Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 204 Hüküm no: 151 Orijinal metin no: [100-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İcra Reisi Ahmed Şevket Bey’in vefatıyla çocuklarına kalan sahilhane ve ahırın satılmasına izin verilmesi Salih ve Lütfi, izin: 1 kıt‘a Numara: 198, 161 guruş 30 Medîne-i Üsküdar’a muzâfe Çengel karyesinde sâkin iken bundan akdem irtihâl-i dâr-ı bekā eden İcrâ Reisi Ahmed Şevket Beyefendi b. el-merhûm İsmail Bey b. Abdullah’ın sulbî sagīr mahdûmları İsmail Saad ve Cavid beyler ve sulbiye sagīre-i kerîmeleri Nesime ve Bedia hanımların vâlideleri ve tesviye-i emirlerine vasîyy-i mansûbeleri Âişe Naciye Hanım bt. el-merhûm İbrahim Paşa b. el-merhûm Ömer Paşa’nın birâderi olup tarafından umûr-ı vesâyeti idâre ve rü’yete vekîl olduğunu zâtını ârifân Evkāf-ı hümâyûn Nezâret-i celîlesi sâbık mühürdârı izzetlü Abdullah Efendi b. el-Hâc Mustafa b. Abdullah ve Vâlide Hastahânesi Vekîlharçı Niyazi Bey b. Mehmed İzzet b. Abdullah nâm kimesneler haberleriyle zâhir olan Dokuzuncu Dâire-i Belediye muhâsebecisi işbu râfi‘ü’l-kitâb izzetlü Mehmed Beyefendi bi’l-vekâle takrîr-i kelâm ve ta‘bîr ani’l-merâm edüp Nezâret-i Evkāf-ı hümâyûn’a mülhak evkāfdan Bâbüssa‘âde Ağası esbak merhûm Gazanfer Ağa-yı Atik Vakfı müsakkafâtından Galata’ya muzâfe kasaba-i Beşiktaş’a tâbi‘ Kuruçeşme nâm mahâlde Kesriyeli Ahmed Paşa Yalısı demekle arîf Kuruçeşme caddesinde yetmiş dokuz numara ile murakkam ma‘lûmü’l-hudûd ve’l-müştemilât iki kıt‘a mütevellî temessükü mantûkunca şehriye yüz yirmi akçe icâre-i müeccelelü bir bâb sâhilhâne ve yüz altı numara ile murakkam ma‘a-müştemilât bir bâb âhûrdan her birinin sülüs hisse-i şâyi‘aları müteveffâ-yı müşârün-ileyhin hayatında bi’l-icâreteyn şâyi‘an taht-ı tasarrufunda olup ba‘de vefâtihî sıgār-ı mûmâ-ileyhim ile sulbiye kebîre kerîmeleri Zekiye ve Mükerrem ve Safvet hanımlara isbâ‘an intikāl edüp lâkin sâhilhâne ve âhûr-ı mezkûrlar müşrif-i harâb olup hâsılı harcına vefâ etmediğinden sıgār-ı mûmâ-ileyhimin sülüs hisse-i şâyi‘a-i mezkûrelerde olan dört sübu‘ hisse-i şâyi‘aları bedel-i misli ve ma‘rifet-i mütevellî ile âhara ferâğ ve bedeli ahz ü kabz birle i‘mâl ve istirbâh olunup hâsıl olan nemâsıyla hıfz olunmak sıgār-ı mûmâ-ileyhim haklarında her vechile enfa‘ ve evlâ olduğuna binâen işbu yedimde olup hâlâ kassâm-ı askerî fazîletlü Mehmed Emin Efendi ile Dördüncü Dâire-i Belediye tarafından i‘tâ olunan memhûr bir kıt‘a tahmîn-i bedel pusulası mantûkunca sıgār-ı mûmâ-ileyhimin sâhilhâne ve âhûr-ı mezkûrda olan sülüsden dört rub‘ hisse-i şâyi‘aları bundan [101] akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla otuz üç bin üç yüz elli yedi guruş on sekiz <> akçe mukābelesinde bâ-re’y-i mütevellî âhara ferâğa izin taleb şüd. Fî 24 Rebî‘ülevvel esne [1]301 Şühûdü’l-hâl: Muhzırbaşı Ömer Ağa b. <> Abdulkadir, Muhzır Mehmed Ağa b. Mustafa ve gayruhum.