Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 185 Hüküm no: 134 Orijinal metin no: [89-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgi’nin emaneten elinde bulundurduğu arsayı, arsa sahiplerinin vekili olan Yorgi Kombiliko’ya teslim etmesi el-Hâc Esad Efendi, vekâlet: 1 kıt‘a Numara: (°),harc: 40 guruş Kal‘a-i Sultâniye dâhilinde Bozcaada’da sâkine her biri teba‘a-i Devlet-i aliyyenin Rum milleti nisvânından oldukları Galata’ya tâbi‘ Arnabud karyesi Aya İstirati Kilisesi’ne tâbi‘ Rum milletinin muhtârı Kosti tarafından mevrûd bir kıt‘a ilmühaberden nümâyân olan ve zâtları ahâliden Vasilaki v. Petro ve Dellâl Yani v. Hıristo ta‘rîfleriyle mu‘arrefe kendiden asîl ve li-ebeveyn kız karındaşı Kiryakiçe bintey el-müteveffâ Kostanti v. Rayfa Papalison kapudan tarafından husûs-ı âtîde âharı tevkîle mezûn vekîl-i sâbitü’l-vekâlesi Efdi tarafından ber-vech-i âtî vekâlet iddi‘â eden işbu bâ‘isü’r-rakīm ada-i mezkûr mahallâtından Kilise mahallesi ahâlisinden Yorgi Kombiliko v. Kostanti Kombiliko zikri [â]tî arsaya bi’l-emâne vaz‘-ı yedi mütehakkık olan Yorgi v. Dimitri muvâcehesinde üzerine da‘vâ ve takrîr-i kelâm edüp Hazîne-i Haremeyn-i muhteremeyden mazbût evkāfdan sâbıkā Beşinci Hâce Servinaz Kadın Vakfı musakkafâtından mezkûr Arnabud karyesinde vâki‘ ma‘lûmü’l-hudûd şehriye on iki buçuk akçe icâre-i müeccelelü gayri ez-ifrâz yüz iki buçuk zirâ‘ bir kıt‘a menzil arsası babaları müteveffâ-yı merkūm Kostanti intikālinden gāibetân-ı merkūmetânın bi’l-icâreteyn iştirâken ve şâyi‘an taht-ı tasarruflarında ve merkūm Yorgi arsa-i mezkûreye gāibân-ı merkūmetânın teslîmleriyle bi’l-emâne vâzı‘ü’l-yed olup ancak gāibe-i merkūme Efdi kendü ile kız karındaşı gāibe-i merkūme Kiryakiçe’nin ber-vech-i muharrer intikālen mutasarrıfe oldukları arsa-i mezkûreyi merkūmun yedinden nez‘ ü kabza ve ba‘de’l-kabz bedel-i misliyle bâ-re’y-i mütevellî tâlibine ferâğa ve bedelini ahz ü kabza ve makbûzumu kendülere îsâl ve irsâle ve lede’l-iktizâ sulh ve ibrâya ve husûs-ı mezkûr mütevakkıf olduğu umûrun küllîsine yedimde olup sene-i sâbıkā Muharremi’l-harâmının yedinci günü târihiyle müverrah Ada kazâsı nâibi es-Seyyid Ebûbekir İsmail Efendi’nin imzâ ve hâtemini hâviye bir kıt‘a vekâlet hücceti ve zahrında muharrer Bozcaada kazâsı Bidâyet Mahkemesi’nin memhûr mazbatası mantûklarınca mahkeme-i mezbûrede nâib-i mûmâ-ileyh huzûrunda tarafından beni vekâlet-i âmme-i sahîha-i şer‘iye ile asâleten ve vekâleten bi’l-muvâcehe vekîl nasb ü ta‘yîn eylediğinde ben dahi vekâlet-i mezkûreyi kabûl etmemle suâl olunup arsa-i mezkûreden keff-i yed ve bana teslîme merkūm Yorgi’ye tenbîh olunmak bi’l-vekâle matlûbumdur dedikde gıbbe’s-suâl ol dahi cevâbında arsa-i mezkûre gāibân-ı merkūmetânın babaları müteveffâ-yı merkūm Kostanti intikālinden âdiyen bi’l-icâreteyn taht-ı tasarruflarında olup kendisi dahi bi’l-emâne vâzı‘ü’l-yed olduğunu tâyi‘an ikrâr <> mâ‘adâ müdde‘î-i merkūmun vekâlet müdde‘âsını inkâr etmekle hüccet ve mazbata-i mezkûreler mütâla‘a olundukda hüccet-i mezkûrenin mührü mutâbık ve me‘âli vekâlet-i mezkûreyi beyândan ibâret idiği cânib-i fetvâhâneden tahşiye ve temhîr olunduğu ve me‘âli müdde‘î-i merkūmun takrîr-i meşrûhuna mutâbık bulunduğu ve mazbata-i mezkûre dahi mazmûn-ı hüccet-i mezkûreyi müeyyid ve musaddık olarak hüccet-i mezkûrenin tezvîr ve tasnî‘den sâlim olduğu münfehim ve Mecelle-i Ahkâm-ı Adliye’nin bin sekiz yüz yirmi yedinci bendi mûcebince bu makūle tezvîr ve tasnî‘den sâlim olan senedât-ı şer‘iyenin mazmûnuyla bilâ-beyyine amel ve hükm câiz olmağla mûcebiyle müdde‘î-i merkūmun vekâletine ba‘de’l-hükm arsa-i mezkûreden keff-i yed ve müdde‘î-i vekîl-i merkūm Yorgi Kombiliko’ya teslîme merkūm Yorgi’ye tenbîh olunmağın mâ-vaka‘a bi’t-taleb ketb olundu. Fî 4 Ra sene [1]301 Şühûdü’l-hâl: Galata’da Meryem Ana Kilisesi Muhtârı Vasilaki v. Petro, ...? Dellâl? Yani v. Hıristo ve gayruhum.