Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 198 Hüküm no: 147 Orijinal metin no: [97-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat etmiş olan Seyyid Şeyh Hasan Hulki Efendi’nin küçük oğullarına nafaka tayini Mustafa Zühdü, nafaka Hazîne-i Evkāf-ı hümâyûndan mazbût cennet-mekân Sultan Abdülhamid Han hazretleri evkāf-ı şerîfeleri mülhakātından merhûm Abdullah Ağa arâzisinden medîne-i Üsküdar’a muzâfe İstavros karyesinde sâkin iken bundan akdem vefât eden es-Seyyid eş-Şeyh Hasan Hulki Efendi b. el-Hâc Mahmud’un sulbî sagīr oğlu Mehmed ve Celaleddin Molla’nın üvey vâlidesi ve tesviye-i umûruna bâ-hüccet-i şer‘iye vasîyy-i mansûbesi olup zâtı zeyl-i kitâbda muharrerü’l-esâmî Müslimîn ta‘rîfleriyle mu‘arrefe olan işbu bâ‘isetü’l-kitâb Âişe Sadıka Hanım bt. Abdullah’ın talebiyle sagīr-i mezbûrun babası müteveffâ-yı mezbûrdan mevrûs mâlı nemâsından işbu târih-i vesîkadan kadr-ı ma‘rûf idiği bi’l-ihbâr zâhir olan lira-yı Osmânî yüz guruş hesâbıyla şehriye yüz elli guruş kıbel-i şer‘den nafaka ve kisve-bahâ farz ve takdîr olunup meblağ-ı mefrûz-ı mezkûru sagīr-i mezbûrun nafaka ve kisve ve sâir levâzım-ı zarûriyesine harc ü sarfa ve lede’l-iktizâ istidâneye ve inde’z-zafer sagīr-i mezbûrun mâlı nemâsına rücû‘a vasîyy-i mezbûre Âişe Sadika Hanım’a izin verildiğini Mahkeme-i Teftîş Beytü’l-mâl Kassâmı fazîletlü Ahmed Bahâî Efendi inhâ etmeğin mâ-vaka‘a bi’t-taleb ketb olundu. Fî-gurreti Rebî‘ülevvel sene [1]301 Şühûdü’l-hâl: Muhzır Ömer Ağa b. Kadri, Muhzır Mehmed Ağa b. Mustafa ve gayruhum.