Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 188 Hüküm no: 137 Orijinal metin no: [91-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zahireci Tokodoş’un mutasarrıf olduğu ev arsasını Mana’ya satması için Zahireci Vasil’i vekil tayini Muharrem Efendi, nasb-ı vekîl Numara: 191, 40 guruş Mahmiye-i İstanbul’da Limon İskelesi nâm mahâlde bir bâb zahîreci dükkânında mütemekkin ve zikri âtî arsanın sahîhan mutasarrıfı olduğu her biri Devlet-i aliyye teba‘asının Rum milletinden Zahîreci Kosti v. Yani ve Zahîreci Nikola v. Yorgi nâm kimesneler haberleriyle nohudcu esnâfı kethudâsının memhûr bir kıt‘a ilmühaberinden zâhir olan teba‘a-i Devlet-i aliyyeden ve millet-i merkūmeden Erdebilî Zahîreci Tokodoş v. Yorgi yine mahâll-i mezkûrda mütemekkin teba‘a-i Devlet-i aliyyeden ve millet-i merkūmeden işbu hâmilü’r-rakīm Zahîreci Vasil v. Nikola muvâcehesinde takrîr-i kelâm ve ta‘bîr ani’l-merâm edüp Hazîne-i Haremeyn-i muhteremeynden mazbût evkāfdan İstanbul’da Ayasofya-i kebîr Câmi‘-i şerîfi Vakfı’na şehriye on beş akçe ve Ebulfeth Sultan Mehmed Hân-ı Gāzi -tâbe serâhû- hazretleri evkāf-ı şerîfelerine tashîh olunan Kule-i zemîn Vakfı’na şehriye kırk akçe icâre-i müeccelelü vakfeyn-i mezkûreyn musakkafâtından İstanbul’da Narlıkapı hâricinde Samatya’da vâki‘ ma‘lûmü’l-hudûd olan üç numara ile murakkam bir kıt‘a menzil arsasının mezkûr Kule-i zemîn Vakfı’ndan olan mu‘ayyen mahâlli müstakıllen ve mârrü’z-zikr Ayasofya-i kebîr Câmi‘-i şerîfi Vakfı’ndan olan mu‘ayyen mahâllinin dahi üç rub‘ hisse-i şâyi‘ası benim bâ-temessükât-ı mütevellî bi’l-icâreteyn taht-ı tasarrufumda olup ancak ben bu esnâda memleketim olan medîne-i Niğde’ye tâbi‘ Çamardı kazâsına âzim olmamla ber-minvâl-i muharrer mutasarrıf olduğum arsayı mâlından makbûzum olan beş bin guruş bedel mukābelesinde hâzır bi’l-meclis teba‘a-i Devlet-i aliyyeden ve millet-i merkūmeden Zahîreci Mana v. Yosef’e kat‘iyyen ferâğını mütevellîleri huzûrlarında takrîre ve husûs-ı mezkûr mütevakkıf olduğu umûrun küllîsine tarafımdan merkūm Vasil’i vekâlet-i mutlaka-i sahîha-i şer‘iye ile vekîl nasb ü ta‘yîn eyledim dedikde ol dahi vekâlet-i mezkûreyi kabûl etmeğin mâ-vaka‘a bi’t-taleb ketb olundu. Fî 13 Safer sene [1]301 Şühûdü’l-hâl: Mehmed Emin Ağa b. Mustafa, Ömer Ağa b. Kadri ve gayruhum.