Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 201 Hüküm no: 150 Orijinal metin no: [99-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yusuf Kâmil Paşa’nın hanımı Zeyneb Hanım’ın üç vakfına dair vakfiyesi Mümeyyiz-i evvel Efendi 5.000 guruş Kaydı ihrâc olunmuşdur. Fî 13 Rebî‘ülâhir sene [1]328, Müfid (mühür) Kaydı ihrâc olunmuşdur. Fî 16 Cumâdelûlâ sene [1]339, Yunus Kaydı ihrâc şüd. Fî 22 Zilka‘de sene [1]339, Yunus Kaydı ihrâc şüd. Fî 26 Zilka‘de sene [1]339, Yunus Kaydı ihrâc şüd. 14 Receb sene 1342, Yunus Bir sûreti çıkmışdır. 14 Kânûn-ı sânî sene [1]929, Mustafa Bir sûret ihrâc. 28 Haziran [1]929, Mustafa Bir sûreti ihrâc şüd. 1 Nisan sene [1]944, Hikmet? Uhbirtü bimâ-fîhi min-tebdîli’ş-şurût ale’n-nehci’l-mebsût ve ene’l-fakīr ilâ âlâi Rabbihi’l-Gaffâr Bedreddin Efendizâde es-Seyyid Ahmed Muhtâr el-müfettişü li-umûri’l-evkāf -gufire lehümâ- İşbu cild-i vâhidde muharrer üç kıt‘a vakfiye-i celîlenin hilâl-i sutûrlarında münderice evkāf-ı şerîfenin vâkıfesi ve bi’l-meşrûta mütevelliyesi sadr-ı esbak merhûm Yusuf Kâmil Paşa hazretleri halîle-i muhteremeleri zât-ı ismetâneleri zeyl-i kitâbda muharrerü’l-esâmî zevât ta‘rîfleriyle mu‘arrefe fahrü’l-muhadderât zübdetü’l-muvakkarât sâhibetü’l-hayrât ve’l-meberrât ve râgıbetü’l-ecr ve’l-mesûbât iffetlü ismetlü Zeyneb Hanımefendi hazretleri ibnetü’l-merhûmü’l-mebrûr Mısır vâlîsi esbak el-Hâc Mehmed Ali Paşa savb-ı şer‘-i enverden bi’l-iltimâs me’zûnen ta‘yîn ve irsâl olunan Mümeyyiz-i evvel Mevlana İbrahim Âsım Efendi b. Emin Efendi’nin mahmiye-i İstanbul’da Sultan Bâyezid Hân-ı Velî Câmi‘-i şerîfi kurbünde vâki‘ şeref-re’s-i ikāmet oldukları konaklarında zevât-ı mûmâ-ileyhim haklarında akd eylediği meclisde ikrâr-ı tam ve takrîr-i kelâm buyurup işbu vakfiye-i ûlâmda ber-tafsîl tasrîh ü beyân olunduğu üzere vakf ve tescîline muvaffaka olduğum mahrûse-i Mısır’da zâhir-i Özbekiye’de kâin derûn-ı vakfiyede muharrer hudûd ile mahdûd biri hâriciye ve diğeri dâhiliye iki bâb saray ve yine mahâll-i mezkûrda kâin kezâlik hudûd-ı muharrere ile mahdûd bir bâb lokanta ve Minyetüssirec nâm mahâlde vâki‘ kezâlik hudûd-ı muharrere ile mahdûd <> Şubra Sarayı ve Bağçesi demekle ma‘rûf sarayı müştemil bir kıt‘a bağçe ve etrâfında kâin bağçe-i mezkûra teb‘iyetle tasarruf olunan kezâlik her biri hudûd-ı muharrere ile mahdûd arâzi ile mahâll-i ma‘lûmede kâin çiftlikler ve tevâbi‘âtından olan ar[â]zî ve sâirenin bi’l-cümle galle ve menâfi‘ini mütena‘im-i ni‘am-ı hayat oldukça nefsime ve vâsıl-ı civâr-ı rahmet olduğumda hâdis olacak evlâd-ı zükûr ve inâsıma ve onlardan her birinin vefâtlarında hisseleri derûn-ı vakfiyede beyân olunan tertîb üzere evlâdlarına min-gayri zürriyetin irtihâl eder isem galle ve menâfi‘-i mezkûrenin yirmi dört kırat i‘tibârıyla südüsü olan dört kırat hissesini zevcim müteveffâ-yı müşârün-ileyhe ba‘dehû tertîb-i mezkûr üzere evlâd-ı evlâd-ı evlâdına zevcim müşârün-ileyh dahi an-gayri zürriyetin vefât eder ise hisse-i mezkûrenin