Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 205 Hüküm no: 152 Orijinal metin no: [101-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden İcra Reisi Ahmed Şevket Bey’in çocuklarına kalan sahilhane, mâ-i leziz ve ahırın satılmasına izin verilmesi Salih ve Lütfi, izin Numara: 199, 116,5 guruş Medîne-i Üsküdar’a muzâfe Çengel karyesinde sâkin iken bundan akdem irtihâl-i dâr-ı bekā eden İcrâ Reisi Ahmed Şevket Beyefendi b. el-merhûm İsmail Bey b. Abdullah’ın sulbî sagīr mahdûmları İsmail Saad ve Cavid beyler ve sulbiye sagīre-i kerîmeleri Nesime ve Bedia hanımların vâlideleri ve tesviye-i emrlerine vasîyy-i mansûbeleri Âişe Naciye Hanım ibnetü’l-merhûm İbrahim Paşa b. el-merhûm Ömer Paşa’nın birâderi olup tarafından umûr-ı vesâyeti idâre ve rü’yete vekîl olduğu zâtını ârifân Evkāf-ı hümâyûn Nezâret-i celîlesi sâbık mühürdârı izzetlü Abdullah Efendi b. el-Hâc Mustafa b. Abdullah ve Vâlide Hastahânesi Vekîlharcı Niyazi Bey b. Mehmed İzzet b. Abdullah nâm kimesneler haberleriyle zâhir olan Dokuzuncu Dâire Muhâsebecisi işbu râfi‘ü’l-kitâb izzetlü Mehmed Beyefendi bi’l-vekâle takrîr-i kelâm ve ta‘bîr ani’l-merâm edüp Nezâret-i Evkāf-ı hümâyûna mülhak evkāfdan merhûm Çerkes Mehmed Ağa Türbe-i şerîfi Vakfı müsakkafâtından karye-i mezkûrede ve caddesinde vâki‘ dört numara ile murakkam ma‘lûmü’l-hudûd ve’l-müştemilât şehriye yüz yirmi akçe icâre-i müeccelelü bir bâb sâhilhâne ve derûnuna cârî mülhak olduğu vakfına senevî üç guruş hakk-ı mecrâ verilmek üzere kanevâtına teba‘iyetle bâ-hüccet-i şer‘iye mülkiyet üzere bir hilâl mâ-i lezîz ve yine Evkāf-ı hümâyûn Nezâreti’ne mülhak evkāfdan merhûm el-Hâc Mehmed Efendi Vakfı müsakkafâtından sâhilhâne-i mezkûr verâsında vâki‘ kezâlik ma‘lûmü’l-hudûd şehriye otuz akçe icâre-i müeccelelü mukaddemâ menzil ve el-yevm harâb âhûrdan her birinin nısf hisse-i şâyi‘aları müteveffâ-yı müşârün-ileyhin hayatında bâ-temessükât-ı mütevellî bi’l-icâreteyn taht-ı tasarrufunda olup ba‘de vefâtihî sıgār-ı mûmâ-ileyhim ile sulbiye kebîre kerîmeleri Zekiye ve Mükerrem ve Safvet hanımlara isbâ‘an intikāl edüp lâkin sâhilhâne ve âhûr-ı mezkûrdan kibâr-ı mûmâ-ileyhimin dört sübu‘ hisse-i şâyi‘aları dahi kibâr-ı mûmâ-ileyhim ve diğer şerîklerinin hisseleriyle ma‘an bedel-i misilleri ve mütevellîleri re’yleriyle âhara ferâğ ve bedelleri ahz ü kabz birle i‘mâl ve istirbâh olunup hâsıl olan nemâsıyla hıfz olunup sıgār-ı mûmâ-ileyhim haklarında enfa‘ ve evlâ olduğuna binâen işbu yedimde olup hâlâ kassâm-ı askerî fazîletlü Mehmed Emin Efendi ile Sekizinci Dâire-i Belediye tarafından i‘tâ kılınan memhûr bir kıt‘a tahmîn-i bedel pusulası mantûkunca sıgār-ı mûmâ-ileyhimin nısf hisse-i şâyi‘a salhâne ve mâ-i lezîz ve âhûr-ı mezkûrlarda olan dört sübu‘ hisse-i şâyi‘aları bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla yirmi üç bin yüz kırk dört guruş mukābelesinde mütevellîleri re’yleriyle âhara ferâğa izin taleb şüd. Fî 24 Rebî‘ülevvel sene [1]301 Şühûdü’l-hâl: Muhzırbaşı Ömer Ağa b. Abdulkadir, Muhzır Mehmed Ağa b. Mustafa ve gayruhum.