Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 119 Hüküm no: 50 Orijinal metin no: [7a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Angeli v. Varsami’nin çocukları Yanaki ve Sultana’ya intikal eden ev ve bahçe ve haksız müdahalenin önlenmesi Havâss-ı aliyye kazâsı nevâhîsinden Küçük Çekmece nâhiyesinde Safra nâm karye sükkânından iken hâlik olan Angeli v. Varsami nâm zimmînin hasren vârisleri olan sulbî kebîr oğlu Yanaki nâm zimmî ile sulbiye kebîre kızı Sultana nâm nasrâniyeden her biri meclis-i şer‘-i şerîfde karye-i mezbûre sükkânından Yani v. Panayot nâm zimmînin sulbî oğlu ve tarafından husûs-ı âti’l-beyâna vekîli olduğu karye-i mezbûre sükkânından Limri? v. Dimitri ve Dolo v. Todori nâm zimmîler şehâdetleri ile şer‘an sâbit olan Hürmüz nâm zimmî muvâcehesinde da‘vâ ve takrîr-i kelâm edip karye-i mezbûrede vâki‘ bir tarafdan müvekkil-i mezbûr Yani mülkü ve iki tarafdan Dimo v. Trandafilo mülkü ve bir tarafdan tarîk-i âm ile mahdûd fevkānî bir bâb oda ve önünde bir sofa ve tahtânî bir matbah ve bir kenîf ve havluyu müştemil menzilin ale’l-iştirâk mâlikleri olan müvekkil-i mezbûr Yani ile karındaşları gāibûn ani’l-meclis Mihal ve Hristo ve Yorgo evlâd-ı Panayot ve Laskari v. Dimitri ve Dimo v. Trandafilo nâm zimmîler babamız hâlik-i mezkûr Angeli’ye hâl-i hayâtında bin elli dokuz senesi şehr-i Rebî‘ulevveli’nin yirminci gününden on üç bin akçe semen-i makbûza ve yine karye-i mezbûrede vakı‘a bir tarafdan babamız hâlik-i mezbûrdan bizim ikimize müntakil mülk bahçe ve bir tarafdan Laskarina nâm nasrâniye tarlası ve bir tarafdan yine babamız hâlik-i mezbûrdan bizim ikimize intikāl-i âdî ile müntakile bir kıt‘a tarla ve bir tarafdan tarîk-i âm ile mahdûde kezâlik ale’l-iştirâk mülkleri olan hadîkayı yine babamız hâlik-i mezbûra hâl-i hayâtında târih-i mezkûrda üç bin akçe semen-i makbûza bey‘ ve teslîm edip ol dahi iştirâ ve tesellüm eyleyip hattâ müvekkil-i mezbûr Yani ile gāibûn-ı mezbûrûn Mihal ve Hristo ve Yorgo ve Laskari ve Dimo’dan her biri târih-i mezbûrda nâhiye-i mezkûrede nâ‘ibü’ş-şer‘ olan mevlânâ Mustafa Efendi huzûrunda menzil-i mezkûr ile hadîka-i mezbûreyi vech-i meşrûh üzre bey‘ ve semenlerini kabz ettiklerini ikrâr etmeleri ile mevlânâ-yı mûmâ-ileyh Mustafa Efendi ba‘de’t-tahrîr işbu hüccet-i şer‘iyyeyi verip ol vechile menzil-i mezkûr ile hadîka-i mezbûra babamız mezbûr Angeli’nin ile’l-helâk mülk-i müşterâsı olup ba‘de helâkihî bi hasebi’l-irsi’ş-şer‘î bizim ikimize isâbet ve intikāl etmiş iken müvekkil-i mezbûr Yani menzil-i mezkûr ile hadîka-i mezbûreye bi gayrı hakkın vaz‘-ı yed eder suâl olunup kasr-ı yedine tenbîh olunmak matlûbumuzdur deyû min külli’l-vücûh takrîr-i meşrûhlarını nâtıka ve târih-i mezbûr ile müverraha ve mûmâ-ileyh Mustafa Efendi’nin imzâsıyla mümzât ve hatmiyle mahtûme hüccet-i şer‘iyye ibrâz edip vekîl-i mezbûr muvâcehesinde feth ve kırâat ve istintâk olundukda mazmûn-ı hücceti inkâr edicek müdde‘iyân-ı mezbûrân Yanaki ve Sultana’dan mazmûn-ı hüccet-i merkūmeyi mübeyyine beyyine taleb olundukda zeyl-i hüccetle isimleri mastûr olan udûl-i müslimînden İsmail Çelebi b. Mehmed ve Mustafa Beşe b. Abdullah nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ müvekkil-i mezbûr Yani ile gāibûn-ı mezbûrûn Mihal ve Hristo ve Yorgo ve Laskari ve Dimo’dan her biri hâlik-i mezbûr Angeli’ye hâl-i hayâtında târih-i mezbûrda bizim huzûrumuzda menzil-i mezkûrun on üç bin akçe semen-i makbûz ve hadîka-yı mezkûreyi üç bin akçe semen-i makbûza bey‘ ve teslîm edip ol dahi iştirâ ve tesellüm eyleyip hattâ vech-i meşrûh üzre akdeyn-i mezbûreyn ve kabz-ı semeneyn-i mezkûreyni müvekkil-i mezbûr Yani ile gāibûn-ı mezbûrûn mevlânâ-yı mûmâ-ileyh Mustafa Efendi huzûrunda ikrâr etmeleriyle işbu mülknâme hüccetini vermişdir biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye ettiklerinde gıbbe ri‘âyeti şerâiti’l-kabûl şehâdetleri makbûle olmağın mûcebince ba‘de’l-hükm menzil-i mezbûr ile hadîka-i mezbûreden müvekkil-i mezbûrun kasr-ı yedine vekîl-i mezbûra tenbîh birle mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min şehri Rebî‘ilâhir li sene seb‘a ve seb‘în ve elf. Şuhûdü’l-hâl: Şükrullah Bey b. Mustafa, Abdi Çelebi b. Hüseyin, İbrahim Çelebi b. Ahmed, Mehmed Bey b. Ramazan.