Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 189 Hüküm no: 138 Orijinal metin no: [91-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Fatma Melek Hanım’dan küçük çocuklarına kalan ev arsasının satılmasına izin verilmesi Hocazâde Ali Rıza, izin: 1 kıt‘a Numara: 174, 426 guruş Mahmiye-i İstanbul’da Hocapaşa kurbünde Karaki Hüseyin Çelebi mahallesinde sâkine iken bundan akdem vefât eden Fatıma Melek Hanım bt. Mehmed Tâhir’in sadrî sagīr oğlu Mehmed Kemaleddin ve sadriye sagīre kızı Nadire Nebile Hanım’ın babaları ve velîleri olup mahmûdü’l-hâl idiği ihbâr olunan işbu bâ‘isü’l-kitâb müderrisîn-i kirâmdan mekremetlü Mehmed Sadeddin Efendi b. el-merhûm Mustafa bi’l-velâye takrîr-i kelâm ve ta‘bîr ani’l-merâm edüp Nezâret-i Evkāf-ı hümâyûna mülhak evkāfdan teşrîfâtî merhûm Mehmed Akif Efendi Vakfı’na şehriye otuz akçe ve merhûm Helvacıbaşı İskender Ağa Vakfı’na şehriye yetmiş akçe icâre-i müeccelelü vakfeyn-i mezkûreyn musakkafâtından mahalle-i mezkûrede kâin otuz iki numara ile murakkam ma‘lûmü’l-hudûd terbî‘an üç yüz otuz dört zirâ‘ on beş parmak bir kıt‘a menzil arsası müteveffât-ı mezbûrenin hayatında bâ-temessükât-ı mütevellî bi’l-icâreteyn taht-ı tasarrufunda olup ba‘de vefâtihâ sagīrân-ı mezbûrâna hasbe’l-âde münâsafeten intikāl edüp lâkin arsa-i mezkûre bî-hâsıl ve etrâfını muhît duvarları münhedim olarak enkāzı mürûr-ı ezmine ile telef ve zâyi‘ olacağı zâhir ve bedîdâr olup ol-vechile bekāsı sagīrân-ı mezbûrân haklarında muzır ve gayr-ı müfîd olmağla sagīrân-ı mezbûrânın arsa-i mezkûreleri bedel-i misli ve mütevellîleri re’yleriyle âhara ferâğ ve bedeli ahz ü kabz birle i‘mâl ve istirbâh olunup hâsıl olan nemâsıyla ma‘an hıfz olunmak sagīrân-ı mezbûrân hakkında her vechile enfa‘ ve evlâ olduğuna binâen işbu yedimde olup hâlâ kassâm-ı askerî fazîletlü Mehmed Emin Efendi ile Birinci İdâre-i Belediye Hendesehânesi’nden i‘tâ olunan memhûr bir kıt‘a tahmîn-i bedel pusulası mantûkunca arsa-i mezkûre bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla yirmi sekiz bin dört yüz elli guruş mukābelesinde bâ-re’y-i mütevellî âhara ferâğa izin taleb şüd. Fî 7 Rebî‘ülevvel sene [1]301 Şühûdü’l-hâl: Muhzır Mehmed Ağa b. Mustafa, Muhzır Ömer Ağa b. Abdulkadir ve gayruhum.