Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 186 Hüküm no: 135 Orijinal metin no: [90-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mehmed Nuri Efendi’den çocuklarına kalan bahçeli evin satılmasına izin verilmesi Kādızâde, izin: 1 kıt‘a Numara: 108, 200 guruş Mahmiye-i İstanbul’da Yusuf Paşa Çeşmesi kurbünde Kazganî Sadi mahallesinde sâkin iken bundan akdem vefât eden ketebeden es-Seyyid Mehmed Nuri Efendi b. İbrahim’in sulbî sagīr oğlu Ahmed Nazif’in eniştesi ve tesviye-i umûruna bâ-hüccet-i şer‘iye vasîyy-i mansûbu Mehmed Rıza Ağa b. İbrahim Edhem ile müteveffâ-yı mezbûrun sulbiye sagīre [kızı] Emine Nakıye’nin vâlidesi ve tesviye-i umûruna bâ-hüccet-i şer‘iye vasîyy-i mansûbesi Hadice Hanım bt. Abdullah b. Mehmed tarafından husûs-ı âtîde vekîlleri olduğu mezbûrenin zâtını ârifân ketebeden İbrahim Efendi b. Hüseyin b. Mustafa ve Evkāf-ı hümâyûn beytü’l-mâl hademesinden Mehmed Nuri Ağa b. el-Hâc Osman b. Abdullah haberleriyle zâhir olan işbu bâ‘isü’l-kitâb Mustafa Ağa b. Hasan bi’l-vekâle takrîr-i kelâm ve ta‘bîr ani’l-merâm edüp Nezâret-i Evkāf-ı hümâyûna mülhak evkāfdan merhûm Hasan b. Mehmed nâm sâhibü’l-hayrın vakfı musakkafâtından mahalle-i mezbûrede Câmi‘-i şerîf sokağında vâki‘ ma‘lûmü’l-hudûd ve’l-müştemilât şehriye yirmi akçe icâre-i müeccelelü yedi numara ile murakkam ma‘a bağçe bir bâb menzil müteveffâ-yı mezbûrun hayatında bâ-temessük-i mütevellî bi’l-icâreteyn taht-ı tasarrufunda olup ba‘de vefâtihî sagīrân-ı mezbûrân ile sulbî kebîr oğlu Mehmed Rakım ve sulbiye kebîre kızı Fâtımatü’z-zehra Hanım’a hasbe’l-âdeirbâ‘an intikāl edüp lâkin menzil-i mezkûr ânen fe-ânen müşrif-i harâb olarak hâsılı harcına vefâ etmeyip bağçe-i mezkûrun dahi eşcârı devr-i eyyâm ile telef ve zâyi‘ olacağı zâhir ve bedîdâr olup ol-vechile bekāları sagīrân-ı mezbûrân haklarında muzır ve gayr-ı müfîd olduğundan mâ‘adâ sagīrân-ı mezbûrânın nafaka ve kisveye dahi ihtiyâçları olmağla sagīrân-ı mezbûrânın ma‘a bağçe menzil-i mezkûrda olan nısf hisse-i şâyi‘aları bedel-i misilleriyle bâ-re’y-i mütevellî âhara ferâğa ve bedeli ahz ü kabz birle i‘mâl ve istirbâh olunup hâsıl olan ribhiyle infâk ve iksâ olunmak sagīrân-ı mezbûrân haklarında her vechile enfa‘ ve evlâ olduğuna binâen işbu yedimde olup hâlâ kassâm-ı askerî fazîletlü Mehmed Emin Efendi ile Üçüncü Dâire-i Belediye taraflarından i‘tâ olunan memhûr bir kıt‘a tahmîn-i bedel pusulası mantûkunca sagīrân-ı mezbûrânın ma‘a bağçe menzil-i mezkûrda olan nısf hisse-i şâyi‘aları bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla on üç bin iki yüz elli guruş mukābelesinde âhara ferâğa izin taleb şüd. Fî 5 Safer sene [1]301 Şühûdü’l-hâl: Mehmed Ağa b. Mustafa, Ömer Ağa b. Kadri ve gayruhum.