Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 208 Hüküm no: 154 Orijinal metin no: [102-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kadriye Hanım’dan çocuklarına intikal eden mülklerin satılmasına izin verilmesi Tevfik, izinli vekâlet Numara: 268, 62,5 guruş Medîne-i Antalya mahallâtından Kızılsaray mahallesinde sâkine iken bundan akdem vefât eden Kadriye Hanım bt. Mehmed b. Ali’nin sadrî sagīr oğulları Mehmed Bahaddin ve Ahmed Faik ve Hüseyin Necati ve Hasan Hayati ve sadriye sagīre kızı Saide’nin babaları ve velîleri olup mahmûdü’l-hâl idiği ihbâr olunan mahalle-i mezbûrede sâkin mekteb-i rüşdiye mu‘allimi Şehabeddin Efendi b. Salim b. Abdullah tarafından ber-vech-i âtî vekâlet iddi‘â eden müteveffât-ı mezbûre Kadriye Hanım’ın li-ebeveyn karındaşı işbu bâ‘isü’l-kitâb Mehmed Salim Bey zikri âtî menâzil ve mağaza ve dükkân ve gedik âlâtı hisselerine vâzı‘ü’l-yed olan İbrahim Midhat Efendi b. İbrahim Edhem mahzarında üzerine da‘vâ ve takrîr-i kelâm edüp merhûme ve mağfûrun-lehâ Hadice Sultan -tâbet serâhâ- hazretleri vakf-ı şerîfeleri müsakkafâtından medîne-i Üsküdar’da İhsaniye mahallesinde Orta sokağında kâin altı numara ile murakkam şehriye yirmi sekiz akçe icâre-i müeccelelü bir bâb menzilin nısfdan rub‘ hissesi ve Nezâret-i Evkāf-ı hümâyûna mülhak evkāfdan kādıasker-i esbak merhûm el-Hâc Hasanzâde Muhyiddin Efendi Vakfı müsakkafâtından medîne-i mezbûrede Rum Mehmedpaşa mahallesinde Orta sokağında kâin on bir numara ile murakkam ma‘lûmü’l-hudûd ve’l-müştemilât şehriye yirmi beş akçe icâre-i müeccelelü bir bâb dakīk mağazasının rub‘ hissesi ve merhûm Süleyman Paşa Vakfı mülhakātından merhûm Çakırcı Hasan Paşa Vakfı müstegallâtından medîne-i mezbûrede Tavâşî Hasanağa mahallesinde Dolap sokağında seksen iki numara ile murakkam şehriye kırk akçe icâre-i müeccelelü bir bâb menzilin dört hisse i‘tibârıyla üç hisseden rub‘ hissesi ve Haremeyn-i Muhteremeyn Hazînesi’nden mazbût evkāfdan merhûm Atik Vâlide Sultan -tâbet serâhûm- hazretleri evkāfı müsakkafâtından medîne-i mezbûrede Davud Paşa mahallesinde Karacaahmed caddesinde iki yüz iki numara ile murakkam ma‘lûmü’l-hudûd ve’l-müştemilât şehriye doksan akçe icâre-i müeccelelü bir bâb dükkân ve arsanın nısfdan rub‘ hissesi derûnunda mevcûde Haremeyn-i Muhteremeyn Evkāfı müstegallâtından gedik ta‘bîr olunur şehriye otuz akçe icâre-i müeccelelü âlât-ı lâzıme-i ma‘lûmenin kezâlik nısfdan rub‘ hissesi kız karındaşım müteveffât-ı mezbûrenin hayatında bâ-temessükât-ı mütevellî ve nizâm bi’l-icâreteyn taht-ı tasarrufunda olup ba‘de vefâtihâ sıgār-ı mezbûrûna hasbe’l-âde intikāl edüp ol-vechile hisse-i mezkûreler sıgār-ı mezbûrûnun âdiyen bi’l-icâreteyn tasarruflarında ve mezbûr İbrahim Midhat Efendi hisse-i mezkûrelere kız karındaşım müteveffât-ı mezbûrenin hayatında teslîmiyle bi’l-emâne vâzı‘ü’l-yed olup ancak sıgār-ı mezbûrûnun hisseleri kalîl olarak uhdelerinde ibkāsıyla intifâ‘ mümkün olmamağla sıgār-ı mezbûrûnun hisseleri bedel-i misilleri ve mütevellîleri re’yleriyle âhara ferâğ ve bedelleri ahz [103] ü kabz birle i‘mâl ve istirbâh olunmak sıgār-ı mezbûrûn haklarında her vechile enfa‘ ve evlâ olduğuna binâen sıgār-ı mezbûrûnun hisselerini bedel-i misilleri ve