Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 195 Hüküm no: 144 Orijinal metin no: [95-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Hafız Mustafa Cemal Efendi ile Hafız Ahmed Efendi’nin sahip oldukları vakıf cihetlerine ait işler için Mahmud Aziz Efendi’yi vekil tayin ettikleri < Numara: 158, 40 guruş Kaydı terkīn olunmuşdur. Fî 20 Ramazan Üsküdar’a muzâfe Eren karyesinde Sahrâ-yı Cedîd’de vâki‘ câmi‘-i şerîfin bâ-berât-ı âlî imâmı es-Seyyid Hafız Ahmed Efendi b. Eyüb li-ebeveyn er karındaşı İstanbul’da Balat kurbünde el-Hâc İsa mahallesinde sâkin es-Seyyid Hafız Mustafa Cemal Efendi hâzır olduğu hâlde Galata’ya muzâfe İstinye nâhiyesine tâbi‘ Yeniköy’de Osman Reis mahallesinde sâkin işbu bâ‘isü’l-kitâb Mahmud Aziz Efendi b. Ali mahzarında ikrâr-ı tam ve takrîr-i kelâm edüp Nezâret-i Evkāf-ı hümâyûna mülhak evkāfdan zikr olunan Balat nezdinde vâki‘ Ferruh Kethudâ Câmi‘-i şerîf ve Zâviyesi Vakfı’ndan almak üzere yevmî sekiz akçe vazîfe ile cibâyet-i musakkafât ciheti benim ve yine vakf-ı mezbûrdan almak üzere yevmî beş akçe vazîfe ile câbî enderûn ve bîrûn ciheti dahi hâl-i sıgārında tarafından ben bi’n-niyâbe edâ-yı hizmet etmek üzere karındaşım hâzır-ı mezbûr es-Seyyid Hafız Mustafa Cemal’in başka başka berât-ı âlî ile el-yevm uhdemizde olup ancak vakf-ı mezbûrun mütevellîsi Ahmed Sâbit Efendi b. Mehmed Tâhir vakf-ı mezkûr müsakkafât ve müstegallâtının icârâtı hakkında benim ile karındaşım hâzır-ı mezbûrdan da‘vâya tesaddî etmekle mütevellî-i mûmâ-ileyh ile husûmete ve red ve cevâba ve vakf-ı mezbûrun eyâdî‘i müstecirlerinden müterâkim icârâtını tahsîl ile mütevellî-i mûmâ-ileyhe i‘tâya ve mütevellî-i mûmâ-ileyh ile beynimizde olan muhâsebemizi rü’yete ve lede’l-iktizâ sulh ve ibrâya ve husûs-ı mezkûr mütevakkıf olduğu umûrun küllîsine karındaşım hâzır-ı mezbûr ile ma‘an tarafımızdan mûmâ-ileyh Mahmud Aziz Efendi’yi vekâlet-i mutlaka-i sahîha-i şer‘iye ile vekîl nasb ü ta‘yîn eylediğimizde ol dahi vekâlet-i mezkûreyi kabûl eyledikde mukırr-ı mezbûrun bi’l-cümle takrîr-i meşrûhunu karındaşım hâzır-ı mezbûr es-Seyyid Hafız Mustafa Cemal Efendi ile mezbûr Mahmud Aziz Efendi’den her biri tasdîk etmeğin mâ-vaka‘a bi’t-taleb ketb olundu. Fî 20 Safer sene [1]301 Şühûdü’l-hâl: Muhzır Ömer Ağa b. Abdulkadir, Muhzır Mehmed Ağa b. Mustafa ve gayruhum.>>