Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 200 Hüküm no: 149 Orijinal metin no: [98-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Babaları Sarraç Hüseyin Ağa’nın vefatıyla çocuklarına kalan evin satılmasına izin verilmesi Seyda Efendi, izin: 1 kıt‘a Numara: 208, harc: 60 guruş Mahmiye-i İstanbul’da Kādıçeşmesi kurbünde Yarhisâr Mustafa Muslihiddin mahallesinde sâkin [iken] bundan [akdem] vefât eden sarrâc esnâfından Hüseyin Ağa b. Mehmed’in sulbiye sagīre kızları Kübra ve Zeliha’nın vâlideleri ve tesviye-i umûrlarına bâ-hüccet-i şer‘iye vasîyy-i mansûbeleri olup zâtı Kısmet-i Askeriye Mahkemesi muhzırlarından Ali Ağa b. Ahmed b. Abdullah ve Mahkeme-i Teftîş muhzırlarından Mehmed Ağa b. Mustafa b. Mehmed Emin ta‘rîfleriyle mu‘arrefe olan işbu bâ‘isetü’l-kitâb Fatıma Hanım bt. Salih bi’l-vesâye takrîr-i kelâm ve ta‘bîr ani’l-merâm edüp merhûme Cennet Hatun Vakfı müsakkafâtından mahalle-i mezkûrede Medrese sokağında kâin on beş numara ile murakkam ma‘lûmü’l-hudûd ve’l-müştemilât beher şehr otuz akçe icâre-i müeccelelü bir bâb menzil müteveffâ-yı mezbûrun hayatında bâ-temessük-i mütevellî bi’l-icâreteyn taht-ı tasarrufunda olup ba‘de vefâtihî sagīretân-ı mezbûretâna hasbe’l-âde münâsafeten intikāl edüp lâkin menzil-i mezkûr ânen fe-ânen müşrif-i harâb olarak hâsılı harcına vefâ etmeyip bekāsı sagīretân-ı mezbûretân haklarında muzır ve gayr-ı müfîd olduğundan mâ‘adâ sagīretân-ı mezbûretânın nafaka ve kisveye dahi eşedd-i ihtiyâçları olmağla sagīretân-ı mezbûretânın menzil-i mezkûru bedel-i misliyle bâ-re’y-i mütevellî âhara ferâğ ve bedeli ahz ü kabz birle i‘mâl ve istirbâh olunup hâsıl olan ribhiyle infâk ve iksâ olunmak sagīretân-ı mezbûretân haklarında her vechile enfa‘ ve evlâ olduğuna binâen işbu yedimde olup hâlâ kassâm-ı askerî fazîletlü Mehmed Emin Efendi ile İkinci Dâire-i Belediye tarafından i‘tâ olunan memhûr bir kıt‘a tahmîn-i bedel pusulası mantûkunca sagīretân-ı mezbûretânın menzil-i mezkûru bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr <> zâhir olan lira-yı Osmânî yüz guruş hesâbıyla on iki bin guruş mukābelesinde bâ-re’y-i mütevellî âhara ferâğa izin taleb şüd. Fî 3 Rebî‘ülâhir sene [1]301 Şühûdü’l-hâl: Bayram Ağa b. Ömer, Ömer Ağa b. Kadri ve gayruhum. Derûn-ı hüccetde bast ü beyân olunduğu üzere vasîyy-i mezbûre Fatıma Hanım sagīretân-ı mezbûretânın menzil-i mezkûrunu bedel-i misli idiği mütehakkık olan on iki bin guruş mukābelesinde Muhzır Ali Ağa’ya ol dahi der‘akab meblağ-ı mezkûr mukābelesinde vasîyy-i mezbûre Fatıma Hanım’a kat‘iyyen ba‘de’l-ferâğ vasîyy-i mezbûre Fatıma Hanım sagīretân-ı mezbûretânın müşterek mâllarından ve li-ecli’l-idâne vasî nasb olunan mezbûr Ali Ağa yedinden istidâne ve kabz eylediği lira-yı Osmânî yüz guruş hesâbıyla on iki bin guruş deyni mukābelesinde sagīretân-ı mezbûretâna vefâen ferâğ ve tefvîz edeceğinden ol-vechile ferâğları bi’l-icrâ sened-i hâkānîsi i‘tâ olunmak üzere işbu mahalle şerh verildi. Fî 3 R sene [1]301