Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 183 Hüküm no: 132 Orijinal metin no: [88-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Müezzin Ahmed Efendi’den çocuğuna kalan evin satılmasına izin verildiği Küçük Aziz, izin: 1 kıt‘a Numara: 173, 30 guruş Mahmiye-i İstanbul’da Sultan Selim Han Câmi‘-i şerîfi kurbünde Cafer Subaşı mahallesinde sâkin iken bundan akdem vefât eden Müezzin Ahmed Efendi b. Abdurrahman’ın sulbiye sagīre kızı Mükerreme’nin vâlidesi ve tesviye-i umûruna bâ-hüccet-i şer‘iye vasîyy-i mansûbesi zâtı ta‘rîf-i şer‘î ile mu‘arrefe işbu bâ‘isü’l-kitâb Binnaz Hanım bt. Hüseyin bi’l-vesâye takrîr-i kelâm ve ta‘bîr ani’l-merâm edüp Nezâret-i evkāf-ı hümâyûna mülhak evkāfdan merhûm el-Hâc Ahmed Ağa’nın Sultan Selim kurbünde Cafer Subaşı mâ-i lezîzi vakfı musakkafâtından mahalle-i mezbûrede Camcıçeşmesi sokağında on sekiz numara ile murakkam ma‘lûmü’l-hudûd ve’l-müştemilât şehriye otuz akçe icâre-i müeccelelü bir bâb menzil müteveffâ-yı mezbûrun hayatında bâ-temessük-i mütevellî bi’l-icâreteyn taht-ı tasarrufunda olup ba‘de vefâtihî sagīre-i mezbûre ile sulbiye kebîre kızı Fatıma Hanım’a hasbe’l-âde intikāl edüp lâkin menzil-i mezkûr ânen fe-ânen müşrif-i harâb olarak hâsılı harcına vefâ etmeyip bekāsı sagīre-i mezbûre hakkında muzır ve gayr-ı müfîd olduğundan mâ‘adâ sagīre-i mezbûrenin nafaka ve kisveye dahi eşedd-i ihtiyâcı olduğuna binâen işbu yedimde olup hâlâ kassâm-ı askerî fazîletlü Mehmed Emin Efendi ile İkinci Dâire-i Belediye taraflarından i‘tâ olunan memhûr bir kıt‘a tahmîn-i bedel pusulası mantûkunca sagīre-i mezbûrenin menzil-i mezkûrda olan nısf hisse-i şâyi‘ası bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla iki bin guruş mukābelesinde bâ-re’y-i mütevellî âhara ferâğa izin taleb şüd. Fî 5 Ra sene [1]301 Şühûdü’l-hâl: Muhzır Mehmed Ağa b. Mustafa, Muhzırbaşı Ömer Ağa b. Abdulkadir ve gayruhum.