Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 197 Hüküm no: 146 Orijinal metin no: [96-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgancı Mehmed Arslan Efendi’den çocuklarına intikal eden gedik denilen âletlerin satılmasına izin verilmesi İsmail Hakkı, izin: 1 kıt‘a Numara: 205, 353 guruş Mahmiye-i İstanbul’da Kumkapı kurbünde Nişâncı Mehmedpaşa mahallesinde sâkin iken bundan akdem vefât eden Yorgancı Mehmed Arslan Efendi b. İbrahim’in sulbî sagīr oğulları Hüseyin Hüsnü <> ve Mustafa Hayri’nin vâlideleri ve tesviye-i emrlerine bâ-hüccet-i şer‘iye vasîyy-i mansûbeleri olup zâtı İstanbul’da Küçükayasofya mahallesinde sâkin Evkāf-ı hümâyûn Cihât Kalemi mümeyyiz-i sânîsi izzetlü Mehmed Nazif Efendi b. el-Hâc Mustafa b. Abdurrahman ve Sultan Ahmed kurbünde Kaba Sakal mahallesinde sâkin oda-i mezkûr ketebesinden Mehmed Tâhir Efendi b. İbrahim Edhem b. Mehmed ta‘rîfleriyle mu‘arrefe olan işbu bâ‘isetü’l-vesîka Esma Hanım bt. Hanifi bt. Mehmed bi’l-vesâye takrîr-i kelâm ve ta‘bîr ani’l-merâm edüp mahmiye-i mezbûrede Çarşı-yı kebîrde Yorgancılar içinde Yeşildirek nâm mahâlde Hacı Hasan sokağında vâki‘ 18 numara ile murakkam bir bâb yorgancı dükkânı derûnunda mevcûde Hazîne-i Haremeyn-i Muhteremeyn Evkāfı müstegallâtından gedik ta‘bîr olunur yevmî bir akçe ve mahmiye-i mezbûrede Çarşı-yı kebîrde Yorgancılar içinde Yeşildirek nâm mahâlde Hacı Hasan sokağında vâki‘ on sekiz numara ile murakkam bir bâb yorgancı dükkânı derûnunda mevcûde Hazîne-i Haremeyn-i Muhteremeyn Evkāfı müstegallâtından gedik ta‘bîr olunur yevmî bir akçe ve mahmiye-i mezbûrede Bitpazarı civârında Yüncüler Hanı demekle arîf hanın tahtânîsinde sol tarafda vâki‘ on numara ile murakkam bir bâb yün mahzeni derûnunda mevcûde hudâvendigâr-ı esbak cennet-mekân Sultan Mahmud Hân-ı sânî -tâbe serâhû- hazretleri evkāf-ı celîleleri müstegallâtından gedik ta‘bîr olunur kezâlik yevmî bir akçe icâre-i müeccelelü âlât-ı lâzıme-i ma‘lûmelerden her biri müteveffâ-yı mezbûrun hayatında bâ-temessükât-ı mütevellî nizâm bi’l-icâreteyn taht-ı tasarrufunda olup ba‘de vefâtihî sagīrân-ı mezbûrân ile sulbî kebîr oğlu Mahmud Cemil Efendi’ye hasbe’l-âde islâsen intikāl edüp lâkin gedik-i mezkûrların âletleri devr-i ezmine ile telef ve zâyi‘ olacağı zâhir ve bedîdâr olup ol-vechile bekāları sagīrân-ı mezbûrân haklarında muzır ve gayr-ı müfîd olduğundan mâ‘adâ sagīrân-ı mezbûrânın nafaka ve kisveye dahi eşedd-i ihtiyâçları olmağla sagīrân-ı mezbûrânın gedik-i mezkûrlarda olan sülüsân hisse-i şâyi‘aları bedel-i misilleri ve mütevellîleri re’yleriyle âhara ferâğ ve bedel ahz birle i‘mâl [97] ve istirbâh olunup hâsıl olan ribhiyle infâk ve iksâ olunmak sagīrân-ı mezbûrân haklarında her vechile enfa‘ ve evlâ olduğuna binâen işbu yedimde olup hâlâ kassâm-ı askerî fazîletlü Mehmed Emin Efendi ile Birinci Dâire-i Belediye Ser-mühendisliği’nden i‘tâ kılınan memhûr bir kıt‘a tahmîn-i bedel pusulası mantûkunca sagīrân-ı mezbûrânın gedik-i mezkûrlarda olan sülüsân hisse-i şâyi‘aları bundan akdem lede’l-müzâyede ve ba‘de’l-keşf el-yevm bedel-i misilleri idiği bi’l-ihbâr zâhir olan lira-yı Osmânî yüz guruş hesâbıyla mezkûr yorgancı gediğinde olan sülüsân hisse-i şâyi‘aları altı bin yüz altmış altı guruş yirmi altı para iki akçe ve mezkûr yüncü mağazası gediğinde olan sülüsân hisse-i şâyi‘aları dokuz yüz elli üç guruş on üç para bir akçe ki cem‘an yedi bin yüz yirmi guruş mukābelesinde âhara ferâğa izin taleb şüd. Fî-selhi Rebî‘ülevvel sene [1]301 Şühûdü’l-hâl: Kapı Çukadârı Bayram Ağa b. Ömer, Muhzır Mehmed Ağa b. Mustafa, Muhzırbaşı Ömer Ağa b. Kadri