Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 196 Hüküm no: 145 Orijinal metin no: [96-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Bayramoğlu Halil Ağa’nın oğluna intikal eden dükkân arsasının satılmasına izin verilmesi Mahmiye-i İstanbul’da Bâb-ı Câferî kurbünde Ahîçelebi mahallesinde sâkin iken bundan akdem vefât eden Bayramoğlu Halil Ağa b. Mehmed Ağa’nın sulbî sagīr oğlu Ahmed’in vâlidesi ve tesviye-i umûruna bâ-hüccet-i şer‘iye vasîyy-i mansûbesi olup zâtı Evkāf-ı hümâyûn Münâdîsi Ahmed Ağa b. Abdullah b. Hasan ve Ömer Ağa b. Abdulkadir b. Abdullah nâm kimesneler ta‘rîfleriyle mu‘arrefe olan işbu bâ‘isetü’l-kitâb Havva Hanım bt. Abdullah bi’l-vesâye takrîr-i kelâm ve ta‘bîr ani’l-merâm edüp Nezâret-i Evkāf-ı hümâyûna mülhak evkāfdan Boğaziçi’nde Kanlıcak karyesinde vâki‘ merhûm İskender Paşa Vakfı müsakkafâtından zikr olunan Ahîçelebi mahallesinde Yoğurtçu sokağında kâin ma‘lûmü’l-hudûd ve’l-müştemilât şehriye altmış akçe icâre-i müeccelelü bir bâb dükkân arsasının on iki hisse i‘tibârıyla bir hissesi müteveffâ-yı mezbûrun hayatında bâ-temessük-i mütevellî bi’l-icâreteyn taht-ı tasarrufunda olup ba‘de vefâtihî sagīr-i mezbûra hasbe’l-âde intikāl edüp lâkin arsa-i mezkûrenin etrâfını muhît taş duvarları mürûr-ı ezmine ile münhedim ve enkāzı telef ve zâyi‘ olduğu zâhir ve bedîdâr olup ol-vechile bekāsı sagīr-i mezbûr hakkında muzır ve gayr-ı müfîd olduğundan mâ‘adâ sagīr-i mezbûrun nafaka ve kisveye dahi eşedd-i ihtiyâcı olmağla sagīr-i mezbûrun arsa-i mezkûrede olan ber-i‘tibâr-ı mezkûr bir sehm hisse-i şâyi‘ası bedel-i misliyle âhara ferâğ ve bedeli ahz ü kabz ve müteveffâ-yı mezbûrun Mahkeme-i Teftîş-i Evkāf Beytü’l-mâl Kassâmlığı cânibinden tahrîr olunan terekesi defter-i kassâmı zeyline idhâl birle i‘mâl ve istirbâh olunup hâsıl olan nemâsıyla infâk ve iksâ olunmak sagīr-i mezbûr hakkında vücûhla enfa‘ ve evlâ olduğuna binâen işbu yedimde olup Birinci Dâire-i Belediye tarafından i‘tâ olunan memhûr bir kıt‘a tahmîn-i bedel pusulası mantûkunca sagīr-i mezbûrun arsa-i mezkûrede olan bir hisse-i şâyi‘ası bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla iki bin iki yüz guruş mukābelesinde bâ-re’y-i mütevellî âhara ferâğa kıbel-i şer‘den bana izin verilmek bi’l-vesâye matlûbumdur dedikde. Fî-gurreti Rebî‘ülevvel sene [1]301 Şühûdü’l-hâl: Muhzır Mehmed Ağa b. Mustafa, Muhzır Ömer Ağa b. Abdulkadir ve gayruhum.