sülüsün Câmi‘-i Ezher mühimmâtına ve sülüsânını nân-pâre olmak üzere ulemâ-i Hanefiye’den câmi‘-i şerîf-i mezkûr müderris[lerine] ve yine galle-i mezkûrenin rub‘u olan altı kırat hissesini dahi benimle zevcim müteveffâ-yı müşârün-ileyhin utekā-i utekāmıza onlardan her birinin vefâtlarında hisseleri tertîb üzere evlâd-ı evlâd-ı evlâdlarına ve ba‘de’l-inkırâz hisse-i mezkûrenin sülüsünü câmi‘-i şerîf-i mezkûr mühimmâtına ve sülüsânını nân-pâre <> olarak ulemâ-i Şâfi‘iye ve Mâlikiye’den câmi‘-i şerîf-i mezkûr müderrislerine ve yine menâfi‘-i mezkûrenin sümünü olan üç kırat hissesi dahi zükûr ve inâs hüddâmımdan hayatımda ile’l-vefât hizmetimde olanlar ile saraylarımda Kur’ân-ı azîmü’ş-şân kırâet edenlere irtihâlimden sonra utekā hissesine zam olunup utekā hissesinin şurûtun-lehlerine ve yine galle-i merkūmenin sülüs-i sümünü olan bir kırat hissesini dahi Mısır kal‘asında kâin benimle pederim müteveffâ-yı müşârün-ileyhin mescid-i şerîfimizde beher sene mevlid-i şerîf ve Kur’ân-ı azîm kırâetı ve mu‘ayyenât-ı sâire-i ma‘lûma ve yine galle-i merkūmenin nısf-ı südüsü olan iki kırat hissesini dahi pederim merhûm-ı müşârün-ileyhin fukarâ ve muhtâc olan utekāsının zükûr ve inâsına seviyyen taksîm olunup ba‘de’l-inkırâz zikri âtî sekiz kırat hisseye zamla sarf olunarak hisse-i mezkûrenin meşrûtün-lehlerine ve yine galle-i merkūmenin sülüsü olan sekiz kırat hissesini dahi mahrûse-i Mısır’da kâin Mevlana İmâm Ebî Abdullah el-Hüseyin ve Seyyide Şerife Zeyneb ve Seyyide Sekine -rıdvânullâhi te‘âlâ aleyhim- hazerâtı mescid-i şerîfleriyle mesâcid-i sâire-i ma‘lûme ve Gülşenî ve Mevlevî tekyeleri mesâlih ve mühimmâtlarıyla fukarâlarına ta‘yîn ve tahsîs edüp husûs-ı mezkûrenin cihât-ı mezkûreye sarfı müte‘azzir olur ise menâfi‘-i mezkûrenin her nerede olur ise olsun fukarâ ve mesâkîn-i Müslimîne sarf olunmasın ve tevliyetini dahi hayatda oldukça nefsime ve âzim-i dâr-ı gufrân olduğumda istihkāklarında olan tabakātları tertîbi üzere hâdis olacak evlâdımın ve onların evlâd-ı evlâdlarının erşedine ve nezâreti dahi Mısır vâlîsi bulunan zevât-ı kirâma ve vakfiye-i sâniyem mûcebince Üsküdar’a muzâfe Kartal kasabasında kâin iki aded çeşmeler mühimmâtı içün nukūdvakfımın tevliyetini dahi kazâ-i mezkûr meclis a‘zâsından Abdi Efendi’ye ba‘de vefâtihî hükûmet-i şer‘iye ve a‘zâ-i meclis re’yleriyle mütedeyyin ve müstakīm bir kimesneye, vakfiye-i sâlisemde muharrer Üsküdar’da kâin hayatında zevcim müteveffâ-yı müşârün-ileyh ile müştereken binâ ve inşâsına muvaffak olduğumuz hastahâne ve hayrât-ı sâire mühimmâtı içün tescîl eylediğimiz vakfımızın tevliyetini dahi hayatda oldukça zevcim müteveffâ-yı müşârün-ileyh ile müştereken nefsimize ve bizden sonra mâliye nâzırı bulunan zevât-ı kirâma şart ve ta‘yîn edüp evkāf-ı selâse-i mezkûrenin tebdîl ü tağyîr ve teksîr ve idhâl ü ihrâcını merreten ba‘de uhrâ yed ve meşiyetimizde ibkā etmiş idik. El-hâletü hâzihî zevcim müşârün-ileyh ile mütevellî-i mûmâ-ileyh Abdi Efendi