Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 206 Hüküm no: 153 Orijinal metin no: [101-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Ahmed Şevket Bey’den çocuklarına kalan konak ve bahçenin satılmasına izin verilmesi Medîne-i Üsküdar’a tâbi‘ Çengel karyesinde sâkin iken bundan akdem irtihâl-i Dâr-ı Bekā eden Ahmed Şevket Bey b. İsmail Bey b. Ahmed Paşa’nın sulbî sagīr mahdûmları İsmail Saad ve Cavid beyler ve sulbiye sagīre kerîmeleri Nesime ve Bedia hanımların vâlideleri ve tesviye-i emirlerine bâ-hüccet-i şer‘iye vasîyy-i mansûbeleri Naciye Hanım bt. İbrahim Paşa’nın li-ebeveyn birâderi ve tarafından umûr-ı vesâyeti idâre ve rü’yete vekîl olduğu mûmâ-ileyhânın zâtını ârifân Abdullah Efendi b. el-Hâc Mustafa b. Abdullah ve Niyazi Bey b. Mehmed İzzet b. Mustafa şehâdetleriyle sâbit olan Üsküdar Dâire-i Belediyesi muhâsebecisi işbu bâ‘isü’l-kitâb izzetlü Mehmed Beyefendi bi’l-vekâle takrîr-i kelâm ve ta‘bîr ani’l-merâm edüp Nezâret-i Haremeyn-i muhteremeyne mülhak evkāfdan vezîriâ‘zam-ı esbak merhûm Hekimzâde Gāzi Ali Paşa Vakfı’na şehriye iki yüz kırk akçe ve kādıasker-i esbak ve ceddim Mollacık İshak Efendi Vakfı’na şehriye otuz akçe ve merhûm Rakım el-Hâc Mehmed Paşa Vakfı’na şehriye iki yüz kırk akçe ve merhûm Hekim Kutbeddin Efendi Vakfı’na şehriye yüz seksen akçe icâre-i müeccelelü evkāf-ı mezkûre müsakkafâtından İstanbul’da Haseki kurbünde Kiçi Hatun mahallesinde [102] vâki‘ yirmi sekiz numara ile murakkam Taşlı Konak denmekle arîf ma‘lûmü’l-hudûd ve’l-müştemilât bir bâb kebîr konak ve cennet-mekân Sultan Bâyezid Hân-ı Velî -tâbe serâhû- hazretlerinin evkāf-ı şerîfelerine şehriye yirmi akçe ve Ebulfeth Sultan Mehmed Han -aleyhi’r-rahmetü ve’l-gufrân- hazretlerinin evkāf-ı şerîfelerine şehriye otuz akçe icâre-i müeccelelü vakfeyn-i mezkûreyn müstegallâtından konağ-ı mezkûr derûnuna cârî kanavât müsennâtına teba‘iyetle bir masura mâ-i lezîz ve Haremeyn-i şerîfeyn -şerrefehumallâhu te‘âlâ fi’d-dâreyn- vakfına iki kıt‘a temessükle şehriye otuz akçe ve merhûme Kiçi Hatun Mescid-i şerîfi Vakfı’na şehriye yüz elli akçe ve mezkûr Kiçi Hatun Mescid-i şerîfinde imâm olanlara galle ve tevliyeti meşrûta vakfa şehriye on beş akçe ve el-Hâc Salih Efendi Vakfı’na şehriye kırk beş akçe ve Matbah-ı âmire emîni esbak merhûm el-Hâc Selim Efendi Vakfı’na iki kıt‘a temessükle şehriye doksan akçe icâre-i müeccelelü ve şehriye altmış akçe mukāta‘alu evkāf-ı mezkûre müstegallâtından konağ-ı mezkûr karşısında kâin kezâlik ma‘lûmü’l-hudûd yirmi üç numara ile murakkam bir kıt‘a bağçeden her birinin nısf hisse-i şâyi‘aları müteveffâ-yı mûmâ-ileyhin hayatında bi’l-icâreteyn taht-ı tasarrufunda olup ba‘de vefâtihî sıgār-ı mûmâ-ileyhim ile sulbiye kebîre kerîmeleri Zekiye ve Mükerrem ve Safvet hanımlara hasbe’l-âde isbâ‘an intikāl edüp lâkin müteveffâ-yı mûmâ-ileyhin birâderi ve müştereki atûfetlü Ali Şefik Beyefendi hazretleri ile kebîrât-ı mûmâ-ileyhimden her biri hisselerini âhara ferâğ edeceklerinden sıgār-ı mûmâ-ileyhimin hisselerinin nef‘ verir sûretde ifrâzı gayr-ı mümkün olmağla sıgār-ı mûmâ-ileyhimin nısfdan dört sübu‘ hisse-i şâyi‘aları dahi kebîrât-ı mûmâ-ileyhimin hisseleriyle ma‘an bedel-i misilleri ve mütevellîleri re’yleriyle âhara ferâğ ve bedeli ahz ü kabz birle i‘mâl ve istirbâh olunup hâsıl olan nemâsıyla hıfz olunmak sıgār-ı mûmâ-ileyhim haklarında her vechile enfa‘ ve evlâ olduğuna binâen işbu yedimde olup Meclis-i Emvâl-i Eytâm ve Kısmet-i Askeriye hâtemleriyle mahtûm bir kıt‘a ilmühaber mantûkunca sıgār-ı mûmâ-ileyhimin hisse-i mezkûreleri bundan akdem lede’l-keşf el-yevm bedel-i misilleri idiği bi’l-ihbâr zâhir olan bin dört yüz yirmi sekiz aded lira-yı Osmânî yetmiş üç guruş mukābelesinde mütevellîleri re’yleriyle âhara ferâğa kıbel-i şer‘den müvekkilem vasîyy-i mûmâ-ileyhâya izâfetle vekîl-i mûmâ-ileyh Mehmed Bey’e izin taleb şüd. Fî 26 Rebî‘ülevvel sene [1]301 Şühûdü’l-hâl: Mehmed Emin Ağa b. Mustafa, Ömer Ağa b. Kadri ve gayruhum.