Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 191 Hüküm no: 140 Orijinal metin no: [93-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rum milletinden olup vefat etmiş olan Elisavet’ten çocuklarına kalan abacı gediği âletlerinin satılmasına izin verilmesi Salih, izin: 1 kıt‘a Numara: 242, 95 guruş Mahmiye-i İstanbul’da Langa Yenikapısı hâricinde Kâtib Kasım mahallesinde sâkine iken bundan akdem fevt olan Devlet-i aliyye teba‘asının Rum milleti nisvânından Elisavet bt. el-müteveffâ Haci Yuvan v. Anaştaş’ın sadrî sagīr oğlu Yuvan’ın li-ebeveyn hâli ve tesviye-i umûruna bâ-hüccet-i şer‘iye vasîyy-i mansûbu teba‘a ve millet-i merkūmeden işbu bâ‘isü’r-rakīm Keresteci Haci İlya v. el-merkūm Haci Yuvan bi’l-vesâye takrîr-i kelâm ve ta‘bîr ani’l-merâm edüp mahmiye-i mezbûreden Bahçekapısı hâricinde Langa gümrüğü kapısı sırasında taşcı ve arpacı dükkânları beynlerinde vâki‘ on dört numara ile murakkam mukaddemâ köhne abacı ve el-yevm fes kalıpçı dükkânı derûnunda mevcûde Hazîne-i Haremeyn-i muhteremeyn Evkāfı müstegallâtından beyne’l-esnâf köhne abacı gediği ta‘bîr olunur yevmî yedi akçe icâre-i müeccelelü âlât-ı lâzıme-i ma‘lûmenin otuz iki sehm i‘tibârıyla iki kıt‘a nizâm temessükü mantûkunca on iki buçuk sehm hissesi babası müteveffâ-yı merkūm Haci Yuvan intikālinden müteveffât-ı merkūme Elisadebet’in sağlığında bi’l-icâreteyn taht-ı tasarrufunda ba‘de fevtihâ sagīr-i merkūm ile sadriye kebîre kızı Panalosi’ye hasbe’l-âde münâsafeten intikāl edüp lâkin gedik-i mezkûrun âlâtı mürûr-ı eyyâm ile telef ve zâyi‘ olacağı zâhir ve bedîdâr olup ol-vechile bekāsı sagīr-i merkūm hakkında muzır ve gayr-ı müfîd olduğundan mâ‘adâ sagīr-i merkūmun nafaka ve kisveye dahi eşedd-i ihtiyâcı olmağla sagīr-i merkūmun on iki buçuk sehm âlât-ı gedik-i mezkûrda nısf hissesi bedel-i misliyle bâ-re’y-i mütevellî âhara ferâğ ve bedeli ahz ü kabz ve müteveffât-ı merkūmenin Mahkeme-i Teftîş-i Beytü’l-mâl Kassâmlığı cânibinden tahrîr olunan terekesine idhâl birle i‘mâl ve istirbâh olunup hâsıl olan nemâsıyla infâk ve iksâ olunmak sagīr-i merkūm hakkında her vechile enfa‘ ve evlâ olduğuna binâen sagīr-i merkūmun on iki buçuk sehm âlât-ı gedik-i mezkûrda olan nısf hisse-i şâyi‘ası bundan akdem lede’l-müzâyede ve gıbbe inkıtâ‘i’r-rağbe el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla on dokuz bin elli guruş mukābelesinde bâ-re’y-i mütevellî âhara ferâğa izin taleb şüd. Fî-selhi Rebî‘ülevvel sene [1]301 Şühûdü’l-hâl: Muhzır Mehmed Ağa b. Mustafa, Münâdî el-Hâc Ahmed Ağa b. Ahmed ve gayruhum.