irtihâl-i dâr-ı bekā edüp benimle zevce-i müteveffâ-yı müşârün-ileyhin evlâd ve ahfâdından kat‘a zürriyetim olmadığına [100] binâen vakfiye-i ûlâmda muharrer olan evkāfımdan ancak zikr olunan Özbekiye Sarayı ve lokantası ve sagīr Şubra Sarayı’nı müştemil bağçe ve ona bâliğ arâzinin galle ve menâfi‘inin cihât-ı mu‘ayyene-i mezkûreye ve mârrü’z-zikr dört kırat galle hissesinin dahi evlâd-ı evlâd-ı evlâda sarf olunması ve nezâretinin dahi vâlî olanlara ve vakfiye-i sâniyemde münderic vakfım tevliyetinin dahi mûmâ-ileyh Abdi Efendi’den sonra Kartal kazâsı meclis-i a‘zâlarının re’yleriyle bir mütedeyyin ve müstakīm kimesneye ve vakfiye-i sâlisemde mastûr vakfın tevliyetinin dahi mâliye nâzırı bulunan zevât-ı kirâma eylediğim şartlarımdan rücû‘ edüp müceddeden şu vechile şart ve ta‘yîn eyledim ki, evkāf-ı selâse-i mezkûreme bi-fazlillâhi te‘âlâ dâire-i sıhhat ve âfiyetde dâim oldukça kendim mütevellî ve vakfiye-i ûlâmda muharrer vakfımın bi’l-cümle menâfi‘ine ber-mûceb-i vakfiye keyfe mâ yeşâ ve yehtâr mutasarrıfe oldum, rıhlet-i dâr-ı karâr eylediğimde evkāf-ı selâse-i mezkûreye li-ebin birâderim devletlü Halim Paşa hazretleri mütevellî olup vakfiye-i ûlâmda münderic evkāfımdan ancak mârrü’z-zikr Özbekiye Sarayı ve lokanta ve Şubra Sarayı’nı müştemil bağçe ve ona bâliğ arâzinin galle ve menâfi‘ine müstakıllen mutasarrıf ola, birâderim müşârün-ileyhden sonra galle ve menâfi‘-i merkūmeye birâderim müşârün-ileyhin evlâdının ve evlâd-ı evlâdının ve evlâd-ı evlâd-ı evlâdının zükûr ve inâsı batnen ba‘de batnin ve neslen ba‘de neslin seviyyen mutasarrıf olalar, ba‘de’l-inkırâz galle ve menâfi‘-i merkūme yine vakf-ı mezkûrumun galle ve menâfi‘-i sâiresine zammü ilâve olunarak vakfiye-i ûlâmda münderic meşrûta mûcebince meşrûtün-lehlerine harc ü sarf oluna ve evkāf-ı selâse-i mezkûreye dahi akrabâ ve utekāmızdan ve evlâd-ı evlâd-ı evlâdlarından birâderim müşârün-ileyhin hayatında intihâb ve ihtiyâr edeceği zât mütevellî ola, ol dahi irtihâl-i dâr-ı bekā eyledikde kezâlik onun hayatında intihâb edeceği zât mütevellî ola ondan sonra dahi ile’l-ebed minvâl-i meşrûh üzere amel oluna, eğer mütevellîlerden biri hayatında tevliyete bir zâtı intihâb etmeksizin vefât eder ise o hâlde akrabâ ve utekāmdan ve evlâd-ı evlâd-ı zükûrlarından aslah ve erşed ve a‘kal ve a‘lemi mütevellî ola ve ancak Mısır’da olan vakfıma şeyhü’l-harem bulunan zevât-ı kirâm hasbî nezâret buyuralar ve evkāf-ı selâse-i mezkûremin tebdîl ü tağyîr ve taklîl ü teksîr ve idhâl ü ihrâcı kemâ-kân merreten ba‘de uhrâ yed ve temşiyetimde ola ve sâlifü’l-beyân üç kıt‘a vakfiyelerimde münderic olan bi’l-cümle şurût ve kuyûdumla kemâ-fi’s-sâbık amel oluna deyü hatm-i kelâm ve ifâde-i merâm buyurmalarıyla hıfzen li’l-makāl işbu mahalle zeyl olundu. Fî 23 Zilhicce sene 1300 Şühûdü’l-hâl: Mustafa Hami Efendi b. İbrahim, Hazîne Kâtibi Yusuf Efendi b. Abdülaziz, Vekîlharç Ali Ağa b. Ali, Arapgirli es-Seyyid Mehmed Şevket Efendi b. el-Hâc Hüseyin ve gayruhum.