Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 184 Hüküm no: 133 Orijinal metin no: [88-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Münire Hanım’a ait evi emaneten elinde bulunduran Hafız Mustafa Efendi’nin bu evi vekili Osman Efendi’ye vermesi Hayri, vekâlet: 1 kıt‘a Numara: 179, 40 guruş Fi’l-asl Âsitâne-i aliyye sekenesinden olup el-yevm medîne-i Ma‘mûretülaziz kasabası mahallâtından Ağa mahallesinde sâkine Münire Hanım bt. Halil b. Abdullah’ın zevci olup tarafından ber-vech-i âtî vekâlet iddi‘â eden işbu bâ‘isü’l-kitâb rif‘atlü Osman Efendi b. Halil zikri âtî menzil hissesine bi’l-emâne vaz‘-ı yedi mütehakkık olan Hafız Mustafa Efendi b. Abdullah mahzarında üzerine da‘vâ ve takrîr-i kelâm edüp Nezâret-i evkāf-ı hümâyûna mülhak evkāfdan sadrazam-ı esbak Yusuf Ziya Paşa zevcesi merhûme Âişe Hanım Vakfı’na şehriye altmış akçe ve merhûm el-Hâc Yusuf Efendi Vakfı’na şehriye otuz akçe icâre-i müeccelelü vakfeyn-i mezkûreyn müsakkafâtından medîne-i Üsküdar’a tâbi‘ Çengel karyesinde kâin ma‘lûmü’l-hudûd ve’l-müştemilât bir numara ile murakkam bir bâb menzilin on hisse i‘tibârıyla bir hisse-i şâyi‘ası gāibe-i mezbûrenin bâ-temessükât-ı mütevellî bi’l-icâreteyn taht-ı tasarrufunda ve mûmâ-ileyh Hafız Mustafa Efendi dahi hisse-i mezkûreyi mezbûrenin teslîmiyle bi’l-emâne vâzı‘ü’l-yed olup ancak gāibe-i mezbûre ber-vech-i muharrer mutasarrıfa olduğu hisse-i şâyi‘a-i mezkûreyi mûmâ-ileyh Hafız Mustafa Efendi’nin yedinden nez‘ ü kabza ve ba‘de’l-kabz bedel-i misliyle bâ-re’y-i mütevellî âhara ferâğa ve bedelini ahz ü kabza ve makbûzumu kendüye irsâl ve îsâle ve husûs-ı mezkûr mütevakkıf olduğu umûrun küllîsine yedimde olup işbu sene-i mübâreke Zilhicceti’ş-şerîfesinin yirmi beşinci günü târihiyle müverrah ve medîne-i mezkûre nâibi Mehmed Tevfik Efendi’nin imzâ ve hâtemini hâviye bir kıt‘a vekâlet hücceti ve zahrında muharrer medîne-i mezkûre Bidâyet Mahkemesi’nin mazbatası mûcebince medîne-i mezkûrede mezkûr Ağa mahallesinde sâkine olduğu konağının selamlık dâiresinde nâib-i mûmâ-ileyh tarafından mürsel Kâtib İbrahim Efendi’nin huzûr-ı Müslimînde akd eylediği m[eclis-i] şer‘de tarafından beni gıyâbımda kabûlüme mevkūfe vekâlet-i mutlaka-i sahîha-i şer‘iye ile vekîl nasb ü ta‘yîn edüp haber-i vekâlet bana vâsıl oldukda ben dahi vekâlet-i mezkûreyi kabûl etmemle suâl olunup hisse-i şâyi‘a-i mezkûreden keff-i yed ve bana teslîme mûmâ-ileyh Hafız Mustafa Efendi’ye tenbîh olunmak bi’l-vekâle matlûbumdur dedikde gıbbe’s-suâl < > mûmâ-ileyh dahi cevâbında hisse-i şâyi‘a-i mezkûre gāibe-i mezbûrenin bi’l-icâreteyn taht-ı tasarrufunda olup kendisi dahi bi’l-emâne vâzı‘ü’l-yed olduğunu <> tâyi‘an ikrâr mâ‘adâ müdde‘î-i mûmâ-ileyhin vekâlet müdde‘âsını inkâr <> etmekle zikr olunan hüccet ve mazbata mütâla‘a olundukda hüccet-i mezkûrenin mührü mutâbık ve me‘âli vekâlet-i mezkûreyi beyândan ibâret idiği cânib-i fetvâhâneden tahşiye ve temhîr olunduğu ve mazmûnu vekîl-i mûmâ-ileyhin takrîr-i meşrûhuna muvâfık bulunduğu ve mazbata-i mezkûre dahi hüccet-i mezkûreyi müeyyid ve musaddık olarak zikr olunan hüccet-i şer‘iyenin şübhe-i tezvîr ve tasnî‘den sâlim olduğu münfehim olup Mecelle-i Ahkâm-ı Adliye’nin bin sekiz yüz yirmi birinci mâddesi mûcebince bu misillü şübhe-i tezvîr ve tasnî‘den sâlim olan senedât-ı şer‘iyenin mazmûnuyla bilâ-beyyine amel ve hüküm câiz olmağla mûcebince müdde‘î-i mûmâ-ileyhin vekâletine ba‘de’l-hükm hisse-i şâyi‘a-i mezkûreden keff-i yed ve müdde‘î-i vekîl-i mûmâ-ileyh Osman Efendi’ye vech-i lâyıkıyla teslîm mûmâ-ileyh Hafız Mustafa Efendi’ye tenbîh olunmağın mâ-vaka‘a bi’t-taleb ketb olundu. Fî 5 Rebî‘ülevvel sene [1]301 Şühûdü’l-hâl: Ömer Ağa b. Kadri, Mehmed Ağa b. Mustafa ve gayruhum.