mütevellîleri re’yleriyle âhara ferâğa kıbel-i şer‘den izin talebine ve ba‘de’l-izn bedel-i misilleri ve mütevellîleri re’yleriyle âhara ferâğa ve bedellerini ahz ü kabza ve makbûzumu veliyy-i gāib-i mezbûra irsâl ve îsâle ve husûs-ı mezkûra mütevakkıf olduğu umûrun küllîsine yedimde olup bin iki yüz doksan dokuz senesi Zilka‘deti’ş-şerîfesinin on üçüncü günü târihiyle müverraha medîne-i Antalya nâibi Osman Efendizâde es-Seyyid Mehmed Ârif Efendi’nin imzâ ve mutâbık hâtemini hâviye bir kıt‘a vekâlet hücceti nâtıka olduğu üzere medîne-i mezkûre mahkemesinden nâib-i mûmâ-ileyh huzûrunda şühûd muvâcehesinde tarafından beni gıyâbımda kabûlüme mevkūfe vekâlet-i âmme-i mutlaka-i sahîha-i şer‘iye ile vekîl nasb ü ta‘yîn edüp haber-i vekâlet bana vâsıl oldukda ben dahi vekâlet-i mezkûreyi kabûl etmemle suâl olunup sıgār-ı mezbûrûnun hisse-i mezkûrelerinden keff-i yed ve banamezbûr İbrahim Efendi’ye tenbîh olunmak murâdımdır dedikde gıbbe’s-suâl ol dahi cevâbında hisse-i mezkûrelere müteveffâ-yı mezbûrenin hayatındateslîmle bi’l-emâne vaz‘-ı yedini tâyi‘an ikrâr mâ‘adâ müdde‘î-i mezbûrun vekâlet müdde‘âsını inkâr etmekle müdde‘î-i mezbûrdan ber-vech-i muharrer vekâlet müdde‘âsına mutâbık beyyine taleb olundukda udûl-i ahrâr-ı ricâl-i Müslimînden Ali Rıza Efendi b. Salih b. Abdullah Hafız Mustafa Efendi b. Mehmed b. İbrahim nâm kimesneler m[eclis-i] şer‘a hâzırân olup isre’l-istişhâd her biri müttefikü’l-lafz ve’l-ma‘nâ alâ-tıbku’l-müdde‘î vech-i şer‘î üzere bi’l-muvâcehe mufassalan edâ-yı şehâdet-i şer‘iye etdiklerinde şâhidân-ı mezbûrân zikr olunan Tavâşî Hasanağa mahallesi imâmı Mustafa Şükrü Efendi b. Mehmed ve muhtâr-ı evvel Mustafa Ağa b. Mehmed ve muhtâr-ı sânî Mehmed Kâmil Efendi b. Salih’den evvelâ bâ-varaka-i mestûre sırran ve ba‘dehû sâlifü’l-beyân Tavâşî Hasanağa mahallesi ahâlilerinden Mehmed Kâmil Efendi b. Abdullah ve Ali Efendi b. Mehmed ve Tahsin Bey b. Hakkı ve Mustafa Efendi b. Mehmed ve Hüsnü Bey b. Abdullah ve İzzet Ağa b. Mehmed’den dahi alenen lede’t-tezkiye adl ve makbûlü’ş-şehâde idikleri zîr-i varakaya tahrîr ve ihbâr olunmağın mûcebince hisse-i şâyi‘a-i mezkûrelerden keff-i yed ve müdde‘î-i vekîl-i mezbûr Mehmed Salim Bey’e teslîme mezbûr İbrahim Efendi’ye ba‘de’t-tenbîh Dokuzuncu Dâire-i Belediye’den i‘tâ olunan memhûr bir kıt‘a tahmîn-i bedel pusulası mantûkunca sıgār-ı mezbûrûnun hisse-i şâyi‘a-i mezkûreleri yedinden lede’l-müzâyede ve gıbbe inkıtâ‘i’r-rağbe el-yevm bedel-i misilleri idiği zeyl-i kitâbda muharrerü’l-esâmî Müslimîn haberleriyle zâhir olan lira-yı Osmânî yüz guruş hesâbıyla zikr olunan İhsaniye mahallesinde kâin menzil-i mezkûrdan hisse-i şâyi‘aları 312 guruş ve sâlifü’z-zikr Rum Mehmedpaşa mahallesinde kâin dakīk mağazası hisseleri 3.750 guruş ve sâlifü’l-beyân Tavâşî Hasanağa mahallesinde Dolap sokağında kâin menzil-i mezkûrda hisseleri 4.687,5 guruş ve mârrü’l-beyân Davud Paşa mahallesinde kâin ma‘a-arsa berber dükkânı ile gedik-i mezkûrdan hisseleri 500 guruş ki cem‘an 16.562,5 guruş mukābelesinde bâ-re’y-i mütevellî müvekkili veliyy-i mezbûr Şehabeddin Efendi’ye izâfetle vekîl-i mezbûr Mehmed Salim Bey’e izin taleb şüd. Fî-gurreti Rebî‘ülâhir sene [1]301 Şühûdü’l-hâl: (°) ve gayruhum.