Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 192 Hüküm no: 141 Orijinal metin no: [93-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Emine Dilber Hanım’dan küçük oğlu Hayri’ye kalan evin satılmasına izin verilmesi Küçük Hakkı, izin: kıt‘a Numara: 182, 37,5 guruş Mahmiye-i İstanbul’da Küçük Hamam kurbünde Koruk Mahmud Efendi mahallesinde sâkine iken bundan akdem vefât eden Emine Dilber Hanım bt. Abdullah’ın sadrî sagīr oğlu Hayri’nin babası ve velîsi olup mahmûdü’l-hâl idiği ihbâr olunan işbu bâ‘isü’l-kitâb Süleyman Ağa b. Ebûbekir bi’l-velâye takrîr-i kelâm ve ta‘bîr ani’l-merâm edüp Nezâret-i Evkāf-ı hümâyûna mülhak evkāfdan merhûme Safiye Sultan Vakf-ı şerîfi müsakkafâtından mahalle-i mezbûrede kâin doksan iki numara ile murakkam ma‘lûmü’l-hudûd ve’l-müştemilât beher şehr otuz akçe icâre-i müeccelelü bir bâb menzil müteveffât-ı mezbûrenin hayatında bâ-temessük-i mütevellî bi’l-icâreteyn taht-ı tasarrufunda olup ba‘de vefâtihâ sagīr-i mezbûr ile sadriye sagīre kızı Samiye’ye hasbe’l-âde münâsafeten ba‘de’l-intikāl sagīre-i mezbûre dahi mu‘ahharan vefât edüp menzil-i mezkûrda olan nısf hisse-i şâyi‘ası mahlûl ve cânib-i vakf-ı şerîfe âid ve râci‘ oldukdan sonra der-dest-i kāime mûcebince nısf hisse-i mezkûresi sagīre-i mezbûrenin mahlûlünden taraf-ı vakf-ı mezbûrdan mu‘accele-i ma‘lûme ile sagīr-i mezbûr için tefevvüz etmemle ol-vechile menzil-i mezkûr <<ânen fe-ânen müşrif-i harâb>> sagīr-i merkūmun müstakıllen uhdesinde olup lâkin menzil-i mezkûr ânen fe-ânen müşrif-i harâb olarak hâsılı harcına vefâ etmeyip bekāsı sagīr-i mezbûr hakkında muzır ve gayr-ı müfîd olduğundan mâ‘adâ sagīr-i mezbûrun nafaka ve kisveye dahi eşedd-i ihtiyâcı olup ben dahi mu‘sir olarak infâka gayr-ı muktedir olmamla menzil-i mezkûr bedel-i misliyle bâ-re’y-i mütevellî âhara ferâğ ve bedeli ahz ü kabz birle i‘mâl ve istirbâh olunup hâsıl olan ribhiyle infâk ve iksâ olunmak sagīr-i mezbûr hakkında her vechile enfa‘ ve evlâ olduğuna binâen işbu yedimde olup hâlâ kassâm-ı askerî fazîletlü Mehmed Emin Efendi ile Üçüncü Dâire-i Belediye taraflarından i‘tâ olunan memhûr bir kıt‘a tahmîn-i bedel pusulası mantûkunca menzil-i mezkûr bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla iki bin beş yüz guruş mukābelesinde bâ-re’y-i mütevellî âhara ferâğa izin taleb şüd. Fî 15 Ra sene [1]301 Şühûdü’l-hâl: Mehmed Ağa b. Mustafa, Ömer Ağa b. Kadri ve gayruhum.