edüp Nezâret-i evkāf-ı hümâyûna mülhak evkāfdan İstanbul ve Kütahya ve gayride vâki‘ sadr-ı esbak merhûm Rüstempaşa Vakfı’nın evlâdiyet ve meşrûtiyet üzere tevliyeti bizim bâ-berât-ı âlî iştirâken uhdemizde olup vakf-ı müşârün-ileyhin Kütahya’da vâki‘ müsakkafât ve müstegallâtından vukū‘ bulan ferâğ ve intikālâtını istimâ‘ ve i‘tâ-i izne ve mahlûlatını nizâmına tevfîkan âhara îcâra ve ahz olunan ferâğ ve intikāl harclarıyla mahlûlât rüsûmâtından ve sâir bi’l-cümle müsakkafât-ı seneviyeden tevliyete âid hissemizi ahz ü kabza ve makbûzunu bizlere irsâl ve îsâle ve müsakkafât ve müstegallât-ı mezkûreye dâir nizâ‘ vukū‘unda husûmet ve terâfu‘a ve husûs-ı mezkûr mütevakkıf olduğu umûrun küllîsine tarafımızdan vâkıf-ı müşârün-ileyhin Kütahya’da vâki‘ hayrâtından bulunan medresesinin müderrisi Karacazâde fazîletlü Ahmed Necib Efendi’yi gıyâbında kabûlüne mevkūfe vekâlet-i mutlaka-i sahîha-i şer‘iye ile vekîl ve nâib-i menâb nasb ü ta‘yîn eyledik deyü hatm-i kelâm etmeleriyle mâ-vaka‘a bi’t-taleb ketb olundu. Fî 6 Rebî‘ülevvel sene [1]301 Şühûdü’l-hâl: Mehmed Ağa b. Mustafa, Ömer Ağa b. Kadri, Mustafa Efendi b. Süleyman, Ahmed Tahsin Efendi b. Yusuf ve gayruhum.