Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 187 Hüküm no: 136 Orijinal metin no: [90-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kütahya’daki Yakub Çavuş Camii hatibi olan Ahmed Hamdi Efendi’nin bu ciheti kardeşi Hafız Yakub Efendi’ye ferağı Mehmed Necib, nasb-ı vekîl Numara: 179, 40 guruş Medîne-i Kütahya’da Beldecik mahallesinde vâki‘ Yakub Çavuş Câmi‘-i şerîfi Vakfı’ndan almak üzere yevmî nîm akçe vazîfe ile hitâbet cihetinin bâ-berât-ı âlî mutasarrıfı olduğu Kanlıcak karyesinde Şeyh Ataullah Efendi Tekyesi’nde müsâfiren sâkinler Kütahyavî Hüseyin Hüsnü Efendi b. Mehmed b. Abdurrahman ve el-Hâc Mehmed Efendi b. Veli b. Abdullah nâm kimesnelerin ihbârlarıyla zâhir ve Galata’ya tâbi‘ Tophâne’de Avni Efendi mahallesi imâm ve muhtârlarının temhîr eyledikleri bir kıt‘a ilmühaberlerinden nümâyân olan Ahmed Hamdi Efendi b. Abdullah ikrâr ve takrîr-i kelâm edüp ben bu def‘a ber-vech-i muharrer mutasarrıf olduğum cihet-i mezkûreyi hüsn-i rızâmla medîne-i mezkûrede sâkin birâderim talebe-i ulûmdan Hafız Yakub Efendi’ye ferâğ ve kasr-ı yed murâd etmemle ber-vech-i mutasarrıf olduğum cihet-i mezkûreyi birâderim mûmâ-ileyhe mahâllinde ferâğ ve kasr-ı yede tarafımdan medîne-i mezkûrede sâkin Kavaszâde Ali Efendi b. el-Hâc Ahmed’i gıyâbında kabûlüne mevkūfe vekâlet-i mutlaka-i sahîha-i şer‘iye ile vekîl nasb ü ta‘yîn eyledim dedikde mâ-hüve’l-vâki‘ bi’t-taleb ketb olundu. Fî 9 Ra sene [1]301 Şühûdü’l-hâl: (°)