Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 190 Hüküm no: 139 Orijinal metin no: [92-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nazmiye Hanım bülûğa ermiş olduğundan vefat eden babası Ahmed Latif Efendi’den kendisine kalan malların vasisi tarafından verilmesi Hocazâde Husûs-ı âti’l-beyânın mahâllinde keşf ü tahrîri içün savb-ı şer‘i’l-enverden me’zûnen bi’l-hükm ta‘yîn ve irsâl olunan Kâtib Hocazâde Ali Rıza Efendi’nin İstanbul’da Davud Paşa İskelesi civârında Etyemez nâm mahâlde Bâyezid-i cedîd mahallesinde vâki‘ Bâbı Seraskerî Piyâde Dâiresi Birinci Şu‘besi Ketebesi’nden Ahmed Bahaddin Efendi’nin sâkin olduğu dokuz numara ile murakkam menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i âlî etdikde, Sultan Ahmed Câmi‘-i şerîfi nezdinde Türbe sokağı nâm mahâlde misâfiren sâkin iken bundan akdem vefât eden Saruhan muhâsebecisi sâbık müteveffâ es-Seyyid Ahmed Latif Efendi b. Feyzullah’ın sulbiye kızı olup mahalle-i mezbûre imâmı ve muhtârları tarafından i‘tâ olunan bir kıt‘a ilmühaber mûcebince yirmi yaşını mütecâvize bulûğunu mukırra ve mu‘terife olarak ber-vech-i âtî rüşdünü iddi‘â eden Vânî Ali ve Hakkı Efendi b. Süleyman ve Salih Kemaleddin Efendi b. Süleyman ta‘rîfleriyle mu‘arrefe olan işbu bâ‘isetü’l-kitâb Nazmiye Hanım üvey vâlidesi ve hâl-i sıgārında tesviye-i umûruna bâ-hüccet-i şer‘iye vasîyy-i mansûbesi olup zikri âtî mâlına bi’l-vesâye vâzı‘atü’l-yed olan zâtı ta‘rîf-i şer‘î ile mu‘arrefe Emine Hanım bt. Abdullah tarafından husûs-ı âtîde Birinci İdâne Cerîdesi’nin yüz on birinci sahîfesinde muharrer zabtı mûcebince vekîl-i müseccel-i şer‘îsi evkāf-ı hümâyûn mu‘temedlerinden Hüseyin Efendi b. Hasan mahzarında, el-yevm ben yirmi yaşımı mütecâvize âkıle ve bâliğa ve rüşdüm bulûğuma munzama olarak umûrumu bizzât görmeye kādire ve i‘âne-i vasîden müstağniye olmamla ber-mûceb-i defter-i kassâm pederim müteveffâ-yı mûmâ-ileyhden müntakil ve mevrûs mâlımı bana teslîme müvekkilesi vasîyy-i mezbûreye izâfetle vekîl-i mezbûr Hüseyin Efendi’ye tenbîh olunmak murâdımdır deyü da‘vâ etdikde vekîl-i mezbûr Hüseyin Efendi dahi cevâbında müvekkilesi vasîyy-i mezbûrenin müdde‘iye-i mezbûre Nazmiye Hanım’ın pederi müteveffâ-yı mûmâ-ileyhden mevrûs ve müntakil mâlına bi’l-vesâye vâzı‘atü’l-yed olduğunu bi’l-vekâle tâyi‘an ikrâr mâ‘adâ müdde‘iye-i mezbûrenin ber-vech-i muharrer rüşd müdde‘âsını inkâr etmekle müdde‘iye-i mezbûre ber-vech-i muharrer müdde‘âsını mahalle-i mezkûre imâmı Hafız Salih Efendi b. Süleyman ve muhtâr-ı sânî İsmail Fehim Efendi b. Süleyman’dan evvelâ bâ-varaka-i mestûre sırran ve ba‘dehû mahalle-i mezbûre ahâlisinden es-Seyyid Ali Efendi b. Süleyman ve Salih Efendi b. Mehmed ve Ahmed Efendi b. Ali ve Bekçi Hasan Ağa b. Mustafa’dan alenen lede’t-tezkiye adl ve makbûlü’ş-şehâde idikleri kâtib-i mûmâ-ileyhin me’zûnen tahrîr ve irsâl eylediği varaka-i mestûre zîrine tahrîr ve ihbâr olunan zâtını bi’l-ma‘rifeti’ş-şer‘iye ârifân Süleyman Feyzi Efendi b. Salih b. Süleyman ve Ahmed Fehmi Efendi b. Ömer b. Ahmed nâm kimesneler şehâdetleriyle bi’l-muvâcehe ber-nehc-i şer‘î ba‘de’l-ısbât ve’l-hükm mûcebince müdde‘iye-i mezbûre Nazmiye Hanım’ın mâlını kendüye teslîme müvekkilesi vasîyy-i mezbûreye izâfetle vekîl-i mezbûr Hüseyin Efendi’ye tenbîh eylediğini kâtib-i mûmâ-ileyh mahâllinde ketb ü tahrîr ve ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ ve takrîr etmeğin <> hüküm-i mezkûr kıbel-i şer‘den tenfîz olunduğunu evkāf-ı hümâyûn kassâmı fazîletlü Ahmed Bahâî Efendi inhâ etmeğin mâ-vaka‘a bi’t-taleb ketb olundu. Fî 25 Safer sene [1]301 Şühûdü’l-hâl: Halil Ağa b. Halil, Mehmed Ağa b. Mustafa, Ömer Ağa b. Abdulkadir ve gayruhum.