Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 210 Hüküm no: 155 Orijinal metin no: [103-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Şerife Ayşe Hanım’dan kızına kalan evin satılmasına izin verilmesi Hayri, izin: 1 kıt‘a Numara: 263, 18 guruş Mahrûse-i Galata’ya muzâfe kasaba-i Kasım Paşa’da Sirkeci Muslihiddin mahallesinde sâkine iken bundan akdem vefât eden Şerife Âişe Hanım bt. Mehmed Emin’in sadriye sagīre kızı Şerife Emine’nin babası ve velîsi olup mahmûdü’l-hâl idiği ihbâr olunan Asâkir-i Bahriye kolağalarından işbu bâ‘isü’l-kitâb Hasan Kapudan b. Hüseyin bi’l-velâye takrîr-i kelâm ve ta‘bîr ani’l-merâm edüp Nezâret-i Evkāf-ı hümâyûna mülhak evkāfdan merhûm el-Hâc Nureddin Efendi Çeşmesi Vakfı müsakkafâtından kasaba-i mezbûrede Piyale Paşa-yı sagīr mahallesinde Zincirlikapı caddesinde yüz otuz beş numara ile murakkam ma‘lûmü’l-hudûd ve’l-müştemilât şehriye otuz akçe icâre-i müeccelelü bir bâb menzilin nısf hisse-i şâyi‘ası müteveffât-ı mezbûrenin hayatında bâ-sened-i hâkānî bi’l-icâreteyn taht-ı tasarrufunda olup ba‘de vefâtihâ sagīre-i mezbûreye hasbe’l-âde intikāl edüp lâkin menzil-i mezkûr ânen fe-ânen müşrif-i harâb olarak hâsılı harcına vefâ etmeyip bekāsı sagīre-i mezbûre hakkında muzır ve gayr-ı müfîd olmağla sagīre-i mezbûrenin menzil-i mezkûrda olan nısf hisse-i şâyi‘a-i mezkûru bedel-i misliyle bâ-re’y-i mütevellî âhara ferâğ ve bedeli ahz ü kabz birle i‘mâl ve istirbâh olunup hâsıl olan nemâsıyla ma‘an hıfz olunmak sagīre-i mezbûre hakkında her vechile enfa‘ ve evlâ olduğuna binâen işbu yedimde olup esbak mahrûse-i mezkûre kādîsı es-Seyyid Mustafa Fevzi Efendi ile Altıncı Dâire-i Belediye taraflarından i‘tâ olunan memhûr bir kıt‘a tahmîn-i bedel pusulası mantûkunca sagīre-i mezbûrenin nısf hisse-i şâyi‘a-i mezkûresini bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla üç bin altı yüz elli guruş mukābelesinde âhara ferâğa izin taleb şüd. Fî 17 Rebî‘ülâhir sene [1]301 Şühûdü’l-hâl: Mehmed Ağa b. Mustafa, Ömer Ağa b. Abdulkadir ve gayruhum. Derûn-ı hüccetde bast ü beyân olunduğu üzere veliyy-i mezbûr Hasan Kapudan sagīre-i mezbûrenin nısf hisse menzil-i mezkûrîni bedel-i misli olduğu mütehakkık olan lira-yı Osmânî yüz guruş hesâbıyla üç bin altı yüz elli guruş mukābelesinde el-Hâc Abdülvahid Ağa b. Mehmed’e ol dahi der‘akab meblağ-ı merkūm mukābelesinde veliyy-i mezbûr Hasan Kapudan’a bâ-re’y-i mütevellî kat‘iyyen ba‘de’l-ferâğ veliyy-i mezbûr Hasan Kapudan kızı sagīre-i mezbûrenin mâlından ve li-ecli’l-idâne vasî nasb olunan mezbûr Abdülvahid Ağa yedinden beş sene müddetle ve kîsesi altı guruş on para fâizle kabz ve bi’z-zarûre umûruna sarfla istihlâk edüp kızı sagīre-i mezbûre zimmetinde zamanen deyni olan lira-yı Osmânî yüz guruş hesâbıyla üç bin altı yüz elli guruş mukābelesinde nısf hisse [104] menzil-i mezkûru kızı sagīre-i mezbûreye bâ-re’y-i mütevellî vefâen ferâğ ve tefvîz ve vasîyy-i mezbûr dahi sagīre-i mezbûre için bi’l-vesâye tefevvüz ve kabûl edeceğinden ol-vechile ferâğları bi’l-icrâ sened-i hâkānî i‘tâ olunmak üzere işbu mahalle şerh verildi. Fî 17 Rebî‘ülâhir sene [1]301