Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 199 Hüküm no: 148 Orijinal metin no: [97-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Anastaşya’dan çocuklarına kalan ve gedik denilen âletlerin satılmasına izin verilmesi Küçük Aziz, izin: 1 kıt‘a Numara: 140, 6,5 guruş Mahmiye-i İstanbul’da Hüsrev Paşa kurbünde kādıasker-i esbak Mehmed Efendi mahallesinde mütemekkine iken bundan akdem fevt olan teba‘a-i Devlet-i aliyyenin Rum milleti nisvânından Anastaşya bt. el-müteveffâ Koko v. Vasil’in sadrî sagīr oğulları Kosti ve Nidili ve Mihal ve sadriye sagīre kızları Beraşkeve ve Harkalye, babaları ve velîleri olup mu‘temedü’l-hâl idiği ihbâr olunan teba‘a-i müşârün-ileyhânın millet-i merkūmesinden Bağçevân Eftim v. Kosti v. Petro bi’l-velâye takrîr-i kelâm edüp mahalle-i mezbûrede Müdîr Mehmed Efendi sokağında üç numara ile murakkam ma‘lûmü’l-hudûd bir bâb bostan derûnunda mevcûde hudâvendigâr-ı esbak cennet-mekân Gāzi Sultan Mahmud Hân-ı sânî -tâbe serâhû- hazretleri evkāf-ı celîleleri müstegallâtından beyne’l-esnâf gedik ta‘bîr olunur yevmî on iki akçe icâre-i müeccelelü âlât-ı lâzıme-i ma‘lûme babası müteveffâ-yı merkūm Koko intikālinden müteveffât-ı merkūme Anastaşya ile li-ebeveyn karındaşı Tanaş’ın âdiyen bi’l-icâreteyn iştirâken ve şâyi‘an taht-ı tasarruflarında iken merkūme Anastaşya’nın dahi fevtiyle âlât-ı gedik-i mezkûrdan intikālen mutasarrıf olduğu nısf hisse-i şâyi‘ası sıgār-ı merkūmûn ile diğer sadrî sagīr oğlu Vasil’e hasbe’l-âde isdâsen ba‘de’l-intikāl sagīr-i merkūm Vasil’in dahi mu‘ahharan fevtiyle nısfdan bir südüs hisse-i şâyi‘ası mahlûl ve cânib-i vakf-ı müşârün-ileyhe âid ve râci‘ olup lâkin gedik-i [98] mezkûrun âlâtı mürûr-ı ezmine ile telef ve zâyi‘ olacağı zâhir ve bedîdâr olup ol-vechile bekāsı sıgār-ı merkūmûn haklarında muzır ve gayr-ı müfîd olduğundan mâ‘adâ sıgār-ı merkūmûnun nafaka ve kisveye dahi eşedd-i ihtiyâçları olup ben dahi mu‘sir olarak infâka gayr-ı muktedir olmamla sıgār-ı merkūmûnun âlât-ı gedik-i mezkûrda olan nısfdan beş südüs hisse-i şâyi‘ası bedel-i misliyle bâ-re’y-i mütevellî âhara ferâğ ve bedeli ahz ü kabz birle i‘mâl ve istirbâh olunup hâsıl olan ribhiyle infâk ve iksâ olunmak sıgār-ı merkūmûn haklarında her vechile enfa‘ ve evlâ olduğuna binâen işbu yedimde olup hâlâ kassâm-ı askerî fazîletlü Mehmed Emin Efendi tarafından memhûr bir kıt‘a ilmühaber mûcebince sıgār-ı merkūmûnun âlât-ı gedik-i mezkûrede olan beş südüs hisse-i şâyi‘aları bundan akdem lede’l-müzâyede ve gıbbe inkı[tâ]‘i’r-rağbe el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla bin üç yüz yetmiş beş guruş mukābelesinde bâ-re’y-i mütevellî âhara ferâğa izin taleb şüd. Fî 3 Rebî‘ülâhir sene [1]301 Şühûdü’l-hâl: Ömer Ağa b. Kadri, Mehmed Ağa b. Mustafa ve gayruhum.