Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 194 Hüküm no: 143 Orijinal metin no: [94-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mustafa Ağa’nın çocuklarına intikal eden evin satışı için Hacı Receb Ağa’nın vekil tayin edildiği Mustafa Zühdü, vekâlet: 1 kıt‘a Numara: 148, 40 guruş Anadolu’da Dersim vilâyeti dâhilinde Çemişgezek kazâsı kurâsından Gercini karyesinde sâkinler Hüseyin ve Hasan ve Ali ağalar evlâd-ı el-müteveffâ Mustafa Ağa b. Hasan taraflarından ber-vech-i âtî vekâlet iddi‘â eden karye-i mezkûr ahâlisinden Hacı Receb Ağa b. Halil zikri âtî menzil hissesine bi’l-emâne vâzı‘ü’l-yed olan hademeden el-Hâc Mehmed Efendi b. Osman mahzarında üzerine da‘vâ ve takrîr-i kelâm edüp Nezâret-i Haremeyn-i muhteremeyne mülhak evkāfdan merhûme Fatıma Hatun bt. Murad Ağa Vakfı müsakkafâtından Galata’ya muzâfe kasaba-i Beşiktaş’da Sinanpaşa-yı Atik mahallesinde Muhtâr-ı Evvel sokağında on dokuz numara ile murakkam ma‘lûmü’l-hudûd ve’l-müştemilât iki kıt‘a temessükle şehriye doksan akçe icâre-i müeccelelü bir bâb menzil babaları müteveffâ-yı mezbûr intikālinden gāibûn-ı mezbûrûn ile li-ebeveyn kız karındaşları kebîre Fatıma Hanım ve sagīre Seher ve Naciye’nin intikāl-i âdîye binâen bi’l-icâreteyn iştirâken ve şâyi‘an taht-ı tasarruflarında ve mezbûr el-Hâc Mehmed Efendi gāibûn-ı mezbûrûnun üç südüs hisse-i şâyi‘alarına teslîmleriyle bi’l-emâne vâzı‘ü’l-yed olup ancak gāibûn-ı mezbûrûn ber-vech-i muharrer mutasarrıf oldukları hisse-i şâyi‘a-i mezkûrelerini merkūmun yedinden nez‘ ü kabza ve ba‘de’l-kabz bedel-i misliyle bâ-re’y-i mütevellî âhara ferâğa ve bedelini ahz ü kabza ve makbûzumu kendülere irsâl ve îsâle ve husûs-ı mezkûr mütevakkıf olduğu umûrun küllîsine yedimde olup <> sene-i sâbıkā yani bin üç yüz senesi Zilhiccetü’ş-şerîfesinin yedinci günü târihiyle müverrah kazâ-i mezkûr nâibi es-Seyyid Abdüssamed Efendi’nin imzâ ve hâtemini hâviye bir kıt‘a vekâlet hücceti ve zahrında muharrer kazâ-i mezkûr <> Bidâyet Mahkemesi’nin memhûr mazbatası mantûklarınca mahkeme-i mezkûrda nâib-i mûmâ-ileyh huzûrunda tarafından beni bi’l-muvâcehe vekâlet-i mutlaka-i sahîha-i şer‘iye ile vekîl nasb ü ta‘yîn eylediklerinde ben dahi vekâlet-i mezkûreyi kabûl etmemle suâl olunup hisse-i şâyi‘a-i mezkûrdan keff-i yed ve bana teslîme mezbûr el-Hâc Mehmed Efendi’ye tenbîh olunmak bi’l-vekâle matlûbumdur dedikde gıbbe’s-suâl ol dahi cevâbında hisse-i şâyi‘a-i mezkûre <> gāibûn-ı mezbûrûnun ber-vech-i muharrer tasarruflarında olup kendüsü dahi hisse-i şâyi‘a-i mezkûreye bi’l-emâne vâzı‘ü’l-yed olduğunu tav‘an ikrâr mâ‘adâ müdde‘î-i [95] mezbûrun ber-vech-i muharrer vekâlet müdde‘âsını inkâr etmekle hüccet ve mazbata-i mezkûreler ba‘de’l-mütâla‘a hüccet-i mezkûrenin mührü mutâbık ve me‘âli vekâlet-i mezkûreyi beyândan ibâret idiği fetvâhâne-i celîleden tahşiye ve temhîr kılındığı ve mazmûnu müdde‘î-i mezbûrun takrîr-i meşrûhuna muvâfık ve mazbata-i mezkûre dahi hüccet-i mezkûreyi müeyyid ve musaddık olarak tezvîr ve tasnî‘den sâlim olduğu münfehim ve Mecelle-i Ahkâm-ı Adliyye’nin bin sekiz yüz yirmi birinci mâddesi hükmünce bu makūle tezvîr ve tasnî‘den sâlim olan senedât-ı şer‘iyenin mazmûnuyla bilâ-beyyine amel ve hükm câiz olmağla mûcebince müdde‘î-i mezbûrun vekâletine ba‘de’l-hükm hisse-i şâyi‘a-i mezkûreden keff-i yed ve müdde‘î-i vekîl-i mezbûr Hacı Receb Ağa’ya teslîme mezbûr el-Hâc Mehmed Efendi’ye tenbîh olunduğu Evkāf-ı hümâyûn beytü’l-mâl kassâmı fazîletlü Ahmed Bahâî Efendi inhâ etmeğin mâ-vaka‘a bi’t-taleb ketb olundu. Fî 3 Rebî‘ülâhir sene [1]301 Şühûdü’l-hâl: Ömer Ağa b. Abdulkadir, Mehmed Ağa b. Mustafa ve gayruhum.